1 Thecalönika 3 - Wëël Jwøk

¹ 'Ba na tïme ni ba maar lønyø jïwa ki man makwa cwïnywa këët, waana jïëy ki man dööŋwa yi Athen keerwa.

² Ni jääŋwa cöögø ma Timöthi, na näk laŋ Jwøk ri luum Krictø na nyään na met, nou wëëk tëënnö ki ri ŋäädhe maru, ni kööm uuni

³ nee bäŋe ya ŋat mo cwïnye dak kiper gïïö ni leth yøø. Kiper ŋäyu ki dëëtu ni manøgø beeye bëëtö marø.

⁴ Kiper kanya pootwa dïïu, acaanwa jïïu, ni gïï mo leth jwørø jwørø, kaawat mana nø täge enø, ni ŋäyu gø.

⁵ Kiper manøgønø, na tïm cwïnya ni ba maara mak këët, aana jääk baŋu, kiper bëët ŋäädhe maru nee wïnynya, kiper na lwäya ni kanymør ŋat wø pääny jiy, u ee päänynyö, ni tïm öölö marwa no oaay jaak.

⁶ 'Ba kawaane, Timöthi aduu baŋwa, na öö ki baŋu, ni känne jïwa ki dwøl mo met kiper ŋäädhe maru ki mëër maru, ni caan gø ni cooth u lääŋŋa waani, ni yïthu met, ni cwïnynyu oäpö ki man jootu waani, keda man wø äp cwïnywa ki man jootwa uuni.

⁷ Kiper manøgønø, nyïïmera, dï gïïögø bëët ni wø jwørwa ki mo wø kïmwa ki ge, cwïnywa apï piny ki bëëtö maru, kiper ŋäädhe maru.

⁸ 'Ba kawaane, waana kwøw nø, ni näk mou puta bëëtö nou teek ki ri Wuuö.

⁹ ?'Ba a teeŋ met ec mo nyïëdi noo dwøkwa jï Jwøk kiperu kiper met ec mana päl na jootwa kiperu nyïm Jwøø?

¹⁰ Ni wa lämö ki cwïnywa bäre ki yïth cääŋŋe ki wärre bëët, kiper nee wa cäŋwa røømmø ki uuni, nou kønywa ki gïno many ŋäädhe maru.

¹¹ 'Ba kawaane, Jwøø na näk Wääø ki dëëre, ki Kwääyø ma Jecu, waano nyuunhnhe ki jöö man öwa baŋu ki gø.

¹² 'Ba Wuuö mëëyu omeede ni tïme ni päl ni mëërru ki røgu, ki jiy bëët, kaawat mana mëërwa ki uuni.

¹³ Kiper manøgønø nee cwïnynyu tïïe ni ba jøøŋŋi ni ena kur keerge nyïm Jwøø na näk Wääø, yi cäŋo ö Kwääyø ma Jecu ki jiye bëët.