1 Piter 4 - Wëël Jwøk

Bëët Jiy Mo Tïnynya Met Yi Jwøk

¹ Kiper manøgønø, na tïme ni Krictø gïï mo leth ee nø jwør ki rïŋ dëëre, jegu dëëtu ni caarru wïthu na enønø thuwø. Kiper ŋat mo da gïï mo leth mo ee jwørø ki rïŋ dëëre, bäŋ raay mo lääŋŋe këët,

² kiper nee nïre moa no odööŋ moo beede piny, nee ba beede këët ni cwïnye onieŋ køør gïïa reyø ni wø many dhaanhe, 'ba nee bëën moa many Jwøki.

³ Wär yïthu thumge nø ki nïra pöödhö na wara tïïyu gïï wø met yïth juurre ki ge ni wø tïïcge, keda man bëëtge ni geno nieŋ dëët gïï mo patha karge, ni cwïnyge ena køør raay, ki maath, ki wïïrö kwör kwøŋ, ki meeye, ki wøør juu møøk na reyø døc.

⁴ 'Ba yïthge othäŋŋö kawaane kiper mana ba dwätu ki geni këët ri gïïa reyø ni wø rïïŋge køørge, ni tïmge ni ge janynya uuni.

⁵ 'Ba marge opëëny ŋata näk ree ee jiiø ki man ŋøl luup jøøa kwøw ki moa no othøw.

⁶ Ni beeye tiere na køp luumma nyään na met këël jï jøøa näk othøw, kiper manøgønø, këël na ŋøl luumge piny ni gena jiy kaawat man wø ŋøl luup jiy piny, nee ge maar wëënnö ki jöö man kwøwge ki ri jwïëy kaawat man kwøw Jwøki en na jwïëy.

⁷ 'Ba aŋuun jammi bëët kare acäännö. Bëëdu ni wïthu leer, ni koorru dëëtu ni lämu.

⁸ 'Ba dï japøgø bëët, ŋäyu mëër man mëërru ki røgu cooth, kiper mëër beeye wø gëëŋ raay mo thööth.

⁹ Bëëdu nou pänhnha røgu ni bäŋ jøømø.

¹⁰ Kaawat man bëëde ni ŋati man nø ojïtö ki muuy en, røgu wär køønynyu ki ge, ni uuna jø tïïc mo beyø, mo teeŋ gïï met ec mo thööth mo Jwøk owëëk uuni.

¹¹ 'Ba noo näk da ŋat mo cäänö, wär cääne ni ena dhaanhø mo køpa luup Jwøk. Ni ŋat wäro tïny jø møøk wär tïïe ni ena dhaanhø mo tïïö ka teek man wø cïp Jwøki, kiper nee Jwøk jiem ki yïth jammi bëët ki køør Jecu Krictø. 'Ba ajiem ki rööny en jïre, këël na bäre bäre. Enøgønø.

Jwør Gïï Mo Leth Ki Ri Krictø

¹² Omëëya, kär yïthu thäŋŋö ki gïïo ni leth ni caal maac ni wø tägi dëëtu ni päänynya uuni, ni keda gïn mo nyään mo täga dëëtu.

¹³ 'Ba yïthu mïnge kaawat man bëëdu nou nywaaga gïïa leth na jwør Krictø, kiper nee yïthu mïnge ni ŋeethu kanyo nyooth ajiem mare.

¹⁴ 'Ba ni näk mo u di caannø kiper nyeŋ Krictø, uuno gwïëdhö, kiper Jwïëy ajiem na näk mar Jwøk bëëdö bäätu.

¹⁵ 'Ba kär dee dhaanhø mo jwør gïï mo leth kiper mana näk mo ena dïnääy, wala ena kuu, wala ŋat mo tïïya teeŋ raay møga, wala ŋat wø kïth ree yi luum dhaanhø mør.

¹⁶ 'Ba ni näk da ŋat mo jwør gïï mo leth kiper mana näk ena dhaanh Krictø, kär wïïe lääö. 'Ba Jwøk wär jieme ki køør nyeŋŋøgø.

¹⁷ Kiper nïr løøk anø öö, ni tägi ka jø Jwøk. ?'Ba ni näk mo tägi ka øøni, a cuŋ mar jø wø ba leŋ luum Jwøk na nyään na met obëëde nidïï?

¹⁸ 'Ba «?Ni näk mo teek jï ŋat mo mare beer ki man piemi, a ŋat raay ki ŋat wø tïïc gïï mo reyø oenge kaa?»

¹⁹ Kiper manøgønø, wär jø wø jwør gïï mo leth keda mana many Jwøki, tïïcge gïï mo beyø, ni cïpge jwïëcge cer Jwøk na näk Cwääy na dwøre ba dak.