1 Piter 1 - Wëël Jwøk

Määdhe

¹ Aana Piter na näk nyïïatwiel mar Jecu Krictø, a määtha u na jø Jwøk na näk okeethø, ni wø bëëdö na wëëlle yi Pønta, ki Galeecia, ki Kapadöcia, ki Eecia, ki Bithinia,

² u na näk ojier Jwøki na näk Wuuö, nou ee miiø, ni cïp uuni kur keeru ki køør Jwïëc Jwøk, nou bëëdu nou leŋa luup Jecu Krictø, ni jør uuni ki remme. Met ec ki bëët-mëër pälle bäätu.

Ŋäädhe Mo Kwøw

³ Pwøc en jï Jwøk, eni na Wää Kwääyø ma Jecu Krictø; kiper beeye ki køør met yie na dwøŋ na cäŋ ø nywøllø ni ø nyärö, ni jït cwïnynyø ki ŋäädhe mo kwøw ki køør duun Jecu Krictø wøk ki yi thøø.

⁴ Ni joodø olaaw mana näk ba maar ränynyö, na näk bäŋ gïr raay ree, na näk ba jøøl, na näk okanø maal kiperu,

⁵ u na näk ogwøk Jwøki ki teege ki køør ŋäädhe, nee pïëm man piem u ki gø mana näk onø jiiŋŋø noo nyooth kanyo cuŋ pinynyi yie nee jootu.

⁶ Ni beeye gïnögø ni wø mïn yïthu kipere, këël teeŋ gïïö ni leth yøø dou jwørø ki kany mo thiinh,

⁷ kiper manøgønø, nee ŋäädhe maru na näk adïëri na pere letha eni ki warkey ni wø päänynyi ki maac këël na ŋääi ni ränynyö, nee känne ki pwøc, ka ajiem, ki wödö yi cäŋo nyooth Jecu Krictø yie.

⁸ 'Ba u mëër ki eni, këël na käru gø neenø, ni jïëyu ni ŋääthu eni, këël na ba neennu gø, ni mïn yïthu ki met ec mo päl døc mo ba løny ki par.

⁹ 'Ba mana duu ŋäädhe maru jïïu, jwïëyu apiem.

¹⁰ 'Ba nyïïkuk Jwøk moa cäänö kiper muuy mana doo tïmö na maru, gena cää ni pëëge kiper pïëm manøgø man piem jiy ki gø.

¹¹ Ni pëëge na a teeŋ dhaanhø mo nyïëdi, wala a cäŋa ŋø na cään Jwïëc Krictø na en cwïnyge kiper gø, kanya køpge gïïa leth moo jwør Krictø, ka ajiem mano joode cään.

¹² 'Ba anyooth jïge, ni ge ba tïny dëëtge, 'ba ge tïnynya uuni kanya cäänge kar kanyaca, 'ba poot na luupögø na køp jøøa caan luumma nyään na met jïïu yïth nïne moi en, ki køør Jwïëc Jwøk na en kur keere na jääŋŋi ki maal, ni beeye gïïa many cwïny nyïïatwiet maalli nee tiet gïïögø neenge.

Bëëdu Ki Bëëtö Mana En Kur Keere

¹³ Kiper manøgønø, caarru wïthu døøc ni magu wïthu, ni ŋääthu met ec ki cwïnynyu bäre, mano jootu yi cäŋo nyooth Jecu Krictø yie.

¹⁴ Bëëdu ni uuno obwöre ma dïlïŋ luup, ni ba tïmu nou caatha køør gïïa reyø na nieŋ cwïnynyu køørge kanya poode ni bäŋ gïn ŋäyu.

¹⁵ 'Ba bëëdu ki bëëtö mana en kur keere ki yi bëëtö maru bäre, kaamar Jwøk na cwøl uuni ni en kur keere.

¹⁶ Kiper ogöörö, ni «Bëëdu nou ena kur keeru, kiper a ena kur keera.»

¹⁷ 'Ba ni näk eni na Jwøk, ni wø ŋøl luum ŋati man nø keda moa tïïe ni wø bäŋ ŋat mo jeenye, you cwølø ni Wuuö, bëëdu nou lwäär cooth kany poodu pinyi en.

¹⁸ Kiper ŋäyu ni uuna wïïl wøk ki yïth uutjïëthe mou ni wø bäŋ gïn duuge jïïu na kwanynyu baŋ kwäyu, nou ba wiil ka teeŋ jap wø ränynyi, teeŋ ka gwel-bïrö wala warkey.

¹⁹ 'Ba u wiil ka rem Krictø na näk pere leth, na caal rem nyidiel mo bäŋ kany mo jøøŋŋi dëëre, wala kïdö mo raac.

²⁰ Ni eno miiø kanya poode ni piny poot kär cwääö. 'Ba ena nyooth kiperu ya aŋuun nïne.

²¹ 'Ba beeye ki køøre na tïmu nou ŋäätha Jwøk, eni na duu Krictø wøk ki yi thøø, ni mooc gø ka ajiem. Kiper manøgønø, jïëy maru ki ŋäädhe maru ena ri Jwøk.

²² 'Ba na tïme ni cwïnynyu you døøc mo tar kiper mana leŋŋu adïëri ni jït cwïnynyu ki mëëc nyïïmëëe ma adïëri, putu bëëtö nou mëër ki røgu ki cwïnynyu bäre.

²³ Kiper uuna cäŋ nywøllø nou nyärö, nou ba nywöli ka ri kunh wø ränynyi, 'ba u nywöli ka ri kunh wø ba maar ränynyö, ki køør luum Jwøk na kwøw ni wø bëëdö na bäre bäre.

²⁴ Kiper «Jiy bëët caala luum, na ajiem marge caala wï luum mo oŋøøk. 'Ba luum wø tal, ni päth wïïe piny.

²⁵ 'Ba luum Wuuö bëëdö këël na bäre bäre.» Ni luummögøøni beeye luumma nyään na met na caan jïïu.