1 Nyeye 3 - Wëël Jwøk

Kanya Ö Cølömanni Na Pëëny Jwøk Kiper Leec Wïc

¹ 'Ba Cølöman adwätö ki Peerø nyeny jø Ijep ki køør mana nywøm nyi Peerø, ni lwør gø ni käl gø yi Pääny Deebit, këël mana thöör øtø mare ki geer, ki Øt Wuuö Jwøk, ki kiir mar Jerucalem.

² 'Ba kar kaagø, jiy olämme poot cïpge kwör lam moa en bäät thuuri, kiper poot bäŋ øtø mo ogeerø jï Wuuö Jwøk.

³ 'Ba Cølöman mëër ki Wuuö Jwøk, ni eni cäädhi ka køør luup moa caan wänni ma Deebit jïre. 'Ba gïïa tïïe ni ba caana wänni beege olämme ki gïn wø waaŋ ni wø jïye ŋwääi ni met na cïbe kwör lam moa en bäät thuuri.

⁴ 'Ba nyeya ma Cølöman aci Gibien kuna cïpe ko olämme yie, kiper kaace beeye kar lam mana dwøŋ na en bäät thuur. Ni ö Cølömanni ni cïpe ko olämme mo wø waaŋ bäre ma kuma bäät gïn wø cïp olämme bääte mana en kaace.

⁵ 'Ba kanya en Cølömanni Gibien, Wuuö Jwøk ree anyoodhe jïre ki yïth lääk ki wäär; ni kööe jïre, ni «Pëëny gïna manynyï nee cïba jïrï.»

⁶ Kanyøgø, Cølöman aköö, ni «Ïïni, ïïna bëëdö niï nyøtha mëër marï na dwøŋ ni wø ba jøøl jï dhaanhnhï ma wära ma Deebit ki køør mana bëëde ni tïïya adïëri nyïmï, ni bëëdö ki bëëtö mo beer, ni cwïnye thïïŋ ki ïïni. 'Ba dïcäŋi ennø, ïïna cïpö ki wääde mo pï piny bäät wälu mare, niï poot nyootha mëër marï na dwøŋ ni wø ba jøøl jïre.

⁷ «'Ba ennø, ï na Wuuö Jwøk, ni bee ï na Jwøk mara, a na dhaanhnhï, aana tïïyï na nyeya kar wära ma Deebit; 'ba aani, a caala nyilaal mo poot thiinh, ni käär jiy kuua.

⁸ 'Ba a na dhaanhnhï en, a ena dï jiyï moa näk iï jierø, ni beege jøøa thööth døc na näk ba løny kwaan.

⁹ Ennø, a na dhaanhnhï en, mooc aani ki wïc mo leer, nee luup jiyï ŋøla, nee luubö mo beer ki mo raac nee ŋääa. ?Aŋø, aŋa ni løny jïre ki man käär jiyï moi ni thööth ii?»

¹⁰ 'Ba atïmö na gïn mo nëëni ni beer ki jï Kwäärö Wuuö Jwøk kanya ö Cølömanni na pëëny leec wïc.

¹¹ Ni kö Jwøki jïre, ni «Kiper mana pëënynyï leec wïc, niï ba pëëö kaper man bëëdï ki cwiiri mo thööth, niï ba pëëö kaper man bëëdï ni ïïno kwär, niï ba pëëö kaper man thøw nyïïmän moï, 'ba ïïna tïmö ni ï pëënynya man jïtï ki leec wïc man ŋølï luup jiy ki gø,

¹² ka adïëri møn, aani gïnögø tïïa tïïö ki køør luummï. Neenï, aani, a cïpö jïrï ki leec wïc, nee gïn mo beer ki gïn mo raac tïme ni ŋäyï, ni tïme ni bäŋ ŋat mo rööma ïïni ki leec wïc ki mana täge ya acääŋŋe, këël yi nyïme.

¹³ 'Ba aani, gïï mo kärï pëënynyö cïba cïbö jïrï thuwø, ni beege kwärö ki wödö, kiper nee bäŋe nyeya mo tïmö ni rööma ïïni yïth nïne moo beetï.

¹⁴ 'Ba ni näk miï bëëdö niï cäädha køøra, ni gwøgï ciik 'moa ki luup moa cema, kaawat mana bëëde ni wäru ma Deebit caatha køøra, aani, nïne moï tïïa tïïö ni thööth.»

¹⁵ 'Ba kanya ö Cølömanni na pääe, gïnögø aput ŋäc ni beeye lääk mo käla baŋ Jwøk. Ni ö eni ni ö Jerucalem ni cuŋŋe nyïm acanduk man wø nyooth luumma tuut Wuuö Jwøki ki jiy, ni cïpe ko olämme mo wø waaŋ bäre, ko olämme mo wø duunni ki mëër, ni tïïe ka ajwöma jï jø kööre moe bëët.

Kanya Ö Cølömanni Na Ŋøl Luubö Mo Teek

¹⁶ 'Ba da mään ariiø ma kääpe ma aö nyïm nyeya.

¹⁷ Ni kö dhaagø acielli, «Wui, ï na nyeya mara, aani ki dhaagø man, wa bëëdö yi øtø aciel; køøre aana lwaar ki nyilaal ni eni nut yi øtø.

¹⁸ 'Ba gïna tägö, na tïme na køør nïne adäk ni aano nø lwaar, dhaagø man thuwø ena lwaar ki nyilaal, ni bëëtwa na aciel. 'Ba bäŋ dïcwøø mo öö baŋwa yi øtø, 'ba beeye wa keerwa na ariiø ii ni bëëdö yi øtø.

¹⁹ Køøre, nyaani wääde athøw ki wäär, kiper ena but bääte.

²⁰ Køøre ena ö maal ki dhöör dï wäär ni lwør wääda nyïma ni aano butö, ni pïël nyilaal nyïme, ni lwør wääde mana no othøw ni pïël gø nyïma.

²¹ 'Ba kanya pääa ka amöölla kiper nee wääda dhwødha, nyilaal aputa joot no othøw; 'ba kanya neena nyilaal døøc ka amöölla, aputa joot ni paa wääda mana nywøla.»

²² 'Ba dhaagø maya aköö, ni «Jïre bäär; nyilaal mana kwøw beeye wääda, ni nyilaal mana no othøw beeye wäädï.» 'Ba dhaagø mana kwøŋ cäänö aköö, ni «Jïre bäär, nyilaal mana no othøw beeye wäädï, 'ba nyilaal mana kwøw beeye wääda.» 'Ba luup moi beege moa carge nyïm nyeya.

²³ 'Ba nyeya aköö, ni «Dhaagø man aköö, ni ‹Nyilaal man ni kwøw en beeye wääda, ni nyilaal mana no othøw beeye o nyaanøgø;› ni kö maye, ni ‹Jïre bäär, nyilaal mana no othøw beeye wäädï, 'ba nyilaal man ni kwøw en beeye wääda.› »

²⁴ Køøre nyeya aköö, ni «Kännu ko opëëllö jïra.» Køøre gena kännö ko opëëllö.

²⁵ Ni kö nyeya, ni «Pääŋŋu nyilaal manøgø ni kwøw enøgø ki dïëre, ni cïpu thääŋö jï dhaagø aciel, ni cïpu thääŋö maya jï dhaagø maya.»

²⁶ 'Ba dhaagø mana näk nyilaal mana kwøw beeye mare, cwïnye apädhö døc kiper wääde, ni cääne ki nyeya ni kööe, «Wui, ï na nyeya mara, cïp nyilaal mano ni kwøw enø jï nyaanøgø; kär nyilaal 'nägï.» 'Ba dhaagø maya aköö, ni «Nyilaal man ba tïmö na mara, ni ba tïmö na marï; di pääŋŋö ki dïëre.»

²⁷ Køøre nyeya aköö, ni «Cïpu nyilaal mano ni kwøw enø jï dhaagø mana kwøŋ cäänö; kär nou 'näga nyilaal. Nyijøøgø beeye menni.»

²⁸ 'Ba kanya ö jø Icrielli na wïnyge luum ŋøl mana ŋøl nyeya, gena put tïmö ni ge lwäär ki eni; kiper ajootge ni eno nø mooc Jwøki ki leec wïc nee luup wø ŋøle na karge.