1 Nyeye 22 - Wëël Jwøk

Luum Akap Ki Nyikuŋ Jwøk Ma Mikaya

¹ 'Ba cwiiri adäk apöödhö ni bäŋ leny yïthakic jø Aram ki jø Icriel.

² 'Ba kanya tïme na ri dää cwiiri, Jøcapat nyeny Juuda aløøc piny baŋ Akap nyeny Icriel.

³ 'Ba nyeny Icriel onø köö jï jø kööre moe, na «?Aŋø, kuyu ni Ramöth-Gelät marø, ni poodø ni bäŋ gïn tïïø en ki man kälø gø wøk cer nyeny Aram?»

⁴ Ni kööe jï Jøcapat, ni «?Løny man ciï baŋ leny ki aani, nøø këëdø Ramöth-Gelät?» 'Ba Jøcapat aköö jï nyeny Icriel, ni «Aani a caala ïïni, ni jiya poot na jiy moï, no okwëënyi 'moa poot na moï.»

⁵ 'Ba Jøcapat aköö jï nyeny Icriel, ni «Beerra man kwøŋï dwør Wuuö Jwøk pëënynyö.»

⁶ Køøre nyeny Icriel jiy moa tïïc rege na nyïïkuk Jwøk acooŋ kanya ciel, ni beege jiy mo jïtö ki dïpe aŋweenø, ni kööe jïge, ni «?Cøøa baŋ leny Ramöth-Gelät, wala kära cøø?» 'Ba gena köö, ni «Ciï, ocïp Wuuö Jwøki cerï, ï na nyeya.»

⁷ 'Ba Jøcapat aköö, ni «?Bäŋ nyikuŋ Wuuö Jwøk mo ena kany mo pëënynyø këët?»

⁸ 'Ba nyeny Icriel aköö jï Jøcapat, ni «Poot da dhaanhø aciel mo dwør Wuuö Jwøk døø pëënynyö ki eni, 'ba a män ki gø, kiper poot bäŋ gïn mo beer mo ee nø caan en kipera, 'ba cooth beeye gïn mo raac. 'Ba ŋatøgø beeye Mikaya wär Imla.» 'Ba Jøcapat aköö, ni «Nyeya, luummögø kär caanï.»

⁹ Køøre nyeny Icriel ŋat koor aciel acwøle ni kööe, ni «Ciï, laar Mikaya wär Imla cwøl.»

¹⁰ 'Ba kar kaagø, nyeny Icriel ki Jøcapat nyeny Juuda, ge bëëdö ni geno pï piny, ni ŋati man nø opï piny bäät wälu mare yi laara dhi kiir Cameria, na abïïk nyec moge ege røø dëëtge, ni ö nyïïkuk Jwøki bëët ni bëëtge ni ge cäänö nyïmge kiper jammi moo tägi yi nyïm.

¹¹ 'Ba ki røk jøøgø, Cëdëkiya o Kinana dëëre ee tïnynyö ki tuŋi mo tïïc ka nywïënyö, ni kööe, ni «Wuuö Jwøk aköö, ni ‹Jø Aram cööbï cööbö ki tuŋi moi, këël mano dïïrï wïthge.› »

¹² 'Ba nyïïkuk Jwøk bëët luubö man acaange thuwø ni köge, ni «Ci baŋ leny Ramöth-Gelät, ni böödï; geno cïp Wuuö Jwøki cerï, ï na nyeya.»

¹³ 'Ba ŋata jääŋŋi nee Mikaya cwøle, Mikaya acäänne ni kööe, ni «Neenï, nyïïkuk Jwøk bëët, gena cäänö ki dwøl aciel mo met kiper nyeya. Ennø, beerra man ö dwølli mano caanï ni tïme ni met na aciel ki mana caange.»

¹⁴ 'Ba Mikaya aköö, ni «Ŋëët Wuuö Jwøk, Jwøa kwøw, gïno caan Wuuö Jwøki jïra beeye gïno caana.»

¹⁵ 'Ba kanya ö Mikaya baŋ nyeya, nyeya aköö jïre, «?Mikaya, ciwa baŋ leny Ramöth-Gelät, wala kärwa cøø?» 'Ba aløøe jïgø, «Cou ni böödu. Ocïp Wuuö Jwøki cerï, ï na nyeya.»

¹⁶ 'Ba nyeya aköö jïre, na «?A kwöre adïï niï cäänna cäännö, ni ‹Kany wø cäänï ki aani, cäänï ka adïëri ki nyeŋ Wuuö Jwøk›?»

¹⁷ Kanyøgø Mikaya aköö, ni «Aani jø Icriel bëët ajooda ni geno keethø bäät kïte, kaamar dïëk mo bäŋ dïkwääy jïge. 'Ba Wuuö Jwøk aköö, ni ‹Jøøi bäŋ wääge; beerra man ö ŋati man nø ni døø paare ni bäŋ gïn mo otägö dëëre.› »

¹⁸ 'Ba nyeny Icriel aköö jï Jøcapat, ni «?Kära caanø jïrï ni eni bäŋ gïn mo beer mo caane kipera, 'ba beeye gïn mo raac keere?»

¹⁹ 'Ba Mikaya aköö, «'Ba ennø, wïny dwør Wuuö Jwøk. Aani Wuuö Jwøk ajooda no opï piny bäät wälu mare, ni lwaak mare bäre mana en maal cuŋŋö buute, ni møøk ena bäät cwïïe, møøk ki bäät caame.

²⁰ Ni kö Wuuö Jwøki, na ‹?Aŋa noo maaŋ wï Akap ni wëëk gø ciin Ramöth-Gelät nee 'näk?› Ni ö ŋati man nø ni caan man nø.

²¹ 'Ba da jwïëy ma aöö, mo käla ri lwaak manøgø, ni cuŋŋe nyïm Wuuö Jwøk ni kööe, ni ‹Aani wïïe maaŋŋa maaŋŋø.›

²² 'Ba Wuuö Jwøk aköö jïre, ni ‹?Wïïe omaaŋŋï gø nidïï?› Ni kööe, ni ‹Aani a cøø ni tïma ni aana dïcuuy ki dhøk nyïïkuk Jwøk moe bëët.› Køøre Wuuö Jwøk aköö, ni ‹Ba dhäthi jïrï ki man maaŋŋï wïïe. Ciï ni tïïyï gø.›

²³ 'Ba ennø, ï na Akap, ka adïëri møn, Wuuö Jwøk jwïëy anø cïp dhøk nyïïkuk Jwøk moi bëët na moï ii, niï cøøkge; ni ö Wuuö Jwøki ni caan gø ni gïn mo leth pïï bäätï.»

²⁴ Køøre Cëdëkiya o Kinana aput ö baŋ Mikaya ni dhööŋ gø ki thääŋ gø ni kööe, na «?Aŋø, jwïëc Wuuö Jwøk a ee wiiø nidïï ni tïme ni cäänö ka dëërï en?»

²⁵ 'Ba Mikaya aköö, ni «Ka adïëri møn, ojootï dïcäŋeca kanyo dønynyï thääŋ øtø mo ena dïër niï kana dëërï.»

²⁶ Køøre nyeny Icriel aköö, ni «Lwørru Mikaya ni dwøgu gø baŋ Amön kwääc pääny ki Jöac o nyeya;

²⁷ ni kööu, ni ‹Nyeya aköö ni kïthu nyeni øt twöc, ni mooyu eni ki cam mo thiinh ki pïï mo thenh këël kanyo duua ni bäŋ gïn mo otägö dëëra.› »

²⁸ 'Ba Mikaya aköö, «Ni näk miï duuö møn ni bäŋ gïn mo otägö dëërï, Wuuö Jwøk bäŋ gïn ee caanø ki dhaa.» Ni cäŋ köö, ni «Dïbwör bäre, wïnynyu gïra ni caana enø.»

Kanya Ö Akapi Na Nääi

²⁹ 'Ba Akap nyeny Icriel ki Jøcapat nyeny Juuda gena ci baŋ leny Ramöth-Gelät.

³⁰ 'Ba nyeny Icriel aköö jï Jøcapat, ni «Aani a cøøa baŋ leny ni dëëra yaa tïïö keda aana ŋat mør. 'Ba ïïni, røø abïïk nyec moï dëërï.» Kanyøgønø, nyeny Icriel aput ci baŋ leny ni dëëre ee tïïö keda ena ŋat mør.

³¹ 'Ba nyeny jø Aram, kwääc lwaae mo jïëthe mo wø tut okwëënyi moe moa näk pïëradäk kurriiø ee nø köömmö ni kööe, ni «Kär dee jø leny mo u këëdö ki ge, nee ŋat mo kare dwøŋ wala ŋat mo kare thiinh; 'ba tïme ni beeye nyeny Icriel keere.»

³² 'Ba kanya ö kwääc lwaae mo jïëthe mo wø tut okwëënyi na jootge Jøcapat, gena köö, ni «Beeye nyeny Icriel enø.» Ni gaage baŋ gø nee këëtge ki gø; ni ö Jøcapati ni put köö.

³³ 'Ba kanya ö kwääc lwaae mo jïëthe mo wø tut okwëënyi na jootge gø ni eni paa nyeny Icriel, ena wecge ki man ŋwiecge køør gø.

³⁴ 'Ba da ŋat ma athööthö ka atheerø ni mare päätö, ni këël Akap nyeny Icriel ki kanya ŋaam ri kwöt leny mana näk ee røø dëëre. Køøre Akap aköö jï ŋat wø kiiw jää leny mare man wø tut okweenynyi, ni «Wiir jääy, ni kïthï aani wøk ki dï leny, kiper dëëra anø jïtö ki ŋwellø.»

³⁵ 'Ba leny aput tïmö ni teek døc dïcäŋeca, ni ö nyeya ni bëëde ni ree ee jäŋö ki jääy mare man wø tut okweenynyi nyïm jø leny mo jø Aram, ni put thøø kanya tïm pinynyi na abøøya. Ni ö reme mana ö wøk ki kanya näk eno këëlö ki yie ni møl yi jääy.

³⁶ 'Ba kanya tïme ni cäŋ manynya man pädhe, dwøl ajääŋŋi baŋ jø leny, ni købi, ni «Ŋati man nø døø yi pääny mare ni ö ŋati man nø ni døø poge.»

³⁷ 'Ba nyeya athøw ni käli Cameria, ni koonyi yie.

³⁸ Køøre jääy mare man wø tut okweenynyi apeny yi puur Cameria, kany wø ö kääpe wø lwøkge dëëtge yie, ni ö guuwi ni naaŋge rem nyeya, ki køør mana no ocaan Wuuö Jwøki.

³⁹ 'Ba luum tïïe møga bëët moa tïïc Akapi, ki luum øtø mana geere na no oŋwaŋŋø ki tuk lïëy, ki luum päänye bëët moa geere, ogöör piny yi Wëël Luup Nyec Icriel.

⁴⁰ 'Ba Akap athøw ni läp køør kwäcge, ni ö wääde ma Akadhiya ni läw kar gø na nyeya.

Luum Jøcapat Nyeny Juuda

⁴¹ 'Ba kanya tïme na ri ŋweer cwiiri moa beet Akapi ni ena nyeya, beeye kanya tïm Jøcapat wär Aca na nyeya Juuda yi Jerucalem.

⁴² 'Ba Jøcapat cwiiye pïëradäk kurbïïc kanya tïme na nyeya, ni bëëde ni ena nyeya Jerucalem ki cwiiri ma pïërariiø kurbïïc. 'Ba nyeŋ menni beeye Adhuba nyi Cili.

⁴³ 'Ba Jøcapat abëëdö ni caatha køør gïïa tïïc wänni ma Aca, ni käre gaa wøk ki yïthge, 'ba ena bëëdö ni tïïya gïï mo nëëni ni beyø ki jï Wuuö Jwøk. 'Ba kwör lam moa en bäät thuuri kär raanynyø. 'Ba jiy poot bëëdö ni cïpö ko olämme ni ge wääŋö ki gïï wø jïye ŋwääi ni met bäätge.

⁴⁴ 'Ba Jøcapat atudö ki luum mëër ki nyeny Icriel.

⁴⁵ 'Ba luum tïïe møga moa tïïc Jøcapati, ki luum teek mare mana nyoodhe, ki luum lenye moa këële, ogöör piny yi Wëël Luup Nyec Juuda.

⁴⁶ 'Ba kääpe moa no odööŋ ni tïïö kwör lam, ni kär riem wøk yïth nïne moa beet wänni ma Aca, ariem wøk paare.

⁴⁷ 'Ba kar kaagø bäŋ nyeya Ëdöm; 'ba Ëdöm bëënna ŋat mo ocuumö.

⁴⁸ 'Ba Jøcapat atïïö ki baabuure mo gath, nee cige Öpïr kuna öömge ki warkey. 'Ba ge kär cøø, kiper baabuure atøyø yi Edhiyön-Gabir.

⁴⁹ 'Ba Akadhiya wär Akap aköö jï Jøcapat, ni «Beerra man ö jiya ni aacge ki jiy moï ki baabuure.» 'Ba Jøcapat kär jïëy.

⁵⁰ 'Ba Jøcapat athøw ni läp køør kwäcge, ni koonyi buut kwäcge pääny kwari ma Deebit. Ni ö wääde ma Jöram ni läw kar gø na nyeya.

Luum Akadhiya Nyeny Icriel

⁵¹ 'Ba cwiiri moa beet Jøcapati ni ena nyeny Juuda, kanya tïmge na apaar ka abïriiø, Akadhiya wär Akap atïmö na nyeya Icriel yi Cameria, ni käär paac ki cwiiri ariiø.

⁵² 'Ba ena bëëdö ni tïïya gïï mo nëëni ni reyø ki jï Wuuö Jwøk, ni bëëde ni caatha køør gïïa reyø na tïïc wänni ki menni, këël moa tïïc Jeröbämmi o Nebat, na wëëk jø Icriel tïïc ki raay.

⁵³ Ni bëëde ni tïnynya jwøa cwøl ni Baal ni wøøra gø, ni eni tïïya Wuuö Jwøk, Jwø Icriel, nee goote kaawat mana tïïc wänni.