1 Nyeye 21 - Wëël Jwøk

Luubö Mana Tägö Ki Ri Pwöth Omøki Mar Naböth

¹ 'Ba kanya tïme na køøre cään, gïn mør atägö ki ri pwöth omøki mar Naböth nyï Jedhriel, ni beeye pwöthe mana en Jedhriel buut paan dwøŋ mar Akap nyeny Cameria.

² 'Ba Akap acäänö ki Naböth ni kööe, ni «Cïp pwöth omøki marï jïra nee tïïa na pwöth omarø, kiper eni kare cään ki paac mara. Køøre aani a cïpö jïrï ki pwöth omøki mo beerra eni na kar pwödhö manøgø. 'Ba ni näk miï manynya gø, gäte daa cïbö na gwel.»

³ 'Ba Naböth aköö jï Akap, ni «Ki køør ciik Wuuö Jwøk, pwödhö mana no odööŋ na mar kwäcwa, ba løny jïra na bäre ki man cïba gø jïrï.»

⁴ Køøre Akap adøø paare no ogootø ni yie raac døc kiper luubö mana caan Naböthi nyï Jedhriel jïre na kööe, ni «Pwödhö mana no odööŋ na mar kwäcwa ba cïba jïrï.» Køøre ree anyaaŋ piny bäät pëëm mare no ogootø, ni nyïme ee løø ri øtø, ni bëëde ni ba cämö.

⁵ 'Ba cïïe ma Jedhebel aö baŋe ni kööe jïgø, na «?Aperŋø ni bëëdï ni ïïno gootø en, niï bëëdö niï ba cämö?»

⁶ 'Ba ena köö jï cïïe, ni «Aana cäänö ki Naböth nyï Jedhriel ni kööa, ni ‹Cïp pwöth omøki marï jïra nee ŋeea ki gwel. 'Ba ni näk mo yiï met, aani a cïpö jïrï ki pwöth omøki mør na kar pwödhö manøgø.› 'Ba Naböth aköö, ni ‹Pwöth omøki mara ba cïba jïrï.› »

⁷ 'Ba cïïe ma Jedhebel aköö jïre, na «?Aŋø, man beeye jöö man käärï jø Icriel ki gø? Ö maal ni cämï, ni bëëdï ni yiï met. Aani pwöth omøki mar Naböth nyï Jedhriel cïba cïbö jïrï.»

⁸ Køøre nyijøøgø agöödö ki weeli ki nyeŋ Akap, ni gøø ŋïï mar nyeya bäätge, ni jääŋ geni baŋ jø døøŋŋø ki kwääri mo wø bëëdö pääny na aciel ki Naböth.

⁹ 'Ba gïna no ogöör nyijøøgø yïth weeli moøgø beeye en, ena köö, ni «Køpu jï jiy ni dïcäŋi beeye cäŋ wödö yie ki cam, ni cïbu Naböth bäät køøm wöt yïthakic jiy,

¹⁰ ni kännu ki jiy ariiø mo wïthge reyø, ni cïbu ge nyïme, nee ge cäänge ki luup dëëre, ni ge köö, ni ‹Ïïni Jwøk ki nyeya ajanynyï.› Køøre wär kïthu wøk ni këëru eni ki kïte nee thøøe.»

¹¹ 'Ba jiy mo wø bëëdö pääny mana bëët Naböthi yie, ni beege jø døøŋŋø ki kwääri, gïnögø atïïcge ki køør luubö mana jääŋ Jedhebelli baŋge na caane ki yïth weeli moøgø moa jääŋŋe baŋge.

¹² Geni cäŋ man wödö yie ni jøw ba cämö akøpge jï jiy, ni cïpge Naböth bäät køøm wöt yïthakic jiy.

¹³ Køøre jiy ariiø mo wïthge reyø gena öö ni pïge piny nyïme. Ni ö jøøgø ni wïthge reyø yøø ni cäänge ki luup dëër Naböth nyïm jiy ni köge, ni «Naböth Jwøk ki nyeya ajanynye.» Køøre ena put jiyi kïth wøk ŋää pääny, ni këërge gø ki kïte, ni put thøø.

¹⁴ Køøre gena jääk baŋ Jedhebel ki dwøl ni köge, ni «Naböth anø këëri ki kïte ni thøøe.»

¹⁵ 'Ba kanya ö Jedhebelli na wïny gø ni Naböth anø këëri ki kïte ni thøøe, Jedhebel aköö jï Akap, ni «Ö maal ni lwørï pwöth omøki mar Naböth nyï Jedhriel na marï, na mäne ki ïïni ki man ŋeewï gø, kiper eni ba nut këët ni kwøw. Ena thøw.»

¹⁶ 'Ba kanya ö Akapi na wïny gø ni Naböth athøw, ena ö maal nee løøc piny yi pwöth omøki mar Naböth nyï Jedhriel kiper nee lwøre na mare.

¹⁷ 'Ba dwør Wuuö Jwøk aö bäät Ilaaja nyï Ticbi ni kööe,

¹⁸ ni «Ö maal ni løøyï piny kuna røømmï ka Akap nyeny Icriel ni wø bëëdö Cameria. Neenï, eni ena ci pwöth omøki mar Naböth kiper nee lwøre na mare.

¹⁹ 'Ba wärï cäänï ki eni ni kööï ni Wuuö Jwøk aköö, ni ‹Dhaanhø anø 'nägï. ?Aŋø, ï cäŋa duu kuna kälï jape?› Ni cäŋï cäänö ki eni ni Wuuö Jwøk aköö, ni ‹Kanya ö guuwi na naaŋge rem Naböth yie, ïïni thuwø remmï naaŋ guuwi naaŋø yie.› »

²⁰ 'Ba Akap aköö jï Ilaaja, «Wui, nyimän mara, aana nø jootï.» Køøre aput Ilaaja dwøgø, ni «Ïïna nø jooda møn, kiper dëërï agathï niï tïïya gïï mo nëëni ni reyø ki jï Wuuö Jwøk.

²¹ 'Ba Wuuö Jwøk aköö, ni ‹Ï na Akap, ka adïëri møn, aani a känna bäätï ki gïn mo leth, ni nääa cwøw bëët moa käl dhi ødï moa en dï Icriel, këël laaŋe, ni puta ge jwiec bëët.

²² Ni tïïa dhi øtø marï kaamar dhi øt Jeröbäm o Nebat, ki dhi øt Baaca wär Akiya, kiper tïïe moa tïïyï niï raanynya cwïnya naa goota, kiper na wëëgï jø Icriel tïïc ki raay thuwø.›

²³ 'Ba Wuuö Jwøk acäänö thuwø kiper Jedhebel ni kööe ni Jedhebel rïŋ dëëre cam guuwi camø yïth ŋøøp Jedhriel.

²⁴ 'Ba dhaanh Akap man wø thøø yi pääny, eni cam guuwi camø. 'Ba man wø thøø yi pwöla, cam wenynyi camø.»

²⁵ 'Ba ka adïëri møn, bäŋ dhaanhø mo nëëna Akap, mo dëëre ee gadhø ki man tïïe ki gïï mo nëëni ni reyø ki jï Wuuö Jwøk, ni yie coona cïïe ma Jedhebel.

²⁶ Eni, ena tïïö ki gïï mo ec raac ki ge døc, ni beeye gïna tïïe na caath køør gïïa no otieŋø na juu, kaawat mana tïïc jø Amörri bëët, jøøa riem Wuuö Jwøki nyïm jø Icriel.

²⁷ 'Ba kanya ö Akapi na wïny luupögø, abïï mare aput jeec ki pänh cwïny, ni røø keeca dëëre na abïï, ni bëëde ni eni wödö ni ba cämö, ni eni buuta yi keeca, ni put bëëtö ni cwïnye opädhö.

²⁸ Køøre dwør Wuuö Jwøk aö bäät Ilaaja nyï Ticbi ni kööe,

²⁹ na «?Aŋø, ajootï na ö Akapi na dwøk dëëre piny nyïma? Kiper mana dwøk dëëre piny nyïma, aani gïn mo leth ba käla bääte ennø ni eni poot kwøw, 'ba gïn mo leth okäla bäät jø dhi øde yïth nïne moo beet wääde.»