1 Nyeye 20 - Wëël Jwøk

Luum Leny Mana Këël Ben-Adati

¹ 'Ba Ben-Adat nyeny jø Aram jø leny moe bëët acooŋe, ni cøøe ni cäädhi ka nyeye ma pïëradäk kurriiø, ko okwëënyi, ki jïëth leny mo wø tut okwëënyi, ni ciel Cameria dïër, nee tuue.

² 'Ba ena jääk yi pääny ki jiy baŋ Akap nyeny Icriel, ni köge jïre, ni «Ben-Adat aköö,

³ ni ‹Gwel-bïrö ki warkey marï, oløny na mara; ni mään moï moa mïërö døc ko obwöre moï, oløny na 'moa thuwø.› »

⁴ 'Ba aløk nyeny Icrielli ni kööe, «Wui nyenynya, tïme kaawat mana caanï. Aani, ki jammi 'moa bëët, waana moï.»

⁵ 'Ba køøre cään, jøøa jääŋ Ben-Adati acäŋ duu baŋ Akap ni köge, ni «Ben-Adat aköö, ni ‹Ka adïëri møn, aana jääŋ baŋï ki jiy nee gwel-bïrö ki warkey ki mään moï ko obwöre moï cïpï jïra.

⁶ 'Ba diøø kar kany nø, aani, jiya jääŋŋa jääŋŋö baŋï, ni dønyge ødï ki uut jø kööre moï. 'Ba gïïo perge leth jïrï jaak, kälge kälö ni aacge ki ge.› »

⁷ 'Ba nyeny Icriel jø døøŋŋe bëët moa en paac bäre acwøle ni kööe, ni «Nyie, neennu nyenynyøgø ni many gïn mo raac en. Ena jääŋ baŋa kiper nee määra ko obwöre 'moa, ki gwet-bïrö 'moa ki warkey mara cïba jïre; 'ba a kär kweer ki luumme.»

⁸ 'Ba jø døøŋŋe bëët ki jiy bëët aköö jïre, ni «Luumme kär wïnynyï, ni ba jïëyï mare.»

⁹ Køøre nyeya aköö jï jøøa jääŋ Ben-Adati, ni «Caannu jï nyeya mara, ni ‹Jammi bëët moa kwøŋï jääŋ baŋge baŋa, a na dhaanhnhï, cïba cïbö jïrï; 'ba man keere ba løny jïra.› » Køøre jøøa jääŋŋi adøøk ni cige ni caange luubö jï Ben-Adat.

¹⁰ 'Ba Ben-Adat acäŋ jääk baŋ Akap ki dwøl ni kööe, ni «Ni näk mo Cameria bäre ba raany jø lenynyi 'moa, a raany juuwi 'moa raanynyø, ni këël jø leny 'moa bur päänyögø dege jøøbø nee käärge ki ceŋge, ge ba rømi bëët.»

¹¹ 'Ba aløk nyeny Icrielli ni kööe, ni «Caannu jïre, ni ‹Ŋat mo poot lwøra jap leny ba doo ŋwöö kaamar dhaanhø mo onø käädhö.› »

¹² 'Ba kanya ö Ben-Adati na wïny luummögø kanya bëëde ni eni mädhö ki nyeye møga ya abïla, jiye aköömme ni kööe, ni «Jegu rou.» Ni ö jiye ni jekge rege kiper nee pääny tukge.

Kanya Ö Akapi Na Bööt Ben-Adat

¹³ 'Ba da nyikuŋ Jwøk ma aö baŋ Akap nyeny Icriel ni kööe, ni «Wuuö Jwøk aköö, ni ‹?Jiy moøgø ni thööth yøø nëënö jïrï? Ka adïëri møn, aani, ge cïba cerï dïcäŋi, nee putï ŋäc ni aana Wuuö Jwøk.› »

¹⁴ 'Ba Akap aköö, ni «?Geno cïbï gø ceŋ jøøe?» 'Ba aløk nyikuŋ Jwøki ni kööe, ni «Wuuö Jwøk aköö, ni ‹Beege jø leny moa dëëtge teek moa jääŋ kwääri moa en yïth mïëri.› » Køøre Akap acäŋ köö, na «?Aŋa noo täk leny?» Ni kö nyikuŋ Jwøki, ni «Beeye ïïni.»

¹⁵ Køøre Akap jø leny moa dëëtge teek moa jääŋ kwääri moa en yïth mïëri akwaane, ni tïmge na jiy ma dïpe ariiø ki pïëradäk kurriiø. Køør jøøgø, jø leny mo jø Icriel akwaane, ni tïmge na kume abïriiø.

¹⁶ Kanyøgønø, jø leny bëët gena aa wøk kanya tïme na dhöör dïcäŋ, ni Ben-Adat mädhö ya abïla ni eno meer, ge ki nyeye møga moa näk pïëradäk kurriiø na ci baŋ leny ki eni na aciel.

¹⁷ 'Ba jøøa bwøth leny beege jø leny moa näk dëëtge teek na jääŋ kwääri moa en yïth mïëri. 'Ba Ben-Adat dïlëëwe moa näk ee jääŋö wøk aöö ni caange gø jïre, ni köge, ni «Da jø leny ma aö wøk ki Cameria.»

¹⁸ 'Ba Ben-Adat aköö, ni «Ni näk mo ge ööi ka mëër, ge wär magu ni kwøw. 'Ba ni näk mo ge ööi ka leny, ge wär magu thuwø ni kwøw.»

¹⁹ 'Ba jø leny moa dëëtge teek na jääŋ kwääri moa en yïth mïëri, kanya aage wøk baŋ leny, jø leny møga caatha køørge.

²⁰ Ni ö ŋati man nø rege ni 'näk ŋata en nyïme; ni ö jø Arammi ni bwøkge, ni ö jø Icrielli ni ŋwiecge køørge. 'Ba Ben-Adat nyeny jø Aram apäär wøk ki bäät okweeny ki jø leny mo wø këëdi ki bäät okwëënyi.

²¹ Køøre nyeny Icriel aci wøk ni mak okwëënyi ki jïëth leny mo wø tut okwëënyi, ni 'näk jø leny mo jø Aram mo thööth døc.

²² Køøre nyikuŋ Jwøk aö baŋ nyeny Icriel ni kööe jïgø, ni «Ciï ni cäŋï riï jiiŋŋø, ni cädï kiper gïno tïïyï; kiper kanyo tal pinynyi ni bäŋ køth këët, nyeny jø Aram cäŋa duu baŋ leny ki ïïni.»

²³ 'Ba jø kööre mo nyeny jø Aram aköö jï nyeya marge, ni «Juuk jø Icriel beege juuk bäät kïte; beeye tiere gø na böötge øøni en. 'Ba ennø, beerra man këëdø ki geni kany ma pwöla, nee ge böötø.

²⁴ 'Ba ennø, tïïc gïn. Käl nyeye wøk moø ni cäädhï ki ge yøø, ni kïthï kwörge ki kwääc leny,

²⁵ ni kwänyï ki jø leny mo kwäänge caala moa thøw, ni määnyï ko okwëënyi ki jïëthe mo wø tut okwëënyi mo kwäänge caala kwään moa käl. Køøre ø këëdö ki geni yi pwöla, ni böötø geni.» 'Ba Ben-Adat aput jïëy ka acaara marge, ni put gïïa caange tïïc.

²⁶ 'Ba kanya tal pinynyi ni bäŋ køth këët, Ben-Adat jø leny mo jø Aram acooŋe ni cige këël kanya cwøl na Apëk kuna këëtge ki jø Icriel.

²⁷ 'Ba jø leny mo jø Icriel acooŋ ni mooc ge ki cam ki jap leny, ni cige nee rømge ki jø Aram. 'Ba jø Icriel twïër marge atïïcge ni dïët ki mar jø Aram, ni ge nëëni kaamar pïïth dïëk ariiø mo thenh thenh nyïm jø Aram na näk dï paac bäre ege pääŋö.

²⁸ Køøre nyikuŋ Jwøk aöö ni cääne ka Akap nyeny Icriel ni kööe, ni «Wuuö Jwøk aköö, ni ‹Kiper mana kö jø Arammi ni Wuuö Jwøk beeye Jwø bäät kïte, ni eni paa Jwø gøli, aani lwaak manøgø bäre ni dwøŋ enø, cïba ceŋŋu, nee putu ŋäc ni aana Wuuö Jwøk.› »

²⁹ 'Ba jø leny mo jø Aram ki jø leny mo jø Icriel gena bëëdö yïth twëëre moge ki nïne abïriiø ni ge køya dëëtge. 'Ba kanya tïme na ri bïriet nïne, leny atägö; ni ö jø Icrielli ni 'näkge jø leny mo jø Aram ma kume ma dïpa acielø dïcäŋögø.

³⁰ 'Ba moa bøth gena reŋ yi pääny Apëk. Ni ö kiirri ni päth bäät jiy ma kume ma pïërariiø ka abïriiø moa no odööŋ. Ni ö Ben-Adati thuwø ni rïŋ yi päänyögø, ni døny yi thääŋ øtø mo ena dïër.

³¹ 'Ba jø kööre moe aköö jïre, ni «Neenï, awïnywa ni nyeye mo jø Icriel gena nyeye mo yïthge bäth. Ennø, kïthø dëëtø ki keece, ni tööyø cwägø ki thøøli, ni cøø wøk baŋ nyeny Icriel. Kanymør ï wiie wiiø niï ba nääe.»

³² Kanyøgønø, geni keece aputge kïth dëëtge, ni twöge thøøli cwäkge, ni öge baŋ Akap nyeny Icriel ni köge, ni «Dhaanhnhï ma Ben-Adat aköö, ‹Naa kwaya ïïni, kär aani 'nägï.› » 'Ba Akap aköö, «?Na aŋø, eni poot kwøw? Kee ena coka.»

³³ 'Ba jøøgø luubö manøgø akälge na nyuudhi mar gïn mo beer, ni laarge luubö mar Akap jøl dhi gø, ni köge, ni «Ben-Adat coku møn.» 'Ba Akap aköö, ni «Cou ni kälu eni.» Køøre Ben-Adat aput ö wøk baŋe, ni ö Akapi ni kïth eni buute yi jääy mare man wø tut okweenynyi.

³⁴ Køøre Ben-Adat aköö jïre, ni «Päänye moa käl wära baŋ wäru duua duuö jïrï, ni tïï ki kwör gath kiper dëërï Damacka, kaawat mana tïïc wära Cameria.» Kanyøgø Akap aköö, ni «Aani ï wiia wiiø ki køør luubö man tuutï ki aani en.» Køøre Akap aput tudö ki luubö ki Ben-Adat, ni put gø wec nee aae.

Kanya Ö Nyikuŋ Jwøki Na Jääl Akap

³⁵ 'Ba nyikuŋ Jwøk aciel røk nyïïkuk Jwøk aköö jï watge ki køør mana caan Wuuö Jwøki, ni «Gøøc aani.» 'Ba watge akweer ki man gøøc eni.

³⁶ 'Ba nyikuŋ Jwøk manøgø aköö jï watge, ni «Kiper mana kärï dwør Wuuö Jwøk wïnynyö, ka adïëri møn, kanyo tïŋŋï buuta ennø, ï put ŋuuwi ka cam ni thøwï.» 'Ba kanya tïŋŋe buute ennø, ena put ŋuuwi joot, ni puti cam ni thøøe.

³⁷ 'Ba nyikuŋ Jwøk manøgø acäŋ jïtö ki dhaanhø mør ni kööe jïgø, ni «Gøøc aani.» 'Ba ena put ŋatøgø gøøc, ni jït dëëre ki ŋwellø.

³⁸ Køøre, nyikuŋ Jwøk manøgø aput tïŋŋö. Køøre, waŋe abääe ka abïï ni cøøga dëëre nee ba ŋec, ni bëëde ni koora nyeny Icriel waŋjöö.

³⁹ 'Ba kanya tïme ni nyeya pöödhö ki buute ennø, ena köök ni kööe jï nyeya, ni «A na dhaanhnhï, aana ci baŋ leny. 'Ba neenï, ŋat mør agää baŋa ni käla dhaanhø mo ee maaø ki tøŋ baŋa ni kööe, ni ‹Koor ŋati. 'Ba ni näk mo eno rwäänyö, ï di nääö na kare, wala ï cudö ki gwet-bïrö ma kume adäk.›

⁴⁰ 'Ba kanya bëëda ni tïïc päl cera, a na dhaanhnhï en, naa cøøa kun ki kun, ŋatøgø aay.» Køøre nyeny Icriel aköö jïre, ni «Luummï anø ŋølï bäätï keerï, ni gïnögø di tïïö dëërï.»

⁴¹ Kanyøgønø, abïï aput käl wøk waŋe, ni ö nyeny Icrielli ni ŋec eni ni ena dhaanhø aciel røk nyïïkuk Jwøk.

⁴² 'Ba nyikuŋ Jwøk aköö jï nyeya, ni «Wuuö Jwøk aköö, ni ‹Kiper mana wëëgï dhaanhø wääth mo ocïp cerï nee 'näk, ïïni, ï di nääö na kare, ni ö jiyï ni 'näk geni na kar jiye.› »

⁴³ Kanyøgønø, nyeny Icriel aput ci paare Cameria no ogootø ni yie raac døc.