1 Nyeye 2 - Wëël Jwøk

Kanya Ö Deebiti Na Luum Wääde Ma Cølöman Na Aŋuudi

¹ 'Ba kanya tïm kar thøw Deebiti ni cään, wääde ma Cølöman acäänne ni kööe,

² ni «Ennø, kara aløny ni cään ki man thøøa, naa cøøa jöör wø caath jø bäät pinynyi bëët. 'Ba ïïni, bëëdï niï teek, ni nyoothï cwøw marï.

³ Gwøk gïï wø many Wuuö Jwøki Jwøk marï, ni caathï jööre, ni gwøgï ciik moe, ki luup moa ceme, ki luup ŋøl moe, ki pwöc moe, kaawat mana no ogöörö yi wëël ciik Modhe, nee jammi bëët mo wø tïïyï nee wø thurge karge kwör wø bëëdï yïthge bëët,

⁴ kiper nee Wuuö Jwøk luumme mana caane kipera nee wëëk thur kare, na kööe, ni ‹Ni näk mo jiy moo käl dëërï wïthge koorge koorø ki bëëtö marge, ni bëëtge ni ge tïïya adïëri nyïma ki cwïnyge bäre, otïmö niï ba can ki ŋat pï piny bäät wälu mar jø Icriel.›

⁵ «'Ba ennø thuwø, gïna tïïc Jöapi o Dheruya dëëra ŋäyï, ni beeye gïna tïïe dëët kwääc lwaae mo leny mo jø Icriel moa na ariiø, ni beege Abinër o Nër ka Amaaca o Jether, na nääe jaak ni bäŋ leny, ni ö remø marge ni neeker dëër kaw mare ki war moe moa en tiete.

⁶ 'Ba ennø, tïïyï ki køør leec wïc marï; këël na bëëde ni wïïe da lwaar, kär weyï nee thøøe keere; wär 'nägï.

⁷ «'Ba mëër marï wär nyoothï jï wäät Bardhilay nyï Gelät, ni tïïyï geni nee cämge na aciel ki jø wø cämö bäät tharabëëta marï; kiper aana kønyge kanya päära wøk naa ŋwieya owäru ma Abëcëlöm.

⁸ «'Ba Cimiy o Gëra nyï Benjamen na käl Baurim, ni en buutï enø, beeye eni na jany aani ka ajaany mo leth døc dïcäŋa cøøa Maanayim. 'Ba kanya ööe na jul aani bäät Naam Jördan, aana kööŋ jïre ki nyeŋ Wuuö Jwøk ni kööa, ni ‹Aani, ï ba nääa.›

⁹ 'Ba ennø, kär raŋï kaamar dhaanhø mo kär bääyö; kee ïïna dhaanhø mo wïïï leer, mo gïno tïïyï dëëre ŋäyï. 'Ba eni, këël na bëëde ni wïïe da lwaar enø, wär 'nägï.»

Luum Thøw Deebit

¹⁰ Køøre Deebit athøw ni läp køør kwäcge, ni koonyi yi pääny mare ni wø cwøl ni Pääny Deebit.

¹¹ 'Ba cwiiri moa beet Deebiti ni ena nyeya mar jø Icriel beege cwiiri ma pïëraŋween; ni cwiiri abïriiø beede Keeprön ni ena nyeya, ni cwiiri ma pïëradäk kurdäk beede Jerucalem ni ena nyeya.

¹² Ni ö Cølömanni ni bëëde bäät wälu mar wänni ma Deebit, ni ö tier nyec mare ni këëlli piny ni teek.

Luum Thøw Adöniya

¹³ 'Ba Adöniya wär Agith aö baŋ Bathcïba mii Cølöman. Ni kö nyijøøgø jïre, ni «?Marï öö jaak?» Køøre ena köö, «Yaa, mara öö jaak.»

¹⁴ 'Ba ena köö, ni «Aani da gïn mo daa caanø jïrï.» Ni kö nyijøøgø, ni «Caanï.»

¹⁵ Kanyøgønø ena köö, ni «Ŋäyï ni nyec beeye mara na dee bëëdö, ni jø Icriel bëët ge raŋŋa aani naa tïmö na nyeya; 'ba nyec akäl wøk cera ni mëëgi owära, kiper beeye mare cøøn ni cïpa Wuuö Jwøki jïre.

¹⁶ 'Ba ennø, da gïrpiny aciel miï pëënynya pëënynyö ki gø; 'ba kär luumma kwierï.» 'Ba nyijøøgø aköö jïre, ni «Caanï.»

¹⁷ Ni kö Adöniya, na «A kwaya ïïni niï cäänï ki nyeya ma Cølöman, kiper na Abicak nyi jø Cunem nee cïbe jïra na dhaagø, kiper eni luummï ba kwiere.»

¹⁸ 'Ba Bathcïba aköö, ni «Beer, aani, a cäänö ki nyeya kiperï.»

¹⁹ Kanyøgønø, Bathcïba aput ci baŋ nyeya ma Cølöman nee cääne ki gø kiper Adöniya. 'Ba kanya ö menni ma Bathcïba, nyeya aput ö maal, ni kuul wïïe piny ni määtha gø, ni pï piny bäät wälu mare, ni cwöte ki wälu jï menni, nee menni pï piny bääte bäät cwïïc.

²⁰ Kanyøgønø, menni aköö, ni «Aani da luubö aciel mo thiinh miï pëënynya pëënynyö ki gø; kär luubö mara kwierï.» 'Ba nyeya aköö jïre, ni «Pëëï, ayaŋ; a ba kweer ki luummï.»

²¹ Ni kö menni, ni «Beerra man ö Abicak nyi jø Cunem ni cïbi jï owäru ma Adöniya na dhaagø jïre.»

²² 'Ba aløk nyeye ma Cølöman jï menni ni kööe, na «?Aŋø ni pëënynyï Abicak nyi jø Cunem nee cïp jï Adöniya en? ?Aŋø, manøgønø, ï ba pëëny nyec nee wëëk eni thuwø, eni ki jiye, ni beege Abiethaar na näk Kwääy Lam Mana Dwøŋ ki Jöap o Dheruya? Kiper beeye eni no owära mana dwøŋ.»

²³ Kanyøgø, nyeya ma Cølöman akööŋ ki nyeŋ Wuuö Jwøk ni kööe, ni «Ni näk mo luubö mana caan Adöniya en ba duunni ki thøø bääte, aani, a raany Jwøki raanynyø.

²⁴ Ŋëët Wuuö Jwøk Jwøa kwøw, na këël tier nyec mara piny na cïp aani bäät wälu mar wära ma Deebit, na tïïc dhi øtø mara ni teek ki køør mana caane, ka adïëri møn, dïcäŋi Adöniya di nääö.»

²⁵ Kanyøgønø, nyeya ma Cølöman, Benaya o Jööda aput jääŋŋö, ni ö Benaya ni cøøe ni put Adöniya 'näk ni put thøø.

Kanya Män Abiethaar Ki Man Bëëde Na Dïlämi

²⁶ 'Ba nyeya aköö jï Abiethaar na näk Kwääy Lam Mana Dwøŋ, ni «Ci ya Anathöth kanya en pwöthi moï yie. Doo na ï rømi ka thøø cøøn. 'Ba ennø, ï ba nääa, kiper ïïni acanduk man wø nyooth luumma tuut Wuuö Jwøki ki jiy atïïyï nee kääri nyïm wära ma Deebit, ni caan ïïni na aciel ki wära bëët.»

²⁷ Kanyøgønø Cølöman, Abiethaar aput mänö ki man bëëde ni ena dïlämi jï Wuuö Jwøk; ni put luubö mana caan Wuuö Jwøki Cëëlö kiper dhi øt Ëli thur kare.

Luum Thøw Jöap

²⁸ 'Ba luup moøgø awïnyö baŋ Jöap. Ni ö Jöapi ni reŋ yi kal mana en oduŋkaara mar Wuuö Jwøk yie, ni mak tuk gïn wø cïp olämme bääte; kiper Jöap, këël na bëëde ni eni kär dwätö ka Abëcëlöm ra ageem, ennø ena dwätö ka Adöniya.

²⁹ 'Ba acaan jï nyeya ma Cølöman ni Jöap onø reŋ yi kal mana en oduŋkaara mar Wuuö Jwøk yie, ni eni ena deŋ gïn wø cïp olämme bääte. Køøre Cølöman, Benaya o Jööda aput jääŋŋö ni kööe, ni «Ciï ni 'nägï gø.»

³⁰ Kanyøgø, Benaya aput ci baŋ Jöap kanya en oduŋkaara mar Wuuö Jwøk yie, ni kööe jïre, ni «Nyeya aköö, ni ‹Ö wøk.› » 'Ba ena köö, ni «Jïra bäär; aani, a puta thøø kany.» Køøre Benaya luubö acäŋ dwøk baŋ nyeya, ni kööe, ni «Man beeye luubö mana caan Jöapi jïra.»

³¹ 'Ba nyeya aköö jï Benaya, ni «Tïïyï kaawat mana caane. 'Nägï ni koonyï gø, na ajäl kwör rem jiy moa køny Jöapi piny ki gïn mo bäŋ tiere jaak nee kälï wøk bääta ki dhi øt wära.

³² Ni ö Wuuö Jwøki ni dwøk kwör rem jiy moa køny piny wïïe, kiper eni jiy ariiø mo beerra bëëtö marge ki mare anääe ko opëëllö, ni beege Abinër o Nër, kwääy lwaa leny mar jø Icriel, ka Amaaca o Jether, kwääy lwaa leny mo jø tuuŋ Juuda, ni wära ma Deebit bäŋ gïn ŋääe kipere.

³³ 'Ba ennø, beerra man bëët kwör remø marge ni ena wï Jöap ki nyïïkwaaye na bäre bäre; 'ba Deebit ki nyïïkwaaye, ki jø dhi øde, ki jøw oläw kare bäät wälu mare, geno mooc Wuuö Jwøki ki bëët-mëër mo bëëdö na bäre bäre.»

³⁴ Kanyøgønø, Benaya o Jööda aput cøø ni 'näk Jöap, ni ö eni ni koonyi yi øtø mare na en dï paap.

³⁵ Køøre nyeya Benaya o Jööda akïth kar Jöap na kwääy lwaa leny, ni kïth Dhadök kar Abiethaar na dïlämi mana dwøŋ.

Luum Thøw Cimiy

³⁶ 'Ba nyeya ajäägö nee Cimiy cwøl, ni ööe, ni kööe jïgø, ni «Gëëdï ki øtø kiper dëërï Jerucalem kany, ni bëëdï yie; 'ba kär dee kany miï cøøa yie.

³⁷ 'Ba dïcäŋo aayï wøk kany noo ŋølï waŋ Naam Kidaran, wär put ŋäc na adïëri niï puta thøø; ni ö kwör remø marï ni døø wïïï keerï.»

³⁸ 'Ba Cimiy aköö jï nyeya, ni «Luubö mana caanï enø beeye kare. Kaawat mana caanï gø, ï na nyeya mara, aani, a na dhaanhnhï, gïnögø tïïa tïïö.» Kanyøgønø, Cimiy aput bëëtö Jerucalem ki kany mo bäär.

³⁹ 'Ba na tïme na køør cwiiri adäk, laaŋe ariiø mo Cimiy apäär wøk ni reŋge baŋ Akïc o Maika, nyeny jø Gëth. 'Ba acaan jï Cimiy, ni købi, ni «Neenï, laaŋe moï ge ena Gëth.»

⁴⁰ Kanyøgønø, Cimiy aput ö maal ni jiiŋ arëën mare, ni ci Gëth baŋ Akïc kuna many laaŋe moe, ni käl geni.

⁴¹ 'Ba acaan jï Cølöman ni Cimiy anø aay Jerucalem ni nø ci Gëth, ni nø duue.

⁴² Kanyøgø, nyeya ajäägö nee Cimiy cwøl, ni ööe, ni kööe jïgø, na «?Aŋø, ï kära tïïö niï kööŋï ŋëët Wuuö Jwøk, ni köömma ïïni døøc ni kööa, ni ‹Wär ŋäyï na adïëri ni dïcäŋo aayï noo ciï kanymør, ï puta thøø›? Ni kööï jïra, ni ‹Luubö mana caanï jïra beeye kare.›

⁴³ ?Aŋø, kööŋ mana kööŋï ki gø ki nyeŋ Wuuö Jwøk, ki köömmö mana köömma ïïni ki gø, ba gwøgï gø aperŋø?»

⁴⁴ Ni cäŋ nyeya köö jï Cimiy, ni «Ïïni jammi bëët moa reyø na tïïyï dëër wära ma Deebit ŋäyï ki cwïnyï. Kiper manøgønø, Wuuö Jwøk raay moï dwøge wïïï.

⁴⁵ 'Ba aani na nyeya ma Cølöman en, a di gwïëdhö, ni ö nyec mar Deebit ni bëëde ni tiere okëët piny ni teek nyïm Wuuö Jwøk na bäre bäre.»

⁴⁶ Kanyøgønø, Benaya o Jööda aput nyeya köömmö, ni ci Benaya ni put Cimiy 'näk ni put thøø. Køøre tier nyec aput këët piny ni teek jï Cølöman.