1 Nyeye 19 - Wëël Jwøk

Kanya Ö Ilaaja Na Reŋe Ni Ŋwieya Jedhebel

¹ 'Ba Akap jammi moa tïïc Ilaaja bëët acaane jï cïïe ma Jedhebel, ni beeye jöö mana ö Ilaaja na 'näk nyïïkuk Baal bëët ko opëëllö ki gø.

² 'Ba Jedhebel ajääk baŋ Ilaaja ki dhaanhø ni kööe, ni «Teeŋ kar kany nø diøø, ni näk jwïëy moï kära raanynyø kaamar jwïëc nyïïkuk Baal moa raanynyï, aani, a raany juuwi 'moa raanynyø.»

³ Køøre Ilaaja aput lwäyö, ni ö maal ni reeŋe ni ŋwieya thøø, ni ci Bëërcïïba, paana en yïth ŋøøp Juuda, ni wii ŋat tïïc mare kaace.

⁴ 'Ba eni, ena aa dï paap ni cäädhe ki dïcäŋ bäre; ni cøøe ni pï piny tier abuŋŋö ni päc dëëre thøø, ni kööe, «Wui Wuuö Jwøk, aløny nø. Käl jwïëy 'moa, kiper ba beerra bëëtö mara ni kaala mar kwäcwa.»

⁵ Køøre ree anyaaŋ piny ni bute tier abuŋŋö. Ni ö nyïïatwiel maalli ni gut eni, ni pääe; ni kö nyïïatwiel maalli jïgø, ni «Ö maal, ni cämï.»

⁶ Køøre ena put lwïthö, ni joot møø mo omiiø no ocïp wïïe, mo thaalla bäät kïdi mo lïëth, ki pïï mo ena ya agwäy. Ni put cämö, ni mäthe ki pïï, ni cäŋ ree nyaaŋ piny.

⁷ Køøre nyïïatwiel maal mar Wuuö Jwøk acäŋ öö ri rietge, ni gut gø, ni pääe; ni kö nyïïatwiel maalli jïre, ni «Ö maal, ni cämï, kiper wääth mano caathï poot päl.»

⁸ Køøre ena ö maal ni cäme ni mäthe ki pïï, ni tïm dëëre ni teek ki cam mana came, ni cäädhe ki nïne ma pïëraŋween, ni beege cääŋŋe ki wärre, këël mana pïïe ri Kïn Körëp, kïnna näk Kïn Jwøk.

Kanya Ö Wuuö Jwøki Na Nyooth Ree Jï Ilaaja

⁹ Køøre ena døny øt kïdi ni bëëde yie. Kanyøgø dwør Wuuö Jwøk aö bääte ni kööe jïgø, na «?Agïnaŋø ni tïïyï kany, Ilaaja?»

¹⁰ Ni kö Ilaaja, ni «Aani, aana këëyö døc kiperï, ï na Wuuö Jwøk, Jwø wïth jammi bëët; kiper jø Icriel luumma tuutï ki geni awecge, ni raanyge gïï wø cïp olämme bäätge moï, ni 'näkge nyïïkuk Jwøk moï ko opëëllö. 'Ba beeye aani keera na dööŋ, ni ge poot manynya jwïëy 'moa nee raanyge.»

¹¹ Køøre Wuuö Jwøk aköö, ni «Ö wøk ni cuŋŋï wï kïdi nyïma, a na Wuuö Jwøk; køøre aani, a pöödhö ki buutï.» Ni ö atuunna mo päl mo kwödö ni teek ni pääŋ kïte ki dïge, ni ö kïte moa therø ni tøcge na thäŋi nyïm Wuuö Jwøk. 'Ba Wuuö Jwøk ba en ya atuunna manøgø. 'Ba køør atuunna, dïjäŋ piny aput tägö; 'ba Wuuö Jwøk ba en yi dïjäŋ piny manøgø.

¹² 'Ba køør dïjäŋ piny, maac aput öö; 'ba Wuuö Jwøk ba en yi maaøgø. 'Ba køør maac, nyi dwøl mo thiinh døc aput wïnyö.

¹³ 'Ba kanya ö Ilaaja na wïny dwørøgø, täärnyïme aput uum ka aleeŋŋa mare, ni cøøe ni døny wøk ni cuŋŋe dhi øt kïdi. Køøre dwøl aput ö bääte ni kööe, na «?Agïnaŋø ni tïïyï kany, Ilaaja?»

¹⁴ 'Ba Ilaaja aköö, ni «Aani, aana këëyö døc kiperï, ï na Wuuö Jwøk, Jwø wïth jammi bëët; kiper jø Icriel luumma tuutï ki geni awecge, ni raanyge gïï wø cïp olämme bäätge moï, ni 'näkge nyïïkuk Jwøk moï ko opëëllö. 'Ba beeye aani keera na dööŋ, ni ge poot manynya jwïëy 'moa nee raanyge.»

¹⁵ 'Ba Wuuö Jwøk aköö jïre, ni «Ciï, ni døøgï ki jöörï na curï yie, ni ciï paap Damacka. 'Ba kanyo nø pïïyï nø, wï Adhaël wär thïïmmï ki maaw nee tïme na nyeya bäät jø Aram,

¹⁶ ni thïïmmï wï Jiyu o Nimci ki maaw nee tïme na nyeya bäät Icriel, ni thïïmmï wï Ilaaca o Capath nyï Abël-Mööla ki maaw, nee ci karï na nyikuŋ Jwøk.

¹⁷ 'Ba ni näk mo da dhaanhø mo bøth ki thøø cer Adhaël, eni 'näk Jiyuwi nääö. 'Ba ŋato bøth ki thøø cer Jiyu, eni 'näk Ilaaca nääö.

¹⁸ 'Ba poot da jø Icriel ma kume abïriiø mo cøŋge kärge këël piny nyïm Baal, ni dhøk gïïa no otieŋø no ocaa ri Baal kärge nuumö; geni, ge wiia wiiø bëët.»

Kanya Ö Ilaaja Na Cwøl Ilaaca Nee Cäädhe Køøre

¹⁹ Køøre Ilaaja atïŋŋö kaace, ni joot Ilaaca o Capath ni purö ki dhäk mo orööpö na ariiø ariiø kwöre apaar kurriiø; 'ba eni purö ka mana näk aŋuudi. 'Ba Ilaaja aci baŋ gø, ni ö aleeŋŋa mare ni leeŋ gø bäät gø.

²⁰ Køøre eni dhäk aput wii piny, ni reŋ køør Ilaaja ni kööe, na «A cøø kuna määdha wära ki mera. Køøre nø, aano läm køørï.» Ni kö Ilaaja jïgø, ni «Døøgï; 'ba wïïï kär wïl ki gïna tïïa jïrï.»

²¹ Køøre ena duuö ki baŋ Ilaaja; ni lwør dhäk moa na ariiø na näk orwöbö na pure ki geni, ni 'näk geni ni thaal rïŋge ki jer puur, ni cïp gø jï jiy, ni camge gø. Køøre ena ö maal ni caath køør Ilaaja, ni tïny gø.