1 Nyeye 17 - Wëël Jwøk

Luum Meel Mana Cään Ilaaja Kipere

¹ 'Ba nyikuŋ Jwøk ma Ilaaja nyï Ticbi na en yïth ŋøøp Gelät, aköö jï Akap, ni «Ŋëët Wuuö Jwøk, Jwø Icriel na kwøw, ni wø tïnynya en, ka adïëri møn, ki yïth cwiiri moi ii, tïmö ni bäŋ thööy ki køth, ni näk mo ba caana aani ni køth pädhö.»

² Køøre dwør Wuuö Jwøk aö bäät Ilaaja ni kööe,

³ ni «Aayï kany ni ciï jï løø kur tuul-cäŋ, ni kanï riï bäät waŋ Naam Kerit, na en jï løø kur tuul-cäŋ ki Naam Jördan.

⁴ 'Ba ïïno mädhö ki pïï yi waŋ naamøgø. Aani, agääe yaa nø köömmö nee känge jïrï ki cam kaace.»

⁵ Køøre ena cøø ki køør dwør Wuuö Jwøk, ni bëëde bäät waŋ Naam Kerit na en jï løø kur tuul-cäŋ ki Naam Jördan.

⁶ Ni ö agääe ni putge tïmö ni kännö jïre cooth ki møø ki rïŋö ka amöölla ka abøøya; 'ba eni mädhö yi waŋ naamøgø ki pïï.

⁷ 'Ba kanya tïme na køør nïne møøk, waŋ naam atal, kiper na bäŋe køth mo opädhö yi ŋöömmögø.

Luum Ilaaja Ki Nyijø Ma Cï Thøø

⁸ Køøre dwør Wuuö Jwøk aö bäät Ilaaja ni kööe,

⁹ ni «Ö maal ni ciï Dherepeth na en tier Caydan, ni bëëdï kaace. Neenï, da nyijø ma cï thøø mo yaa nø köömmö kaace kiper niï wø mooe ki cam.»

¹⁰ Køøre ena ö maal ni ci Dherepeth. 'Ba kanya pïïe dhi kiir ennø, nyijø ma cï thøø anwäne kaace ni möödö ki jenni; ni cwøl gø ni kööe, ni «Nyijøøe, mooc aani ki pïï mo thenh nee maadha.»

¹¹ 'Ba kanya tïm nyijøøgø ni aa kuna öömme ki pïï ennø, nyijøøgø acäŋ cwøllø ni kööe, ni «Nyijøøe, wär aani kuunnï thuwø ki thääŋ dääpö ki cerï nee cama.»

¹² 'Ba nyijøøgø aköö, ni «Ŋëët Wuuö Jwøk, Jwøk marï na kwøw, aani bäŋ dääpö jïra, 'ba beeye nyi møø ma yi cenø keere mo ena yi nya awal, ki nyi maaw mo thiinh mo ena tier agwäy. Ennø, beeye ni möönna ki jenni mo thenh en, naa døøa paac kiper nee thaala kipera ki wääda, nee camwa, nee wa putwa thøø køøre.»

¹³ 'Ba Ilaaja aköö jïre, ni «Kärï lwäyö. Ciï ni tïïyï gø kaawat mana caanï. 'Ba wärï kwøŋ tëëdö dëëre jïra ki dääpö mo thiinh ni kälï gø baŋa. Køøre nø, ïïno tëëdö kiperï ki wäädï.

¹⁴ Kiper Wuuö Jwøk, Jwø Icriel, aköö na ennønø, ni ‹Nya awar møø manøgø, tiere ba tal ki møø, ni ö agwää maawi manøgø ni ba tal tiere ki maaw, këël dïcäŋo ö Wuuö Jwøki noo jääŋ køth bäät piny.› »

¹⁵ Køøre nyijøøgø acøø ni tïïc gø ki køør dwør Ilaaja. Ni ö nyijøøgø, ki Ilaaja, ki jøøa en paare, ni putge bëëtö ni ge cämö ki nïne mo thööth.

¹⁶ 'Ba nya awar møø manøgø aput bëëtö ni tiere kär tal, ni ö agwää maawi manøgø thuwø ni put bëëtö ni tiere kär tal, ki køør dwør Wuuö Jwøk mana caane ki dhi Ilaaja.

¹⁷ 'Ba kanya tïme na køøre cään, o nyijøøgø na wää paanøgø enø, atïmö ni tuu, ni tïm täwi mare ni leth këël mana tïme ni ba jwïëy këët.

¹⁸ Køøre nyijøøgø aköö jï Ilaaja, na «?Agïnaŋø ni en yïthakiyø ki ïïni, ï na nyikuŋ Jwøk en? ?Aŋø, ï ö baŋa niï tïïya raay 'moa nee wïïa para ki geni, niï tïïya wääda nee thøøe?»

¹⁹ Køøre Ilaaja aköö jï nyijøøgø, ni «Käl wäädï baŋa.» Ni lwør gø kö menni, ni käär gø ni eth yi øtø mana en maal na bëëde yie, ni pïël gø bäät pëëm mare.

²⁰ Køøre Wuuö Jwøk apëënynye ni kööe, «?Wui, Wuuö Jwøk, ï na Jwøk mara, aŋø, bee ïïni na käl gïn ni leth en dëër nyijøøi na cï thøø ni bëëda buute en, ni tïïyï wääde nee thøøe?»

²¹ Køøre yie arïëp bäät nyilaal kwöre adägö ni kwaaya Wuuö Jwøk ni kööe, «Wui, Wuuö Jwøk, ï na Jwøk mara, a kwaya ïïni, beerra man dwøgï jwïëy mo nyilaari dëëre.»

²² Køøre Wuuö Jwøk dwør Ilaaja awïnynye, ni ö jwïëc nyilaalli ni duue, ni cäŋ kwøwø.

²³ Køøre Ilaaja nyilaal alwøre, ni käl gø piny ki yi øtø mana en maal, ni mëëk gø menni. Ni kö Ilaaja, ni «Raŋï, nyilaal marï akwøw.»

²⁴ Køøre nyijøøgø aköö jï Ilaaja, ni «Ennø, aputa ŋäc ni ïïna nyikuŋ Jwøk møn, ni dwør Wuuö Jwøk mana caanï ki dhiï beeye adïëri.»