1 Nyeye 16 - Wëël Jwøk

¹ 'Ba dwør Wuuö Jwøk aö bäät nyikuŋ Jwøk ma Jiyu wär Anani kiper nee cääne ki Baaca, ni kööe, ni «Wuuö Jwøk aköö,

² ni ‹Ï na Baaca en, ïïna tïŋa maal ki yi tør, ni tïïa ïïni ni ïïna wïth jiya ma jø Icriel. 'Ba køøre ïïna tïmö niï caatha køør Jeröbäm ni tïïyï jiya ma jø Icriel nee tïïge ki raay, ni ge tïïya aani naa goota kiper raay moa tïïcge.

³ 'Ba ïïni na Baaca en, ki jø dhi ødï, u raanynya raanynyø, ni tïïa jø dhi ødï kaamar jø dhi øt Jeröbäm o Nebat.

⁴ 'Ba ŋat dhi ødï mano thøø yi pääny, cam guuwi camø, ni mano thøø yi pwöla, cam wenynyi camø.› »

⁵ 'Ba luum tïïe møga moa tïïc Baaca, këël luum teek mare, ogöör piny yi Wëël Luup Nyec Icriel.

⁶ 'Ba Baaca athøw ni läp køør kwäcge ni koonyi Tirja, ni ö wääde ma Ëla ni läw kar gø na nyeya.

⁷ 'Ba dwør Wuuö Jwøk na caane ki dhi nyikuŋ Jwøk ma Jiyu wär Anani aput tägö dëër Baaca ki jø dhi øde, kiper mana tïïe ki gïï mo nëëni ni reyø ki jï Wuuö Jwøk, na tïïc Wuuö Jwøk nee goote ki køør tïïe moøgø na caal moa tïïc jø dhi øt Jeröbäm. Ni paa manøgø keere, beeye kiper mana 'näk jø dhi øt Jeröbäm thuwø.

Luum Ëla Nyeny Icriel

⁸ 'Ba cwiiri moa beet Aca ni ena nyeny Juuda, kanya tïmge na pïërariiø ka abïciel, Ëla o Baaca atïmö na nyeya Icriel yi Tirja, ni käär paac ki cwiiri ariiø.

⁹ 'Ba Dhimri, ni wø tïïö tier Ëla na kwääy thääŋ lwaa leny man wø këëdi ki bäät jïëthe mo wø tut okwëënyi, agëëmö ki Ëla. 'Ba kar kaagø, Ëla ena Tirja, ni mädhö no oløny ni manynya meerø yi øt Ardha, nyen ma kwääy paan dwøŋ mar Tirja.

¹⁰ Kanyøgø Dhimri aput öö ni døny yi øtø ni gøøc Ëla ni put gø 'näk, ni läw kar gø na nyeya. 'Ba kar kaagø beeye kanya päŋ cwiiri moa beet Aca ni ena nyeny Juuda na pïërariiø ka abïriiø.

¹¹ 'Ba kanya tïm Dhimri na nyeya, ni beeye kanya pï piny bäät wälu ennø, eni jø dhi øt Baaca bëët aput 'näk; ni bäŋe dïcwøø aciel mo odööŋ ri tuuŋ Baaca, këël røk nyïïawääte.

¹² 'Ba Dhimri jø dhi øt Baaca anääe bëët, ki køør mana caan Wuuö Jwøki kiper Baaca ki dhi nyikuŋ Jwøk ma Jiyu.

¹³ 'Ba gïnögø atägö ki køør raay bëët moa tïïc Baaca ki moa tïïc wääde ma Ëla, ni beege moa tïïcge na wëëkge jø Icriel tïïc ki raay, ni ge tïïya Wuuö Jwøk Jwø Icriel nee goote ki geni ki køør juu moge moa tieŋge.

¹⁴ 'Ba luum tïïe møga bëët moa tïïc Ëla ogöör piny yi Wëël Luup Nyec Icriel.

Luum Dhimri Nyeny Icriel

¹⁵ 'Ba kanya tïme na ri cwiiri ma pïërariiø ka abïriiø moa beet Aca ni ena nyeny Juuda, Dhimri abëëdö na nyeya ki nïne abïriiø Tirja. 'Ba jø leny mo Icriel onø tïïö ki twïër töök Gibetön na en yïth ŋøøp jø Pilitin kiper nee tukge.

¹⁶ 'Ba awïny jø lenynyi moa en yi twïër manøgø ni køp, ni «Dhimri anø gëëmö ki nyeya ni 'näk gø.» Kanyøgønø, jø leny bëët mo Icriel, Ømri kwääy lwaa leny aputge tïïc na nyeya mar Icriel twïër dïcäŋeca.

¹⁷ Køøre Ømri ki jø leny mo jø Icriel bëët moa bëëdö ki eni, gena tïŋŋö ki Gibetön, ni cige ni cielge Tirja dïër.

¹⁸ 'Ba kanya ö Dhimri na joot gø ni pääny onø mak, ena døny kar gwøk røk mana teek na en øt nyec, ni waaŋ øtø bääte, ni thøøe.

¹⁹ 'Ba gïnögø atägö ki køør gïïa reyø na tïïe, na näk nëëni ni reyø ki jï Wuuö Jwøk, ki køør mana bëëde ni caatha køør gïïa reyø na tïïc Jeröbäm na wëëk jø Icriel tïïc ki raay.

²⁰ 'Ba luum tïïe møga moa tïïc Dhimri, këël luum ageem mana tïïe, ogöör piny yi Wëël Luup Nyec Icriel.

Luum Ømri Nyeny Icriel

²¹ 'Ba jø Icriel dëëtge apääŋge kwöre ariiø; ni ö thääŋö acielli ni ci køør Tibini o Ginat, kiper nee tïïcge na nyeya, ni ö thääŋö maya ni ci køør Ømri.

²² 'Ba jiy moa ci køør Ømri atïmö ni teeka geni ki jiy moa ci køør Tibini o Ginat. Køøre Tibini anäk, ni ö Ømri ni tïme na nyeya.

²³ 'Ba kanya tïme na ri cwiiri ma pïëradäk ka aciel moa beet Aca ni ena nyeny Juuda, beeye kanya tïm Ømri na nyeya Icriel, ni bëëde ni ena nyeya ki cwiiri apaar kurriiø; ni cwiiri abïciel beede Tirja ni ena nyeya.

²⁴ Køøre thuur Cameria aŋee baŋ Cëmër ki gwet-bïrö mo jïtö ki kar kume abïciel; ni gëëde bäät gø ki pääny, ni cak nyeŋ gø ni Cameria, ni caae ri nyeŋ Cëmër wää thuurri manøgø.

²⁵ 'Ba Ømri abëëdö ni tïïya gïï mo nëëni ni reyø ki jï Wuuö Jwøk, ni raay moa tïïe kaala moa tïïc nyeye bëët moa bwøth maal nyïme.

²⁶ Ni bëëde ni caatha køør gïïa reyø na tïïc Jeröbämmi o Nebat na wëëk jø Icriel tïïc ki raay, ni ge tïïya Wuuö Jwøk, Jwø Icriel, nee goote ki geni ki køør juu moge moa tieŋge.

²⁷ 'Ba luup tïïe møga moa tïïc Ømri, këël luum teek mare, ogöör piny yi Wëël Luup Nyec Icriel.

²⁸ 'Ba Ømri athøw, ni läp køør kwäcge, ni koonyi Cameria; ni ö wääde ma Akap ni läw kar gø na nyeya.

Luum Akap Nyeny Icriel

²⁹ 'Ba kanya tïme na ri cwiiri ma pïëradäk ka abära moa beet Aca ni ena nyeny Juuda, Akap wär Ømri atïmö na nyeya mar Icriel, ni bëëde ni ena nyeya Icriel yi Cameria ki cwiiri ma pïërariiø kurriiø.

³⁰ 'Ba Akap wär Ømri abëëdö ni tïïya gïï mo nëëni ni reyø ki jï Wuuö Jwøk mo kaala moa tïïc nyeye bëët moa bwøth maal nyïme.

³¹ 'Ba eni, mana bëëde ni eni caatha køør tïïe moa reyø na tïïc Jeröbämmi o Nebat, aneene na gïn mo thiinh, ni cäŋ Jedhebel nyi Ëtbaal nyeny jø Caydan nywømø, ni cøøe ni tïny jwøa cwøl ni Baal ni wøør gø.

³² Køøre ena tïïö ki gïn wø cïp olämme bääte jï Baal yi øtø mana geere jï Baal Cameria.

³³ 'Ba Akap thuwø acööth piny ki jaath mo otieŋø mo ocaa ri jwøa cwøl na Acara. Ni ö Akapi ni tïïc Wuuö Jwøk, Jwø Icriel, nee goote, ni kaala moa tïïc nyeye bëët mo Icriel moa bwøth maal nyïme.

³⁴ 'Ba yïth nïne moa beet Akapi ni ena nyeya, Kiël nyï Bëthël, Jerikö acäŋ geerrø. 'Ba kanya täge ki geer tier kiir, kanynye ma Abiram aput thøø, 'ba kanya kïth odhuulu mar dhi kiir, wääde ma Cegup, na näk aŋuunne, acäŋ thøwø, ni beeye ki køør dwør Wuuö Jwøk mana caane ki dhi Jøcua o Nun.