1 Nyeye 14 - Wëël Jwøk

Luum Ajäla Mana Jääl Dhi Øt Jeröbäm Ki Gø

¹ 'Ba kar kaaca, Abaaja wär Jeröbäm atïmö ni tuu.

² Køøre Jeröbäm aköö jï cïïe, ni «Ö maal ni runynyï dëërï ka abïïe miï ba ŋec ki ge ni ïïna cïïa, ni ciï Cëëlö. Neenï, nyikuŋ Jwøk ma Akiya ena kunece, ŋata cäänö kipera naa tïma ni aana nyeya bäät jiyi.

³ 'Ba wärï käädï ki dääpe apaar, ki muunni mo omiinynyø, ka agwäy mo yie da maar kïc, ni ciï baŋe. Eni gïno tägi dëër nyilaal caane caanø jïrï.»

⁴ Køøre cï Jeröbäm gïnögø aput tïïc, ni ö maal ni aa Cëëlö, ni ci po Akiya. 'Ba Akiya oløny na cwør, ni nyeŋŋe ba rääŋö këët, kiper eno løny na jaal.

⁵ 'Ba onø caan Wuuö Jwøki jï Akiya, ni «Neenï, cï Jeröbäm ööa baŋï kuna pëëny ïïni kiper nyilaal mare, kiper nyilaal mare tuu. 'Ba ïïni, gïn ki gïn wär caanï jïre, kiper kanyo ööe, eni ööi ni ree ee cøøgø keda ena dhaagø mør.»

⁶ 'Ba kanya ö Akiya na wïny tiet nyijøøgø ni nyijøøgø cäänhnha dhi øtø, ena köö, ni «Dunynyï, cï Jeröbäm. ?Aŋø, riï cøøgï gø keda ïïna dhaagø mør en aperŋø? Aani, da luum ajäla mo teek mo ocaanø jïra nee caana jïrï.

⁷ 'Ba ennø, ciï ni caanï gø jï Jeröbäm ni Wuuö Jwøk, Jwø Icriel, aköö, ni ‹Ïïna thïïŋa yïthakic jiya ma jø Icriel, ni tïïa ïïni na bwödhi bäätge,

⁸ ni cööda nyec wøk ki dhi øt Deebit ni cïba gø jïrï. 'Ba ïïni, ï kär tïmö kaamar dhaanhnha ma Deebit, na gwøk gïïa cema na cäädhö køøra ki cwïnye bäre, na bëëdö ni tïïya gïïa näk nëëni ni beyø ki jïra cooth.

⁹ Ïïni thuwø, ïïna tïmö niï tïïya raay mo thööth ni kaala moa tïïc jiy moa dïkwøŋ na bwøth maal nyïmï, ni ciï ni tïï ki juu møøk kiper dëërï, ni tïï ki kït gïï mo oleenyø na gïï lam, niï tïïya aani naa goota, ni kwierï aani.

¹⁰ « ‹'Ba kiper manøgønø, ka adïëri møn, aani, a känna bäät jø dhi ødï, ï na Jeröbäm, ki gïn mo leth, ni nääa cwøw bëët moa käl dhi ødï moa en dï Icriel, këël laaŋe, ni jwiea jø dhi ødï wøk, kaawat man wø ö dhaanhe wø jwieø juu wøk, këël man wø thumge wøk bëët.

¹¹ 'Ba ï na Jeröbäm, dhaanhnhï mano thøø yi pääny, eni cam guuwi camø. 'Ba man wäro thøø yi pwöla, cam wenynyi camø; kiper onø caan Wuuö Jwøki.›

¹² «'Ba ï na cï Jeröbäm, ö maal ni døøï paarï. 'Ba kanyo nyøønï pääny ennø, nyilaal puta thøø.

¹³ Ni ö jø Icrielli bëët ni jwöŋge kipere ni koonyge eni. 'Ba beeye eni keere noo koony yi bwörö røk jø dhi øt Jeröbäm, kiper beeye eni na jït Wuuö Jwøki Jwø Icriel baŋe ki gïn mo beer røk jø dhi øt Jeröbäm.

¹⁴ «'Ba Wuuö Jwøk otïŋ maal ki nyeya kiper dëëre bäät jø Icriel, ni ö eni ni 'näk jø dhi øt Jeröbäm ki mano täge dïcäŋi ennø, këël yi nyïme.

¹⁵ 'Ba Wuuö Jwøk otïïö dëët jø Icriel ki gïï mo leth, ni tïm dëëtge ni kwanynyi, kaawat man wø ö otööki wø tuuŋŋi ya pïïyi; ni ö eni ni cööt jø Icriel wøk ki yi ŋöömmi ni beer en na näk ee cïbö jï kwäcge, ni keeth geni ni leeŋ ge ŋää Naam Upareeti, kiper mana cööthge piny ki jenni moa no otieŋø na no ocaa ri jwøa cwøl na Acara, ni ge tïïya Wuuö Jwøk nee goote.

¹⁶ 'Ba Wuuö Jwøk jø Icriel kwiere kwierø kiper gïïa reyø na tïïc Jeröbämmi na wëëk jø Icriel tïïc ki raay.»

¹⁷ Køøre cï Jeröbäm aö maal ni tïŋŋe ni døø Tirja. 'Ba kanya pïïe dhi øtø bäät thudhi ennø, nyilaal aput thøø.

¹⁸ Køøre jø Icriel bëët nyilaal akoonyge ni jwöŋge kipere, kaawat mana caan Wuuö Jwøki ki dhi dhaanhnhe ma nyikuŋ Jwøk ma Akiya.

Luum Thøw Jeröbäm

¹⁹ 'Ba luum tïïe møga moa tïïc Jeröbämmi, ki lenye moa këële, ki jöö mana käär jiy ki gø ni ena nyeya, ka adïëri møn, gïïögø bëët ogöör piny yi Wëël Luup Nyec Icriel.

²⁰ 'Ba cwiiri moa beet Jeröbämmi ni ena nyeya beege cwiiri ma pïërariiø ka ariiø. Køøre ena thøw ni läp køør kwäcge, ni ö wääde ma Nadap ni läw kar gø na nyeya.

Luum Reeyöböm Nyeny Juuda

²¹ 'Ba Reeyöböm o Cølöman abëëdö na nyeya Juuda. 'Ba Reeyöböm cwiiye pïëraŋween kurciel kanya tïme na nyeya, ni bëëde ki cwiiri apaar ka abïriiø ni ena nyeya Jerucalem, pääny mana jier Wuuö Jwøki røk päänye bëët mo wïth tuŋi mo jø Icriel nee nyeŋŋe bëëde ni ŋäc yie. 'Ba nyeŋ mii Reeyöbömmi beeye Nayma nyi jø Amön.

²² 'Ba jø Juuda gena tïïö ki gïï mo nëëni ni reyø ki jï Wuuö Jwøk, ni ö Wuuö Jwøki ni këëye ki køør gïïa reyø na tïïcge ni kaala moa tïïc kwäcge bëët.

²³ 'Ba geni thuwø, gena gëëdö ki kwör lam bäät thuuri kiper dëëtge, ni cööthge piny ki kïte ki jenni moa no otieŋø na no ocaa ri jwøa cwøl na Acara na gïï lamge bäät thuuri moa bäyö bëët ki tiet jen bëët moa no onigïït piny.

²⁴ Këël yi ŋöömmögø thuwø da cwøw ma kääpe mo ge tïïö kwör lam. 'Ba jø Juuda, gena tïmö ni ge temma jammi moa näk Wuuö Jwøk yie raac ki ge kaawat moa tïïc wïth juurre moa riem Wuuö Jwøki wøk nyïm jø Icriel.

²⁵ 'Ba kanya tïme na ri bïï cwiiri moa beet nyeya ma Reeyöbömmi ni ena nyeya, Cicak nyeny Ijep aöö ni këëde ki jø Jerucalem.

²⁶ Ni twier jammi moa no okanø yi øt kän jammi mo Øt Wuuö Jwøk ki moa no okanø yi øt kän jammi mo øt nyec, ni käl jammi bëët. Këël kööt leny moa no otïïö ki warkey na tïïc Cølömanni akäle bëët thuwø.

²⁷ Køøre nyeya ma Reeyöböm atïïö ki kööt leny møøk mo tïïc ka nywïënyö ma jwïël na kar moøgø, ni cïp ge ceŋ kwääc jø koor mo wø koor dhi øt nyec.

²⁸ 'Ba kany wø ö nyeya wø døny yi Øt Wuuö Jwøk, jø koor kööt leny moøgø käärge käärö, ni kany wø duuge wøk, duuge yi øt jø koor.

²⁹ 'Ba luum tïïe møga moa tïïc Reeyöbömmi bëët, ogöör piny yi Wëël Luup Nyec Juuda.

³⁰ 'Ba Reeyöböm ki Jeröbäm ge bëëdö ni da leny yïthakicge cooth.

³¹ 'Ba Reeyöböm athøw ni läp køør kwäcge, ni koonyi buut kwäcge yi Pääny Deebit. 'Ba nyeŋ menni beeye Nayma nyi jø Amön. Køøre wääde ma Abaaja aläw kar gø na nyeya.