1 Nyeye 13 - Wëël Jwøk

Luum Nyikuŋ Jwøk Mana Öö Ki Juuda

¹ 'Ba da nyikuŋ Jwøk ma aöö ki Juuda ni ööa Bëthël ki køør mana caan Wuuö Jwøki jïre, kanya bëët Jeröbämmi ni cuŋŋö buut gïn wø cïp olämme bääte ni cïpö ko olämme.

² Køøre ena köök bäät gïn wø cïp olämme bääte ni caana dwør Wuuö Jwøk, ni kööe, «Wui, ï na gïn wø cïp olämme bääte! Wuuö Jwøk aköö, ni ‹Ka adïëri møn, nyilaal ma dïcwøø olwaarø ki gø dhi øt Deebit, ni cak nyeŋŋe ni Jöcaya. 'Ba eni dïlämme mo kwör lam moa en bäät thuuri, ni wø cïpi ko olämme bäätï, oŋare bäätï, ni ö cuu mo jiy ni waaŋi bäätï.› »

³ Køøre ena cïpö ki ŋïï dïcäŋeca, ni kööe, ni «Man beeye ŋïï mana caan Wuuö Jwøki, ‹Neennu, gïn wø cïp olämme bääte opääi ki dïëre, ni ö burri mana en yie ni øc piny.› »

⁴ 'Ba kanya ö nyeya ma Jeröbäm na wïny gïna caan nyikuŋ Jwøki, na kööe bäät gïn wø cïp olämme bääte mana en Bëthël, Jeröbäm put nyuuthö ki buut gïn wø cïp olämme bääte, ni kööe, ni «Magu nyenøgø.» 'Ba cere mana nyooth ŋatøgø ki gø aput talø, ni käre løny jïre këët ki man døl gø.

⁵ Këël gïn wø cïp olämme bääte thuwø aput pääö ki dïëre, ni ö burri ni put øc piny ki yi gø, ki køør ŋïï mana cïp nyikuŋ Jwøki ki køør mana caan Wuuö Jwøki.

⁶ Kanyøgø, nyeya ma Jeröbäm acäänö ki nyikuŋ Jwøk ni kööe, ni «Beerra man kwayï Wuuö Jwøk, Jwøk marï, ni lämï kipera nee cera døø kare.» Kanyøgø, nyikuŋ Jwøk, Wuuö Jwøk akwaae, ni ö cer nyeya ni døø kare kaawat mana bëëde dïkwøŋ.

⁷ Køøre nyeya ma Jeröbäm aköö jï nyikuŋ Jwøk, ni «Waa cøø paac na aciel niï jïtï ki gïn camï, niï mooa ki gïrpiny.»

⁸ 'Ba nyikuŋ Jwøk aköö jï nyeya, ni «Këël miï cïpa thääŋ japï cøøn, a ba aay ki ïïni, naa ba cämö naa ba mäthi ki pïï kany.

⁹ Kiper aano cem Wuuö Jwøki ni kööe, ni ‹Ïïni, ï ba doo cämö niï ba doo mäthö ki pïï, niï ba doo duuö ki jöö mana cørï yie.› »

¹⁰ Kanyøgø, ena put døø ki jöö mør, ni käre døøk ki jöö mana ö Bëthël ki gø.

¹¹ 'Ba da nyikuŋ Jwøk ma jaal mo bëëdö Bëthël. Køøre wääte aö baŋe ni caange jammi bëët moa tïïc nyikuŋ Jwøki Bëthël dïcäŋögø jïre; këël luup moa caan nyikuŋ Jwøki jï nyeya ma Jeröbäm acaange jï wääge.

¹² Køøre wääge aköö jïge, ni «?Eno cøra jööre?» 'Ba wääte jööra cør nyikuŋ Jwøki mana käl Juuda ŋäcge.

¹³ 'Ba ena köö jï wääte, ni «Jiiŋŋu arëën jïra.» Køøre wääte arëën ajiiŋge jïre, ni aae ni cäädhi ka bäät arëën.

¹⁴ Ni aae ni läpa køør nyikuŋ Jwøk ni joot gø no opï piny tier jaath; ni kööe jïgø, ni «?Beeye ï nyikuŋ Jwøk mana käl Juuda?» Ni løk gø, ni «Beeye aani.»

¹⁵ Kanyøgø ena köö jïgø, ni «Waa cøø paac na aciel, niï jïtï gïn camï.»

¹⁶ 'Ba aløøe, ni «Aani, a ba døøk ki ïïni, naa ba cäädhi ki ïïni thuwø. Aani, a ba cämö naa ba mäthi ki pïï ki ïïni kany.

¹⁷ Kiper aano cem Wuuö Jwøki ni kööe, ni ‹Ï ba doo cämö niï ba doo mäthö ki pïï kaace; niï ba doo duuö ki jöö mana cørï yie.› »

¹⁸ Køøre nyikuŋ Jwøk mana näk jaal acäänö ki wïïe keere ni kööe jïgø, ni «Aani, aana nyikuŋ Jwøk mo caala ïïni thuwø, ni da luum Wuuö Jwøk mo ocaan nyïïatwiel maalli jïra, ni kööe, ni ‹Ciï ni duuï eni paarï, nee cäme nee mäthe ki pïï.› » 'Ba nyikuŋ Jwøk manøgø, mare cwøk.

¹⁹ Kanyøgønø, ena put døø ki nyikuŋ Jwøk manøgø, ni cäme paare ni mäthe ki pïï.

²⁰ 'Ba kanya bëëtge ni geno pï piny lak cam, dwør Wuuö Jwøk aö bäät nyikuŋ Jwøk mana duu nyikuŋ Jwøk paac.

²¹ Køøre ena köök bäät nyikuŋ Jwøk mana öö ki Juuda, ni kööe, ni «Wuuö Jwøk aköö ni luumma caane akwierï, ni kärï luumme mana cem ïïni ki gø gwøø, eni na Wuuö Jwøk, Jwøk marï,

²² ni cäŋï duuö ni cämï ni mäthï ki pïï kanya caane jïrï niï ba doo cämö niï ba doo mäthö ki pïï yie. Kiper manøgønø, ï di nääö, ni ba koony ïïni buut kwäyu.»

²³ 'Ba kanya nø løny nyikuŋ Jwøki ki cam ni nø mäthe ki pïï, nyikuŋ Jwøk mana duu eni paac, arëën ajiiŋŋe jïgø.

²⁴ 'Ba kanya tïŋ nyikuŋ Jwøki, ena røømmø ki ŋuu øtjöö, ni ö eni ni cami ya ŋuuwi ni thøøe, ni leeŋ rïŋ dëëre thääŋ jöö, ni cuŋ arëënni buute; ni ö ŋuuwi thuwø ni cuŋŋe buute.

²⁵ 'Ba jøøa pöödhö ki buute, rïŋ dëëre ajootge no oleeŋ thääŋ jöö ni ŋuu cuŋŋö buute; køøre gena aay ni caange gø yi pääny mana en nyikuŋ Jwøki mana näk jaal yie.

²⁶ 'Ba kanya ö nyikuŋ Jwøki mana duu eni ki jöö na wïny gø, ena köö, ni «Beeye nyikuŋ Jwøk mana kwier luumma cem Wuuö Jwøki. Ena cïp Wuuö Jwøki dhi ŋuu, ni jeeyi, ni thøøe ki køør luubö mana caan Wuuö Jwøki jïre ni eni di nääö.»

²⁷ Køøre, nyikuŋ Jwøk manøgø acäänö ki wääte ni kööe, ni «Jiiŋŋu arëën jïra.» Ni ö wääte ni jiiŋge gø jïre.

²⁸ Køøre ena aay ki bäät gø ni joot dëër ŋatøgø no oleeŋ thääŋ jöö, na arëën ki ŋuu cuŋŋö buute. 'Ba ŋuu dëër dhaanhø käre camø, këël arëën käre gudö ki dhee.

²⁹ Køøre nyikuŋ Jwøk rïŋ dëër gø alwøre ni cïp gø bäät arëën, ni duu gø paac yi pääny mana näk mare, nee jwöŋe kiper gø nee koonye.

³⁰ Ni pïël dëër gø yi bwörö mare, ni jwöŋge kiper gø, ni köge, ni «Wui, coka!»

³¹ 'Ba kanya nø lønye ki koony nyikuŋ Jwøk, ena cäänö ki wääte ni kööe, ni «Kanyo thøøa, wär a koonynyu yi bwörö mana koony nyikuŋ Jwøk manøgø yie, nou cïba cuu 'moa buut cuu moe.

³² Kiper gïna caane bäät gïn wø cïp olämme bääte mana en Bëthël ki bäät uut lam bëët moa en bäät thuuri na en yïth päänye mo Cameria, na cïp Wuuö Jwøki dhee ni caane, thur kare møn.»

³³ 'Ba këël køør gïnögø, Jeröbäm jöör raay käre wiiø, 'ba ena cäŋ röönyö ki dïlämme kiper kwör lam moa en bäät thuuri røk jiy bëët, ni beege jø wø many gø jaak noo røønye nee tïmge na dïlämme mo kwör lam moa en bäät thuuri.

³⁴ 'Ba gïnögø aput tïmö na raay jï dhi øt Jeröbäm, këël mana put tïmö ni beeye pädhö mare, ni dït wïthge bäät piny.