1 Nyeye 11 - Wëël Jwøk

Kanya Ö Cølömanni Na Gaa Wøk Ki Jöör Jwøk

¹ 'Ba nyeya ma Cølöman acäŋ tïmö ni mëër ka määr wïth juurre møøk mo thööth bäät nyi Peerø, ni beege nyïï jø Möap, ki nyïï jø Amön, ki nyïï jø Ëdöm, ki nyïï jø Caydan, ki nyïï jø Këth,

² ni beege wïth juurre moa cään Wuuö Jwøki kiperge na kööe jï jø Icriel, ni «Kär dëëtu nywømmu ki geni wala ge nywøma dëëtge ki uuni, kiper ka adïëri møn, geni cwïnynyu løøge baŋ juu moge.» 'Ba Cølöman atïmö ni cwïnye ena køør mään moøgø døc.

³ 'Ba ena nyöömö ki mään ma dïpe abïriiø ma nyïï nyeye, ki mään møøk ma dïpe adäk, ni ö määre moøgøøni ni løøge cwïny gø wøk ki jöör Wuuö Jwøk.

⁴ 'Ba kanya tïm Cølömanni na jaal, cwïnye aløø määre wøk baŋ juu møøk; ni ö cwïnye bäre ni tïme ni ba en køør Jwøe ma Wuuö Jwøk, kaawat mana bëët cwïny wänni ma Deebit ni ena køør Wuuö Jwøk.

⁵ Kiper Cølöman atïmö ni caatha køør Actaröth, jwø jø Caydan, ki Milköm, gïna no otieŋø ni wø lam jø Amönni, ni wø raac yi Wuuö Jwøki ki gø.

⁶ 'Ba Cølöman atïïö ki gïï mo nëëni ni reyø ki jï Wuuö Jwøk, ni tïme ni ba cäädhi køør Wuuö Jwøk ki cwïnye bäre, kaawat mana bëët wänni ma Deebit ni cäädha køør Wuuö Jwøk.

⁷ Køøre Cølöman atïïö ki kar lam bäät thuur mana en jï løø kur tuul-cäŋ ki Jerucalem jï Kemöc, gïna no otieŋø ni wø lam jø Möapi, ni wø raac yi Wuuö Jwøki ki gø; ni cäŋ tïïö ki kar lam jï Mölek, gïna no otieŋø ni wø lam jø Amönni, ni wø raac yi Wuuö Jwøki ki gø.

⁸ Ni tïïe thuwø ki kwör lam jï juu mo wø lam määre bëët moa näk juurre, ni ö määrögø ni bëëtge ni ge wääŋö ki jer wø jïcge ŋwääi ni met ni ge cïpö ko olämme jï juu moge.

⁹ 'Ba Wuuö Jwøk awëër ki Cølöman kiper mana ö Cølömanni na løø cwïnye wøk ki jööre, eni na Wuuö Jwøk, Jwø Icriel, na nyooth ree jïre kwöre ariiø,

¹⁰ na kööm eni ni eni ba doo cäädhö køør juu møøk; 'ba eni luubö mana ö Wuuö Jwøki na kööm eni ki gø käre gwøø.

¹¹ Kanyøgønø, Wuuö Jwøk aköö jï Cølöman, ni «Kiper mana nø tïïyï gïn, ni kärï luumma tuuda gwøø, ki ciik moa köömma ïïni ki ge, ka adïëri møn, nyec cööda wøk cerï, ni wëëga gø ŋat mo tïïö tierï.

¹² 'Ba kiper wäru ma Deebit, gïnögø ba tïïa kanyo poode niï kwøw; 'ba aani, nyec manøgø cööda wøk cer wäädï.

¹³ 'Ba nyec bäre ba cööda wøk cere, 'ba wï tuuŋ aciel ocïba jïre kiper dhaanhnha ma Deebit ki Jerucalem na näk yaa jierø.»

Luum Nyïïmän Mo Cølöman

¹⁴ 'Ba Wuuö Jwøk, Adat nyï Ëdöm, nyen mo ena dhi øt nyec mar jø Ëdöm, athïïŋe na nyimän mar Cølöman.

¹⁵ 'Ba ya awaŋca, kanya këët Deebiti ki jø Ëdöm, Jöap kwääc lwaa leny mar Deebit aci kuna koony jiy moa no othøw, ni put jø Ëdöm bëët moa näk cwøw 'näk.

¹⁶ Ni ö Jöapi ki jø leny mo jø Icriel bëët ni bëëtge Ëdöm ki dwäde abïciel, këël mana 'näkge cwøw Ëdöm bëët.

¹⁷ Kanyøgø beeye kanya ö Adati na reŋ Ijep, ni eni reŋi na aciel ki jø Ëdöm møøk mo tïïö tier wänni. 'Ba kar kaace, Adat poot na nyilaal mo thiinh.

¹⁸ 'Ba gena tïŋŋö ki Midien ni öge Paran; ni lwötge ki jiy Paran nee cääthge ki geni, ni öge Ijep baŋ Peerø nyeny jø Ijep. Ni ö Peerø ni mooc Adat ki øtø ki cam ki ŋøøm.

¹⁹ 'Ba Peerø atïmö ni mëër ki Adat døc, ni ö eni ni cïp nyi menni cöök cïïe na dhaagø jï Adat, ni beeye nyi menni cöök gwanynyø man na cïïe en ma Thapana.

²⁰ Ni ö cöök Thapana ni nyöön Adat ki nyilaal ma dïcwøø mo nyeŋŋe cwøl ni Genöbat, ni piithi ya Thapana po Peerø. Ni ö Genöbati ni put bëëtö po Peerø ki wäät Peerø na aciel.

²¹ 'Ba kanya wïnynyi ya Adati Ijep ni Deebit anø thøw ni läp køør kwäcge, ni wïny gø ni Jöap kwääc lwaa leny athøw thuwø, Adat aköö jï Peerø, ni «Beerra man wëëgï aani wääth naa døøa powa.»

²² 'Ba Peerø aköö jïre, na «?Aŋø, agïne na canï ki gø baŋa, ni kööï niï manynya man døøï pou en?» 'Ba aløøe, ni «Bäŋgø; 'ba wec aani naa aa.»

²³ 'Ba Wuuö Jwøk thuwø nyimän mør athïïŋe dëër Cølöman, ni beeye Redhön wär Eliada, na näk opäär wøk ki baŋ nyenynye ma Adadëdher nyeny jø Dhöba.

²⁴ 'Ba køør mana ö Deebiti na nø 'näk jø Dhöba, Redhön ree acuŋŋe ki dïtwïëte ni tïme na kwäärö marge. Ni ö geni ni cige Damacka ni bëëtge kunece, ni put Damacka tïmö ni ena cere.

²⁵ 'Ba Redhön abëëdö na nyimän mar jø Icriel ki yïth nïne bëët moa beet Cølömanni, ni meet gïïa reyø na tïïc Adati; ni ö eni ni bëëde na nyeya bäät jø Aram, ni bëëde ni män ki jø Icriel.

Luum Ageem Mar Jeröbäm

²⁶ 'Ba Jeröbäm o Nebat, nyen ma nyï tuuŋ Ipariem mo bëëdö Jereda, ma ŋat mo tïïö tier Cølöman, mo nyeŋ menni beeye Dherua, nyijø ma cï thøø, ena gëëmö ki nyeya ma Cølöman.

²⁷ 'Ba ageem na täge, tägi na ennønø. Cølöman kanya no othørø ni wø cwøl na Milø atïïe, ni cïëk kanya ŋaam ri kiir mar pääny wänni ma Deebit.

²⁸ 'Ba kar kaagø, Jeröbäm beeye ŋat mo teek mo kare dagø dï jø poge. 'Ba kanya ö Cølömanni na joot gø ni nyenøgø ni poot na wøp enø, tïïc tïïe tïïö døc, ena tïïe na wïth jø tïïc mo wø tïïc tïïe moa teek bëët na käl yi ŋööm jø tuuŋ Maneeca ki jø tuuŋ Ipariem.

²⁹ 'Ba dïcäŋ aciel, ni Jeröbäm tïŋŋa Jerucalem, nyikuŋ Jwøk ma Akiya nyï Cëëlö arøømmø ki eni waŋjöö. 'Ba Akiya dëëre ee runynyö ka abïï mo nyään; 'ba beege keerge na ariiø yøø na en yi pwöla.

³⁰ Kanyøgø, Akiya abïï manøgø ni nyään ni ee røø dëëre enø, agööny wøk, ni jeec gø kwöre apaar kurriiø.

³¹ Køøre ena köö jï Jeröbäm, ni «Lwötï jïrï ki thäk abïïe apaar; kiper Wuuö Jwøk Jwø Icriel aköö, ni ‹Ka adïëri møn, aani, nyec cööda wøk cer Cølöman, ni mooa ïïni ki wïth tuŋi apaar;

³² 'ba Cølöman dööŋ ki wï tuuŋ aciel, ni beeye kiper dhaanhnha ma Deebit ki Jerucalem, pääny mana näk yaa nø jier røk päänye mo wïth tuŋi bëët mo jø Icriel.

³³ 'Ba nyec okäla wøk cer Cølöman, kiper geni aana nø wecge, ni nø wøørge Actaröth jwø jø Caydan, ki Kemöc jwø jø Möap, ki Milköm jwø jø Amön; ni kärge køøra caadhø, ni kärge tïïö ki gïï mo nëëni ni beyø ki jïra, ni kärge ciik 'moa ki luup ŋøl 'moa gwøø, kaawat mana ö Deebiti wää Cølömanni na gwøk gïïögø.

³⁴ 'Ba ennø, aani, nyec bäre ba käla wøk cere, 'ba eni tïïa tïïö nee put bëëtö na wïth jiy ki yïth nïne moo beede bëët, kiper dhaanhnha ma Deebit na jiera, na gwøk gïïa cema ki ciik 'moa.

³⁵ 'Ba aani nyec lwøra lwørø cer wääde, ni cïba gø jïrï, këël wïth tuŋi moa na apaar.

³⁶ 'Ba wï tuuŋ aciel ocïba jï wääde, kiper nee dhaanhnha ma Deebit nee bëëde ni da wïïe nyïma yi Jerucalem, pääny mana jiera kiper dëëra nee nyeŋŋa bëëde ni ŋäc yie.

³⁷ 'Ba ï na Jeröbäm en, ï käla kälö ni tïmï ni ïïna nyeya bäät jø Icriel kanya manynyï jaak.

³⁸ 'Ba ni näk mo luup bëët mo wø caana jïrï wïnynyï wïnynyö, ni cäädhi køøra, ni tïïyï gïï mo nëëni ni beyø ki jïra, niï gwøga ciik 'moa ki luup moa cema, kaawat mana tïïc dhaanhnha ma Deebit, aani, a puta bëëtö ki ïïni ni këëlla tier nyec marï piny kaawat mana tïïa jï Deebit, ni cïba jø Icriel jïrï.

³⁹ 'Ba nyïïkwaac Deebit caanna caannø kiper raay moa tïïc Cølömanni, 'ba paa na bäre bäre.› »

⁴⁰ Kanyøgø, Cølöman atïmö ni manynya man näk Jeröbäm; 'ba Jeröbäm aö maal ni reŋ Ijep baŋ Cicak nyeny jø Ijep, ni bëëde Ijep këël mana thøw Cølömanni.

Luum Thøw Cølöman

⁴¹ 'Ba jammi møga bëët moa tïïc Cølömanni, ki luum leec wïc mare, ogöör piny yi Wëël Tïïe Mo Cølöman.

⁴² 'Ba cwiiri bëët moa beet Cølömanni Jerucalem ni ena nyeya mar jø Icriel beege cwiiri ma pïëraŋween.

⁴³ Køøre Cølöman athøw, ni läp køør kwäcge, ni koonyi yi pääny wänni ma Deebit, ni ö wääde ma Reeyöböm ni läw kar gø na nyeya.