1 Nyeye 10 - Wëël Jwøk

Kanya Ö Nyeny Jø Cïïba Na Lïïm Cølöman

¹ 'Ba kanya ö nyijøøa no orøønyø na nyeya mar Cïïba na wïny gïr wïny nyeŋ mar Cølöman mana cïp Wuuö Jwøki jïre, ena ö kuna pëëny Cølöman ki pïëc mo teek.

² Køøre nyijøøgø aö yi Jerucalem ni käädö ki lwaak mo päl døc, ka athïrööle mo tïëdö ki gïï wø ŋwääi ni wø tïïc kadø ni met, ki warkey mo päl døc, ki nyeŋ kïte mo mïërö mo perge leth. 'Ba kanya pïïe baŋ Cølöman, Cølöman apëënynye ki luup bëët moa en cwïnye.

³ 'Ba nyeya ma Cølöman pïëc mo nyijøøgø bëët adwøge jïgø; ni bäŋe aciel mo odhäthö jïre mo käre løø jïgø.

⁴ 'Ba kanya ö nyijøøgø na nyeny Cïïba enø na joot leec wïc mar Cølöman, ki øt nyec mana geere,

⁵ ki cam man wø cïp nyïme kar cam mare, ki kwör bëëte mo jøøa näk ee cuumö, ki yi jöö man wø tïï jø tïïci moe ki gø, ki ruyö marge, ki jiy moe mo wø gap kwøk nyïïomøki jïre, ko olämme mo wø waaŋ bäre mo wø cïbe Øt Jwøk, doo thøw ki thäŋ ec.

⁶ Køøre nyijøøgø aköö jï nyeya, ni «Luup moa wïnynya naa ena yi ŋöömö mara kiper tïïe moï ki leec wïc marï beege karge.

⁷ 'Ba aani, a kär jïëy ki luup moa wïnynya, këël mana ööa en ni jooda gø ki waŋa. 'Ba neenï, këël moa caan jïra, kär päŋ na thääŋ moa jooda ki waŋa. 'Ba leec wïc marï ki kwärö marï kaala mana waac jïra.

⁸ A met ec mo nyïëdi ni en jï jiy moï ki jiy moa näk iï cuumö ni wø en buutï cooth, ni wø wïny luup mo wø caanï ki køør leec wïc marï!

⁹ 'Ba pwøc en jï Wuuö Jwøk, Jwøk marï, na yie mïnnö ki ïïni na cïp ïïni bäät wäl jø Icriel. 'Ba kiper mana mëër Wuuö Jwøki ki jø Icriel na bäre bäre, ïïna tïïe na nyeya, kiper nee luup wø ŋølï na karge niï tïïya adïëri.»

¹⁰ Køøre nyijøøgø aput cïpö jï nyeya ki warkey ma rumme ma kikarri ma dïpa ki pïërariiø, ki teeŋ gïï wø ŋwääi ni wø tïïc kadø ni met mo thööth døc, ki nyeŋ kïte mo mïërö mo perge leth mo thööth. 'Ba bäŋ gïï wø ŋwääi ni wø tïïc kadø ni met mo ocäŋ käl po nyeya këët mo caala moa käl nyijøøgø na nyeny Cïïba enø jï nyeya ma Cølöman.

¹¹ 'Ba baabuure mo Kiram thuwø moa wara kännö ki warkey ki yo Öpïr, gena kännö jï nyeya ki jer wø cwøl ni almuk mo thööth døc, ki nyeŋ kïte mo mïërö mo perge leth ki yo Öpïr.

¹² Køøre nyeya jerøgø atïïe na jenni mo wø maaŋŋi kany wø eth maal yi Øt Wuuö Jwøk ki øt nyec mare, ni tïïe thuwø ki thøp-othïënhö ma teeŋi ki røk jerøgø kiper jø wär dudi; ni jerøgø bäŋ teeŋge mo ocäŋ käl po nyeya këët, ni bäŋ teeŋge mo ojoodø këët këël dïcäŋi en.

¹³ 'Ba nyeya ma Cølöman gïïa many nyijøøgø na nyeny Cïïba enø na pëënynye bëët acïbe jïgø, ni meede bäät mo wø cïp cøøn ki nyeŋ nyec. Køøre nyijøøgø adøø yi ŋöömö mare ki jiy moe.

Luum Kwärö Mar Cølöman

¹⁴ 'Ba warkie mo wø käli jï Cølöman ki yi cwiir cooth, peek marge beege rumme ma kikarri ma dïpe abïciel ki pïërabïciel ka abïciel,

¹⁵ ni moa jwäk baŋ jø gath, ki mo wø jwäk nyec Arabe, ki jiy moa no ocuumö yïth ŋøøp jø Icriel kär kwaan rege.

¹⁶ 'Ba nyeya ma Cølöman atïïö ki gïï ma dïpe ariiø mo døøŋŋø mo caala kööt leny mo tïïc ka warkey, ni warkey mana tïïc man nø ki gø, peek mare beeye rumme ma cekelli ma dïpe abïciel.

¹⁷ Ni tïïe thuwø ki mo therø ma dïpe adäk, mo poot tïïc ka warkey, ni warkey mana tïïc man nø ki gø, peek mare beeye rumme ma cekelli ma dïpa ki pïërabïïc; ni ö nyeya ni cïp geni yi øtø mana cwøl ni Øt Lur Libaanø.

¹⁸ Køøre thuwø, nyeya atïïö ki wälu mo dwøŋ døc mo tïïc ka lak liec, ni lëëny dëër gø bäre ki warkey mana tøŋ.

¹⁹ 'Ba wälu manøgø nyïme okïthö ko ogat mo da kwör tiel abïciel. Ni gïn wø jääŋ røk ki gø mare ki kuna näk da ŋääe, wïïe maal otïïö ni ree ee döölö, ni deŋ wälu løøi ki løøi okïthö ki gïï cïp ceŋ bäätge, ni gïï ma ariiø mo caala ŋuuwe otïïö ni cuŋŋö buute løøi ki løøi.

²⁰ 'Ba da gïï ma apaar kurriiø mo caala ŋuuwe mo otïïö ni cuŋŋö bäät kwör tiel moa na abïciel, ni bäät kar tielø man nø løøi ki løøi da ŋuu mo cuŋŋö bääte. 'Ba bäŋ teeŋ wälu manøgø mo okwøŋ tïïc cøøn yi buc nyec mør.

²¹ 'Ba gïï wø mäth nyeya ma Cølöman ki ge bëët tïïc ka warkey, ni jap paac bëët moa en yi øtø mana cwøl ni Øt Lur Libaanø tïïc ka warkey mana tøŋ. Ni bäŋgø mo otïïö ki gwel-bïrö, kiper gwel-bïrö okwaanø na gïn mo bäŋ kare ki yïth nïne moa beet Cølömanni.

²² 'Ba nyeya jïre da baabuure mo gath, mo ena yi naam ki baabuure mo Kiram na aciel; ni kany wø tïme na køør cwiiri adäk nø, baabuure moøgø wø kännö ki warkey, ki gwel-bïrö, ki lak lïëy, ka apøønnanyare, ki bïme.

²³ 'Ba nyeya ma Cølöman atïmö ni kare dwøŋ døc ni kaala nyeye bëët mo bäät piny ki kwärö ki leec wïc.

²⁴ Ni ö jø bäät pinynyi bëët ni tïmge ni ge manynya man öge baŋ Cølöman kuna wïnyge luup mo wø caane ki køør leec wïc mare mana cïp Jwøki jïre.

²⁵ 'Ba jiy bëët mo wø ööi ki yi cwiir cooth, ge käädö ki muuce, ni beege jammi moa näk tïïc ka gwet-bïrö, ki jammi moa näk tïïc ka warkey, ka abïïe, ki jap leny, ki teeŋ gïï wø ŋwääi ni wø tïïc kadø ni met, ko okwëënyi, ki gääŋŋe.

²⁶ 'Ba Cølöman amäänyö ki jïëth leny mo wø tut okwëënyi, ko okwëëc leny; ni jïte ki jïëth leny mo wø tut okwëënyi ma kuma ki dïpe aŋween, ko okwëëc leny ma kume apaar kurriiø; ni kïth møøk yïth päänye mo wø bëët jïëth leny mo wø tut okwëënyi yïthge, ni käl møga buute yi Jerucalem.

²⁷ 'Ba nyeya ma Cølöman gwet-bïrö atïïe ni thööth døc yi Jerucalem ni caala kïte, ni tïïc jenni moa perge leth ni thööth kaamar olämmi mo tuya yi gool.

²⁸ 'Ba Cølöman jø wø gädhö jïre wø jääŋŋe jääŋŋö Ijep ki Kue kuna ŋëëwge ko okwëënyi, ni kälge ge.

²⁹ 'Ba jää leny man nø man wø tut okweenynyi, kany wø käli ki Ijep, gäte beeye gwet-bïrö ma rumme ma cekelli ma dïpe abïciel, ni ö gät okweeny man nø ni näk gwet-bïrö ma rumme ma cekelli ma dïpa ki pïërabïïc; køøre, cäŋge ka gath wøk baŋ nyeye bëët mo jø Këth ki nyeye mo jø Aram.