1 Nyeye 1 - Wëël Jwøk

Kanya Bëët Nyeya Ma Deebit Na Jaal

¹ 'Ba kanya tïm nyeya ma Deebit na jaal ni cwiiye oløny ni thööth, eni dëëre atïmö ni da köö, ni tïm dëëre ni ba murri, këël na bëëde ni dëëre rïëp jiyi rïëbö ka aleeŋŋa.

² Køøre jø tïïc moe gena köö jïre, ni «Ï na nyeya marwa, beerra man määnywa jïrï ki nyakøø jïrï mo dëër dïcwøø poot kuue, nee bëëde ki ïïni niï tïnynye, nee buude nyïmï, kiper nee dëërï murre.»

³ Kanyøgø, gena määnyö ki nyakøø mo kïte mïërö dï ŋööm Icriel bäre, ni jootge Abicak nyi jø Cunem ni kälge gø baŋ nyeya.

⁴ 'Ba nyakøø manøgø mïërö døc; ni ö eni ni put bëëtö ni tïnynya nyeya; 'ba nyeya kär buut ki eni na dhaagø.

Kanya Ö Adöniya Na Thïïŋ Dëëre Na Nyeya

⁵ 'Ba Deebit wääde ma Adöniya mana nywøle ki cïïe ma Agith ree athïïŋe ni kööe, ni «Aani, a tïmö ni aana nyeya.» Kanyøgønø, eni jïëthe mo wø tut okwëënyi, ki jø wø cäädhi ki bäät okwëënyi, ki jiy ma pïërabïïc mo rïïŋi nyïme ajiiŋŋe.

⁶ 'Ba wänni bäŋ kany mo wääde ee jooø yi gø ni pëëny gø, na «?Aŋø, ï tïmmï ŋø ki gïnögø?» 'Ba Adöniya, ena dhaanhø mo kïte mïërö; ni eni käla køør Abëcëlöm.

⁷ 'Ba Adöniya acäänö ki Jöap o Dheruya ka Abiethaar na bëëdö na Kwääy Lam Mana Dwøŋ, ni ö geni ni jïëcge eni ni tïmge ni ge ena løøe.

⁸ 'Ba Dhadök na näk Kwääy Lam Mana Dwøŋ maya, ki Benaya o Jööda, ki nyikuŋ Jwøk ma Nathan, ki Cimiy, ki Rëi, ki jø leny moa teek mo Deebit, ge ba en løø Adöniya.

⁹ Kanyøgønø, Adöniya dïëk ki dhäk ki nyïïrøøe moa no olør acïbe no olämme deŋ Kïn Dhöëlët, na en buut jøøro mana cwøl ni Ayn-Rögëël; ni cwøl uut wänni bëët, ni beege wäät nyeya, ki jø tuuŋ Juuda bëët mo wø tïny nyeya.

¹⁰ 'Ba nyikuŋ Jwøk ma Nathan, ki Benaya, ki jø leny moa teek, ko owänni ma Cølöman käre cwølø.

¹¹ Kanyøgø, Nathan acäänö ki Bathcïba mii Cølöman, ni kööe, na «?Aŋø, kärï wïnynyö na ö Adöniya wär Agith na nø tïme na nyeya, ni wänni ma nyeya marø ma Deebit bäŋ gïn mo ŋääe kiper gø?

¹² 'Ba ennø, ööï, niï cäänna ki luubö mo kwøwa ïïni ki wäädï ma Cølöman.

¹³ Ennø, beerra man laarï ci baŋ nyeya ma Deebit ni kööï jïre, ‹?Wui nyeya mara, aŋø, ï kär kööŋ jïra na bëëde, ni kööï ni wääda ma Cølöman läwa karï na nyeya, nee pï piny bäät wälu marï? ?Aŋø, aperŋø nø na ö Adöniya na tïme na nyeya?›

¹⁴ 'Ba ka adïëri møn, kanyo poode niï poot cäänö kaace ki nyeya, aani a puta ö køørï ni meeda dhi luummï.»

¹⁵ Kanyøgønø, Bathcïba aput ci baŋ nyeya kar niine mar gø. 'Ba kar kaagø nyeya oløny na jaal døc, na Abicak nyi jø Cunem bëëdö ni tïnynya eni.

¹⁶ Køøre Bathcïba cøŋŋe akëël piny ni kuul wïïe piny nyïm nyeya ni määtha gø. Ni kö nyeya jïre, na «?Agïnaŋø ni manynyï?»

¹⁷ 'Ba ena köö jï nyeya, ni «Ï na nyeya mara, ïïna kööŋ jïra ki nyeŋ Wuuö Jwøk ni beeye Jwøk marï, ni kööï ni wääda ma Cølöman läwa karï na nyeya, nee pï piny bäät wälu marï.

¹⁸ 'Ba ennø, neenï, Adöniya anø tïmö na nyeya; ni ï na nyeya mara, bäŋ gïn mo ŋäyï kiper gø.

¹⁹ Ni ö eni ni nø cïpe ki dhäk mo thööth, ki nyïïrøøe moa no olør mo thööth ki dïëk mo thööth no olämme, ni nø cwøl wäätï bëët, ka Abiethaar na näk Kwääy Lam Mana Dwøŋ, ki Jöap kwääy lwaa leny; 'ba eni wäädï ma Cølöman ni wø tïny ïïni käre cwølø.

²⁰ 'Ba ennø, ï na nyeya mara en, jø Icriel bëët raŋŋa jïrï, ki ŋato caanï jïge nee pï piny bäät wälu marï noo läw karï na nyeya.

²¹ 'Ba ï na nyeya, ni näk mo ŋato dööŋ karï ba caanï, kanyo näk mo ïïno thøw, ni läpï køør kwäyu, aani ki wääda ma Cølöman wa put ka tïïc kaamar jiy mo obääyö.»

²² 'Ba kanya poode ni nyijøøgø poot cäänö ki nyeya, nyikuŋ Jwøk ma Nathan aput öö.

²³ 'Ba acaan jï nyeya, ni «Nyikuŋ Jwøk ma Nathan nut kany.» 'Ba kanya ö nyïm nyeya, eni cøŋŋe akëël piny ni kuul wïïe piny ni määtha gø.

²⁴ Køøre Nathan aköö, ni «?Ï na nyeya mara, aŋø, iï caanø cøøn na Adöniya läwa karï na nyeya, nee pï piny bäät wälu marï?

²⁵ Kiper dïcäŋi ena løøc piny kunece ni cïpe ki dhäk mo thööth, ki nyïïrøøe moa no olør mo thööth, ki dïëk mo thööth no olämme; ni nø cwøl wäätï bëët, ki kwääc lwaae mo leny, ka Abiethaar na näk Kwääy Lam Mana Dwøŋ; ni ennø, ge cämö ni ge mädhö nyïme, ni ge köö, ni ‹Nyeya ma Adöniya puta bëëtö na bäre bäre!›

²⁶ 'Ba këël aani na dhaanhnhï kiree en, ki Dhadök na näk Kwääy Lam Mana Dwøŋ maya, ki Benaya o Jööda, ki wäädï ma Cølöman ni wø tïny ïïni, kär cwøl Adöniya.

²⁷ ?Aŋø, ï na nyeya mara, gïn tïïya ïïni kiree, ni ba nyoothï ŋato läw karï na nyeya noo pï piny bäät wälu marï jï jø tïïc moï?»

Kanya Røøny Cølöman Na Nyeye

²⁸ Kanyøgø, aløk nyeya ma Deebit ni kööe, ni «Cwøllu Bathcïba jïra.» Køøre Bathcïba aput ö baŋ nyeya ni cuŋŋe nyïm nyeya.

²⁹ Køøre nyeya akööŋ ni kööe, ni «Ŋëët Wuuö Jwøk, Jwøa kwøw, eni na wïïl aani wøk ki yïth gïïa leth bëët,

³⁰ ka adïëri møn, kaawat mana kööŋa jïrï ki nyeŋ Wuuö Jwøk Jwø Icriel, na kööa, ni ‹Wäädï ma Cølöman läwa kara na nyeya, ni pï piny kara bäät wälu›, aani gïnögø tïïa tïïö na enøgønø dïcäŋi.»

³¹ Kanyøgønø, Bathcïba cøŋŋe akëël piny ni kuul wïïe piny nyïm nyeya ni kööe, ni «Beerra man bëët nyeya mara ma Deebit na bäre bäre!»

³² 'Ba nyeya ma Deebit aköö, ni «Cwøllu Dhadök na näk Kwääy Lam Mana Dwøŋ, ki nyikuŋ Jwøk ma Nathan, ki Benaya o Jööda jïra.» Ni put jøøgø ö nyïm nyeya.

³³ Ni kö nyeya jïge, ni «Aayu ki jø kööre 'moa, ni tïïyu wääda ma Cølöman nee cäädhe ki bäät gääŋŋö mara, ni kïthu gø piny bäät Giyön.

³⁴ 'Ba ï na Dhadök na näk Kwääy Lam Mana Dwøŋ, ki nyikuŋ Jwøk ma Nathan, wär wï gø thïïmmu ki maaw ni røønynyu gø na nyeya bäät jø Icriel, ni koothu tuuŋ ni kööu, ni ‹Nyeya ma Cølöman puta bëëtö na bäre bäre!›

³⁵ Køøre u cäädhö køøre, ni ööe ni pï piny bäät wälu mara ni läw kara na nyeya; kiper eni, ena nø tïïa na nyeya bäät jø Icriel ki jø tuuŋ Juuda bëët.»

³⁶ Kanyøgønø Benaya o Jööda ajutö jï nyeya ni kööe, ni «Kare. Beerra man ö Wuuö Jwøki, ni beeye Jwøk marï, ï na nyeya mara, ni wëëk gïnögø thur kare.

³⁷ Kaawat mana nø bëët Wuuö Jwøki ki ï na nyeya mara, beerra man ö eni ni bëëde ki Cølöman thuwø, ni tïïc nyec mar gø ni dwøŋ ni kaala nyec marï, ï na nyeya mara ma Deebit.»

³⁸ Kanyøgønø, Dhadök na näk Kwääy Lam Mana Dwøŋ, ki nyikuŋ Jwøk ma Nathan, ki Benaya o Jööda, ki jø leny mo wø koor nyeya, ni beege jø Kelita ki jø Pelita, gena ci piny kunece ni Cølöman ege tïïö ni cäädhi ka bäät gääŋŋö mar nyeya ma Deebit, ni kïthge eni bäät Giyön.

³⁹ Kanyøgø, Dhadök na näk Kwääy Lam Mana Dwøŋ, tuuŋ mana en maar röönynyi yie alwøre yo oduŋkaara mar Jwøk, ni thii maaw wï Cølöman ni røønya gø na nyeya. Køøre geni tuuŋ aputge kooth, ni ö jiyi bëët ni köge, ni «Nyeya ma Cølöman puta bëëtö na bäre bäre!»

⁴⁰ Ni ö dhaanhø bäre ni put ci køør Cølöman, ni jøw kudhö ko opele ni yïth jøw met ki met ec mo dwøŋ døc, ni ö pinynyi ni tïme ni jääŋŋi ki dööt jiy.

Kanya Räny Nyec Mar Adöniya

⁴¹ 'Ba kar kaagø, Adöniya ki jiy moa cwøle na en buute bëët gïnögø awïnyge, kanya lønyge ki cam. 'Ba kanya ö Jöapi na wïny dwør tuuŋ, ena köö, «?Aŋø, jø pääny, ge kwöŋge na enøgønø aperŋø?»

⁴² 'Ba kanya poode ni eni poot cäänö, Jönathan wär Abiethaar na näk Kwääy Lam Mana Dwøŋ aput pïï. Køøre Adöniya aköö, ni «Ööï nø, bee ï dhaanhø mana na adïëri noo käl waac mo beer.»

⁴³ 'Ba aput Jönathanni løk jï Adöniya ni kööe, ni «Jïre bäär! Nyeya marø ma Deebit, Cølöman anø tïïe na nyeya.

⁴⁴ Ni ö nyeya thuwø ni nø jääŋ Dhadök na näk Kwääy Lam Mana Dwøŋ, ki nyikuŋ Jwøk ma Nathan, ki Benaya o Jööda, ki jø wø koor nyeya, ni beege jø Kelita ki jø Pelita; ni ö geni ni nø tïïcge Cølöman nee cäädhe ki bäät gääŋŋö mar nyeya.

⁴⁵ Ni ö Dhadöki na näk Kwääy Lam Mana Dwøŋ ki nyikuŋ Jwøk ma Nathan ni nø thïïmge wï Cølöman ki maaw ni ge røønya gø na nyeya bäät Giyön, ni jøw ööi ki kunece ennø ni yïth jøw met; ni beeye ni bëët jø päänynyi ni kwöŋŋö en. Ni beeye döötge na wïnynyu enø.

⁴⁶ Køøre thuwø Cølöman anø pï piny bäät wälu mar paac bäre.

⁴⁷ Køøre thuwø, jø kööre mo nyeya gena ö kuna gwïëthge nyeya marø ma Deebit ni ge köö, ni ‹Beerra man ö Jwøki marï ni tïïc nyeŋ Cølöman nee wïnye ni kaala wïny nyeŋ marï, ni ö nyec mare ni tïme ni dwøŋ ni kaala nyec marï.› Køøre nyeya cøŋŋe akëël piny bäät pëëm mare ni pwøya Jwøk.

⁴⁸ Ni kööe, ni ‹Pwøc en jï Wuuö Jwøk, Jwø Icriel na cïpö ki wääda mo pï piny bäät wälu mara dïcäŋi ni jooda gø ki waŋa.› »

⁴⁹ Kanyøgønø, jiy moa en buut Adöniya na cwøle bëët, dëëtge aput tïmö ni kwanynyi; ni öge maal ni putge keethø.

⁵⁰ 'Ba Adöniya aput lwäyö ki Cølöman, ni ö maal ni aae ni put tuk gïn wø cïp olämme bääte mak.

⁵¹ 'Ba acaan jï Cølöman, ni købi, ni «Neenï, Adöniya alwäyö ki ï na nyeya; ni ennø, tuk gïn wø cïp olämme bääte ee maaø, ni kööe, ni ‹Beerra man kööŋ nyeya ma Cølömanni jïra dïcäŋi, ni aani na dhaanhnhe, naa ba nääe.› »

⁵² 'Ba Cølöman aköö, «Ni näk mo eni bëëdö ki bëëtö mo beer, këël jëën wïïe aciel kiree bäŋgø mo päth piny; 'ba ni näk mo da gïn mo raac mo tïïe tïïö, eni thøw.»

⁵³ Køøre nyeya ma Cølöman ajääk baŋe ki jiy, ni kälge gø wøk ki buut gïn wø cïp olämme bääte. Ni ööe ni këël cøŋŋe piny nyïm nyeya ma Cølöman, ni kö Cølömanni jïre, ni «Ci paarï.»