1 Luup Nyeye 9 - Wëël Jwøk

Luum Nyeŋ Jiy Moa Duuö ki Babiløn

¹ 'Ba jø Icriel bëët nyeŋge ogöörö ki køør dhøk uudi moge yi Wëël Luup Nyec Icriel. 'Ba jø Juuda gena mak ki tøŋ ni kïth geni yi Babiløn kiper mana tïïge ki raay dëër Jwøk.

² 'Ba jøøa kwøŋ duuö na duu yïth mïëri moge ki yïth päänye moge beege dïlämme, ki jø tuuŋ Libay, ki jiy mo wø tïïc tïïe moa therø yi Øt Jwøk, ki jø Icriel møøk.

³ 'Ba jø møøk røk jø tuuŋ Juuda, ki røk jø tuuŋ Benjamen, ki røk jø tuuŋ Ipariem, ki røk jø tuuŋ Maneeca, gena ci Jerucalem nee bëëtge yie.

^4-6 'Ba jø tuuŋ Juuda moa bëëdö Jerucalem beege dïpe abïciel ki pïërabïŋween. Ni bwödhi mar dhi øt Peereth o Juuda beeye Uthay wär Ammiyut, Ammiyut wär Ømri, Ømri wär Imeri, Imeri wär Bani. Bwödhi mar dhi øt Ceela o Juuda beeye Acaaya na näk kaa, ki wääte. Bwödhi mar dhi øt Dheera o Juuda beeye Juël.

^7-9 'Ba jø tuuŋ Benjamen moa bëëdö Jerucalem na näk nyeŋge ogöör piny ki køør dhøk uudi moge beege dïpe abïŋween ki pïërabïïc ka abïciel. Ni dïbwöthe moge bee Caallu o Meculam, Meculam wär Odawïya, Odawïya wär Acenua; ki Ibania wär Jeröam; ki Ëla wär Udhi, Udhi o Mikiri; ki Meculam o Cepathiya, Cepathiya o Raguël, Raguël wär Yebaniya. Jøøgø bëët beege wïth dhøk uudi moge.

Luum Nyeŋ Dïlämme Moa Bëëdö Jerucalem

¹⁰ 'Ba jø tuuŋ dïlämme moa bëëdö Jerucalem beege: Jidaya, ki Jöyarip, ki Jaakin,

¹¹ ka Adhariya, na en Øt Jwøki cere, na näk wär Kilkiya, Kilkiya wär Meculam, Meculam wär Dhadök, Dhadök wär Merayöt, Merayöt wär Akitöp;

¹² ka Adaya wär Jeröam, Jeröam o Pacuur, Pacuur o Malkiya; ki Maïca wär Adiel, Adiel o Jadhëra, Jadhëra o Meculam, Meculam o Mecilemith, Mecilemith wär Imër.

¹³ 'Ba dïlämme mo wïth dhøk uudi moge kwäänge beege kuma aciel ki dïpe abïriiø ki pïërabïciel, ni gena jiy mo teek ki tïïe mo wø tïïc yi Øt Jwøk.

Luum Nyeŋ Jø Tuuŋ Libay Moa Bëëdö Jerucalem

¹⁴ 'Ba jø tuuŋ Libay moa bëëdö Jerucalem beeye: Cemaya wär Acub, Acub wär Adhirikam, Adhirikam wär Acabiya, na käl dëër Mërari;

¹⁵ ki Bakbakar ki Ërëc ki Galal ki Mataniya o Mika, Mika o Dhikri, Dhikri wär Acaap;

¹⁶ ki Øbadiya o Cemaya, Cemaya o Galal, Galal wär Jeduthun; ki Berekiya wär Aca, Aca wär Elkana. Moøgø beege jøøa bëëdö yïth atude mo tuuŋ Nethöpa.

Luum Jø Wø Koor Dhi Kal Mar Øt Jwøk Moa Bëëdö Jerucalem

¹⁷ Jø wø koor dhøgi mo kal mar Øt Jwøk moa bëëdö Jerucalem beege: Calum, ka Akup, ki Thalmön, ka Akimen ki tuuŋge; 'ba Calum beeye bwödhi marge.

¹⁸ Ni tïïc marge këël dïcäŋi en, ge koora dhi kal man wø en jï løø kur tuul-cäŋ ni wø duny nyeya yi Øt Jwøk ki yie. Ni beege jøøa kwäcge kwøŋ bëëdö ni twïër mar jø tuuŋ Libay koora geni.

¹⁹ Calum beeye wär Körë, Körë beeye wär Ebiacap, Ebiacap beeye wär Köra, ni beeye Calum ki tuuŋge na käl dhi øt Köra ni wø koor dhi Øt Jwøk, kaawat mana bëët kwäcge na koorge dhi øt oduŋkaara na näk kar bëëtö mar Wuuö Jwøk.

²⁰ 'Ba kar kaaca Piniac wär Eliedhar jø wø koor dhøgi mo kal mar Øt Jwøk ena cere, ni ö Wuuö Jwøki ni bëëde ki eni.

²¹ Ni Dhekaraya wär Mecelemiya beeye eni na wara koor dhi øt oduŋkaany røømmø.

²² Jøøgø bëët beege jøøa no ojierø ki man koorge dhøgi bëët mo kal ki mo oduŋkaara, ni kwäänge beege dïpe ariiø ka apaar kurriiø, ni nyeŋge ogöör piny yi wëël nyeŋ ki køør dhøk uudi moge ki yïth atude moge; ni beeye nyeya ma Deebit ki nyïkuŋ Jwøk ma Camiel na cuum jøøgø bäät tïïc ni gena jiy mo oŋäädhö.

²³ 'Ba bee geni ki jøøa käl dëëtge ni wø koor dhøgi mo kal mar Øt Wuuö Jwøk.

²⁴ 'Ba jø wø koor dhøgi mo kal, ge ena dhøge moa na aŋween, ni beege jï løø kur tuul-cäŋ, ki jï løø kur pänh-cäŋ, ki jï løø wï-piny, ki jï løø tier-piny.

²⁵ Ni ö tuuŋge moa en yïth atude ni öge ni nywaakge tïïe moge ki geni ki nïne abïriiø ni ge wella dëëtge.

²⁶ 'Ba jø tuuŋ Libay moøgø na aŋween yøø na cuum na wïth jø koor, gena jiy mo oŋäädhö, ni thäk uudi moa therø na en deŋ Øt Jwøk ena ceŋge, ki kwör kän jammi mo Øt Jwøk.

²⁷ 'Ba geni ge bëëdö deŋ Øt Jwøk ki wäär bäre, kiper bee geni ni wø koor gø, ni japge dhøk gø ka amöölla cooth.

Luum Tïïc Mar Jø Tuuŋ Libay Møga

²⁸ 'Ba jø tuuŋ Libay møøk jap tïïc mo Øt Jwøk ocïp ceŋge, ni kwaange kwaanø kany wø kïthge ge yi øtø ki kany wø kälge ge wøk.

²⁹ 'Ba jø møøk tïïc marge beeye man gwøkge jammi moa en Øt Jwøk, ki muunni, ki køøŋ nyïïomøki, ki mädhi, ki teeŋ gïï wø jïcge ŋwääi ni met.

³⁰ 'Ba ki røk dïlämme da jiy mo tïïc marge beeye jääp teeŋ gïï wø jïcge ŋwääi ni met.

³¹ Ni ö Matitiya nyï tuuŋ Libay na näk kany Calum na käl dëër Köra ni bëëde ni bul muunni ena cere.

³² 'Ba jø wø jiiŋ muunni mo cïp bäät tharabëëta ki cäŋ jwömö cooth beege tuuŋge moa käl dëër Kät.

³³ 'Ba jø wø wär ki dudi beege jø tuuŋ Libay na näk wïth dhøk uudi moge, ni ge bëëdö thäk uudi moa therø na en deŋ Øt Jwøk, ni bäŋ tïïc mør mo tïïcge kiper mana näk ge tïïö ki wäär ki cäŋ.

³⁴ Jøøgø bëët beege wïth dhøk uudi mo jø tuuŋ Libay moa bëëdö Jerucalem, ni gena dïbwöthe mo nyeŋge ogöör piny yi Wëël Nyeŋ ki køør dhøk uudi moge.

Luum Nyeŋ Jø Tuuŋ Nyeya Ma Cøøl

³⁵ 'Ba Jïël wää Gibien bëëdö yi Gibien; ni nyeŋ cïïe beeye Maika.

³⁶ Ni nyeŋ wääde mana näk kanynye beeye Abidön; køøre ki Cuur, ki Kic, ki Baal, ki Nër, ki Nadap,

³⁷ ki Gëdör, ka Akïïö, ki Dhekaraya, ki Miklöth;

³⁸ 'ba Miklöth beeye wää Cimiam. 'Ba geni, gena bëëdö ki tuuŋge thuwø yi Jerucalem buut tuuŋge møga.

³⁹ 'Ba Nër beeye wää Kic, ni Kic beeye wää Cøøl, ni Cøøl beeye wää Jönathan ki Mëlkica ka Abinadap ki Icbaal.

⁴⁰ 'Ba Jönathan wääde beeye Merib-Baal, ni Merib-Baal beeye wää Mikiya.

⁴¹ Wäät Mikiya beege: Pithön, ki Mëlëk, ki Tarëa, ki Eeyeth.

⁴² Eeyeth beeye wää Jaara, ni Jaara beeye wää Alemeth, ka Adhemawët, ki Dhimri, ni Dhimri beeye wää Möja.

⁴³ 'Ba Möja beeye wää Binia, ni Binia wääde beeye Rëpaya, ni Rëpaya wääde beeye Eliaca, ni Eliaca wääde beeye Ajel.

⁴⁴ 'Ba Ajel jïre da wääte abïciel, ni beege Adhirikam, ki Bökru, ki Icmiel, ki Ceriya, ki Øbadiya, ka Anan. Moøgø beege wäät Ajel.