1 Luup Nyeye 21 - Wëël Jwøk

Luum Ajäla Mana Tägö Ki Ri Kwaan Jiy

¹ 'Ba Ceethan aö maal bäät jø Icriel ki man raany geni, ni tïïc Deebit nee jø Icriel kwaane.

² Køøre Deebit aput köö jï Jöap ki kwääc lwaae mo leny, ni «Cou ni kwaannu jø Icriel bëët, ki mano täge ki Bëërcïïba na en tier-piny këël mano këët Daan na en wï-piny; ni kännu ki dwøl jïra nee kwäänge ŋääa.»

³ Køøre Jöap aköö, ni «Beerra man ö Wuuö Jwøki ni meet jiyï kwöre ma dïpa ni kaala moi ni nut ii. 'Ba ennø, Awuuö, ï na nyeya mara, ?jø Icriel bëët patha jiyï? ?Aperŋø ni tïïyï riï na jöö man käl bääyö bäät jø Icriel en?»

⁴ 'Ba luum nyeya atïmö ni teek bäät Jöap. Kanyøgø Jöap aput tïŋŋö ni ci dï Icriel bäre kuna kwaan jø Icriel, ni duu Jerucalem.

⁵ Køøre kwään jiy moa kwaane bëët aput cïp jï Deebit. 'Ba kwään jø Icriel bëët mo wø këëdi ko opëëlle beege cwøw ma miilïën aciel ki kume ma dïpa. 'Ba kwään jø tuuŋ Juuda mo wø këëdi ko opëëlle gena cwøw ma kume ma dïpe aŋween ki pïërabïriiø.

⁶ 'Ba Jöap jø tuuŋ Libay ki jø tuuŋ Benjamen awii wøk ni käre kwaanø, kiper yie raac ki dwør nyeya.

⁷ 'Ba luubö manøgø mar kwaan jiy atïmö ni raac ki jï Jwøk, ni ö Jwøki ni jääl jø Icriel.

⁸ Kanyøgø, Deebit aköö jï Jwøk, ni «Aana nø bääyö døc ki køør gïna tïïa. 'Ba ennø, beerra man wëënnï raay 'moa, a na dhaanhnhï, kiper aani gïnögø atïïa ni wïïa kära caarø.»

⁹ 'Ba Wuuö Jwøk Gaat acäänne, ŋat wø car jammi jï Deebit ki køør man wø nyooth Jwøki jïre, ni kööe,

¹⁰ ni «Ci baŋ Deebit ni caanï luumma jïre, ni kööï ni man beeye dwør Wuuö Jwøk, ena köö, ni ‹Aani luup adäk cïba nyïmï, niï jëëtï ki luubö aciel rege mo tïïa tïïö dëërï.› »

¹¹ Kanyøgø Gaat aci baŋ Deebit ni kööe jïgø, ni «Man beeye dwør Wuuö Jwøk, ena köö, ni ‹Jëëtï røk luup moi:

¹² ?Beerra man ö käci paarï ki cwiiri adäk? ?Wala beerra man ö nyïïmän moï ni ŋwiecge køøru ki dwäde adäk nou rïïŋö? ?Wala beerra man ö Wuuö Jwøki ni jääŋ opëëllö mare cer nyïïatwiel maal ni raany Icriel bäre ki man kïth täw mo leth døc bäätu ki nïne adäk yi ŋöömö maru?› 'Ba ennø, cädï ni jierï gïno døøa ki gø jï Jwøk na jääŋ aani.»

¹³ Kanyøgø, Deebit aköö jï Gaat, ni «Gïïögø bëët duua bëëtö mo teek kipera. Beerra man tïma naa pätha cer Wuuö Jwøk, kiper mëër mare dwøŋ; 'ba kära tïmö naa pätha cer dhaanhø.»

¹⁴ Kanyøgø Wuuö Jwøk täw mo leth døc aput jääŋŋö bäät jø Icriel, ni thøw jø Icrielli ma kume ma pïërabïriiø.

¹⁵ 'Ba Wuuö Jwøk nyïïatwiel maal aput jääŋŋö nee Jerucalem raanynye. 'Ba kanya tïm nyïïatwiel maalli ni ena bäät man raany Jerucalem, ena joot Wuuö Jwøki, ni ö Wuuö Jwøki ni päth cwïnye kiper gïna leth na tägö dëët jiy, ni kööe jï nyïïatwiel maal manøgø man wø räänyö, ni «Manøgø rømø nø. Ennø, jook cerï nø.» 'Ba kar kaagø, nyïïatwiel maal mar Wuuö Jwøk cuŋŋö buut laara mar Örnan nyï Jeebuc.

¹⁶ 'Ba kanya ö Deebiti na tïŋ wïïe maal ni räŋŋe, nyïïatwiel maal mar Wuuö Jwøk aput joot ni cuŋŋö yïthakic maal ki piny, no opëëllö ee maa ni ee löö bäät Jerucalem. Kanyøgø, Deebit ki jø døøk Icriel, cøŋge aputge këël piny ni kuulge wïthge piny yïth ŋøøm, ni dëëtge ege runynyö ka abïïk keece ni ge nyootha pänh cwïny marge.

¹⁷ Køøre Deebit aköö jï Jwøk, «?Aŋø, patha aani na cïp dwøl ni jiy kwaan? Ka adïëri møn, bee aani na bääyö na tïïc gïn mo raac døc. ?'Ba jiy moi ni caal rööm ii, agïnaŋø na tïïcge? Wui Wuuö Jwøk, ï na Jwøk mara, beerra man tïm cerï ni ena dëëra ki jø dhi øt wära keere, ni ba jääli jiyï ki täwögø ni leth enø këët.»

Kanya Ö Deebiti Na Tïïe Ki Gïn Wø Cïp Olämme Bääte

¹⁸ 'Ba nyïïatwiel maal mar Wuuö Jwøk Gaat aköömme nee ci baŋ Deebit nee Deebit tïïe jï Wuuö Jwøk ki gïn wø cïp olämme bääte kaace yi laara mar Örnan nyï Jeebuc.

¹⁹ Køøre Deebit aput cøø ki køør dwør Gaat mana caane ki nyeŋ Wuuö Jwøk.

²⁰ 'Ba kar kaagø, Örnan bëëdö ni dïnö ki beel; 'ba na lwïthe ŋääe, nyïïatwiel maal ajoode, ni ö wääte moa na aŋween na en buute ni kange dëëtge.

²¹ 'Ba kanya ci Deebiti baŋ Örnan, Örnan alwïthö ni joot Deebit, ni put ö wøk ki yi laara ni ci baŋ gø, ni këël cøŋŋe piny nyïm gø ni kuul wïïe piny yïth ŋøøm.

²² Køøre Deebit aköö jï Örnan, ni «Wëëk laara man aani, kiper naa tïïa yie ki gïn wø cïp olämme bääte jï Wuuö Jwøk, nee cïpï jïra ki man ŋeea gø ki gäte mo rømø ki gø, kiper nee täwa leth na nø tägö ki køør ajäl Jwøk nee aae bäät jiy.»

²³ 'Ba Örnan aköö jï Deebit, ni «Kälï jïrï; wui Awuuö, ï na nyeya, beerra man tïïyï gïno manynyï ki gø. Aani thuwø a cïpö jïrï ki dhäk kiper olämi mano waaŋ bäre, ni cïba jer dïn thuwø, kiper nee tïmge na jenni mo wääŋö ki ge, ni cïpa ki beel, kiper nee tïmge ni beeye muuy mano cïpï. Aani japøgø bëët cïba cïbö.»

²⁴ 'Ba nyeya ma Deebit aköö jï Örnan, «Ba løny; japï ba käla ki wat jaak. Ŋeea ŋeeø baŋï ki gäte mo rømø ki gø. Kiper aani jammi moï ba käla jaak nee wëëga Wuuö Jwøk wala nee cïba no olämi man wø waaŋ bäre ni bäŋ gïn mo yaa coolø kiperge.»

²⁵ Kanyøgø, Deebit aput cïpö jï Örnan ki warkey ma rumme ma cekelli ma dïpe abïciel ni ŋeew laara manøgø ki ge.

²⁶ Køøre Deebit aput tïïö jï Wuuö Jwøk kaace ki gïn wø cïp olämme bääte, ni put cïpö ko olämme mo wø waaŋ bäre, ko olämme mo wø duunni ki mëër. Kanyøgø ena put lam jï Wuuö Jwøk, ni ö Wuuö Jwøki ni jääŋ maac ki maal bäät gïn wø cïp olämme bääte, ni løga lam mar Deebit ki gø.

²⁷ Køøre Wuuö Jwøk nyïïatwiel maal aput köömmö, ni ö nyïïatwiel maalli ni put opëëllö mare dwøk yi køp.

²⁸ Kar kanyøgø, kanya jootï ya Deebiti ni lam mare oduu Wuuö Jwøki ki yi laara mar Örnan nyï Jeebuc, ena put bëëte ni cïpö ko olämme kaace.

²⁹ Kiper oduŋkaara mar Wuuö Jwøk mana tïïc Modhe dï paap, ki gïn wø cïp olämme bääte mo wø waaŋ bäre, poot ena kar lam mana en bäät thuur yi Gibien kar kaaca.

³⁰ 'Ba Deebit kär løny ki man ci baŋ gø ki man pëëny Jwøk, kiper eni lwäär ko opëëllö mar nyïïatwiel maal mar Wuuö Jwøk.