1 Luup Nyeye 19 - Wëël Jwøk

Kanya Ö Deebiti Na Bööt Jø Amön Ki Jø Aram

¹ 'Ba kanya tïme na køøre cään, Naøc nyeny jø Amön athøw, ni ö wääde ma Anun ni ci kar wänni na nyeya.

² Køøre Deebit aköö, ni «Aani mëër mara ni wø ba jøøl nyoodha nyoodhø jï Anun o Naøc, kiper mana ö wänni na nyooth mëër mare ni wø ba jøøl jïra.» Kanyøgø Deebit aput jääk baŋ Anun ki jiy nee cwïny Anun cømge kiper thøø mar wänni. 'Ba kanya ö jic Deebiti na pïïcge yi ŋööm jø Amön nee cwïny gø cømge,

³ jø Amön moa kwörge døøŋŋø aköö jï nyenyge ma Anun, na «?Aŋø, ki jïrï ni Deebit wøøra wäru, na jääŋ baŋï ki jiy mo cøm cwïnyï? ?Aŋø, Deebit jiye ba jääŋŋe baŋï ni marge liew paac nee tukge yi nyïme?»

⁴ Kanyøgønø, Anun jic Deebit aput mak, ni liel jïëc tïkge, ni ö abïïe moge moa näk caala jalabiiye ni ŋøør ge ni cëëgö ni ena dhøk wödhi, ni wëëk ge wääth.

⁵ Køøre jø møøk aöö ni caange gïna tägö dëët jøøgø jï Deebit, ni put Deebiti jääk baŋge ki jiy nee ge jøli kiper laac wïc mana dwøŋ na en dëëtge, ni kööe jï jøøa jääŋŋi, ni «Caannu jïge, ni ‹Putu bëëte Jerikö këël mano tuc jïëc tïgu, køøre nø, uuno duui.› »

⁶ 'Ba kanya ö jø Amönni na jootge gø ni dëëtge ege nø tïïc ni caala gïn mo ŋwäänynye raac ki jï Deebit, geni ki nyenyge ma Anun gwet-bïrö ma rumme ma kikarri ma kuma aciel ajääŋge baŋ jø Mecöpatemia, ki baŋ jø Aram-Maika, ki baŋ jø Dhöba, nee määnyge ki jïëth leny mo wø tut okwëënyi ki jø leny mo wø cäädhi ki bäät okwëënyi.

⁷ 'Ba ki gwetøge gena jïtö ki jïëth leny ma kume ma pïëradäk ka ariiø mo wø tut okwëënyi, këël ki nyeny Maika ki jø leny moe; ni ö jøøgø ni tïïcge twïër marge nyïm Medeba. Kanyøgø ge na jø Amön gena öö ki yïth päänye moge ni cooŋge rege ni öge baŋ leny.

⁸ 'Ba kanya ö Deebiti na wïny gïnögø, eni Jöap ki jø leny moa teek bëët ajääŋŋe.

⁹ Ni ö jø Amönni ni öge wøk ni cïïmge rege kiper leny dhi kiir mar pääny marge. Ni ö nyeye moa ö kuna kunyge ni cïïmge rege kur keerge dï pwöla.

¹⁰ 'Ba kanya ö Jöapi na joot gø ni leny oløny ni ööa bääte ki nyïme ki ŋääe, ena jëëdö ki jiy moa teek røk jø leny mo Icriel, ni cïïm ge na dhøgi nee këëtge ki jø Aram.

¹¹ 'Ba jø leny moa dööŋ acïp cer coki ma Abicay, ni ö geni ni cïïmge rege na dhøgi nee këëtge ki jø Amön.

¹² Køøre Jöap aköö jï coki ma Abicay, «Ni näk mo jø Aram tïmö ni ge teek bääta, a wär kønyï; 'ba ni näk mo jø Amön tïmö ni ge teek bäätï, ï kønya kønyø.

¹³ 'Ba mak riï nø ni këëdø ni ø teek kiper jø pøø ki päänye mo Jwøk marø. Beerra man ö Wuuö Jwøki ni tïïc mana beerra eni ki jïre.»

¹⁴ Kanyøgønø, Jöap ki jø leny moe na en buute, gena ci baŋ leny ki jø Aram, ni ö jø Arammi ni bwøkge nyïme.

¹⁵ 'Ba kanya ö jø Amönni na jootge gø ni jø Aram obwøk, gena put bwøk thuwø nyïm Abicay cöök Jöapi, ni dønyge yi pääny. Køøre Jöap aput duu Jerucalem.

¹⁶ 'Ba kanya ö jø Arammi na jootge gø ni gena nø bööt jø Icrielli, gena jäägö ki jiy nee jø Aram moa en løø Naam Upareeti løøga öge, ki Cöpak na näk kwääy lwaa leny mar Adadëdher na näk bwödhi marge.

¹⁷ 'Ba kanya ö gïnögø na caani jï Deebit, jø leny mo jø Icriel bëët acooŋ kanya ciel ni aacge ni ŋutge løø Naam Jördan løøga, ni cääthge bäät jø Aram; ni cïïmge rege na dhøgi nee këëtge ki geni. 'Ba kanya ö jø leny mo Deebit na cïïmge rege ni këëtge ki jø Aram, jø Aram thuwø gena këëdö ki Deebit.

¹⁸ 'Ba jø Aram gena bwøk nyïm jø Icriel, ni ö Deebiti ni nääe ki jø Aram ma kume abïriiø mo wø këëdi ki bäät jïëthe mo wø tut okwëënyi, ki jø leny ma kume ma pïëraŋween mo wø këëdi ki piny. Ni 'näkge Cöpak na näk kwääy lwaa leny.

¹⁹ 'Ba kanya jooti jic Adadëdher ni geno bööt jø Icrielli, gena tudö ki luubö nee bëëtge ki bëët mëër ki Deebit ni bëënge gø. 'Ba ki mana täge kar kaaca, jø Aram gena put kweer ki man kønyge jø Amön këët.