1 Luup Nyeye 18 - Wëël Jwøk

Luum Wïth Juurre Moa Bööt Deebiti

¹ 'Ba kanya tïme na køøre cään, Deebit akëëdö ki jø Pilitin ni dwøk wïthge piny, ni mac päänya cwøl ni Gëth ceŋ jø Pilitin ki mïëri moe moa en buute.

² Køøre eni jø Möap abööte thuwø, ni put jø Möapi tïmö ni ge bëënna Deebit ni ge cïpö ka ajwäk jï gø.

³ Ni ö Deebiti thuwø ni bööt Adadëdher nyeny Dhöba ki leny deŋ kanya cwøl na Amath, kanya aae ni cøøa kuna cäŋ nyec mare dwøk kare bäät Naam Upareeti;

⁴ ni ö Deebiti ni mak jïëth leny ma kuma aciel mo wø tut okwëënyi cer nyeya ma Adadëdher, ki jø leny ma kume abïriiø mo wø cäädhi ki bäät okwëënyi, ki jø leny ma kume ma pïërariiø mo wø cäädhi ki tietge. Ni ö Deebiti ni ŋøør ojwönyi mo tiet okwëënyi bëët mo wø tut jïëthe. 'Ba møøk mo orømø awiie kiper jïëth leny ma dïpa.

⁵ 'Ba kanya ö jø Aram moa en Damacka na öge kuna kønyge Adadëdher nyeny Dhöba, Deebit anääö ki jø Aram ma kume ma pïërariiø kurriiø.

⁶ Kanyøgø, Deebit aput cïp piny ki jø leny mo koor mïëc jø Aram moa en tier Damacka, ni ö jø Arammi ni putge tïmö ni ge bëënna Deebit ni ge cïpö ka ajwäk jïre. 'Ba Deebit kany wø tuge yie jaak, Wuuö Jwøk puta bëëte ni køønynya gø.

⁷ 'Ba Deebit kööde mo leny moa käär jø lenynyi mo Adadëdher na näk otïïö ki warkey aput lwør ni käl ge yi Jerucalem.

⁸ 'Ba ki yi pääny man wø cwøl ni Tibath ki man wø cwøl ni Kun moa näk mo Adadëdher, Deebit akädö yïthge ki nywïëny ma jwëëlli mo thööth døc. Ni beege japa ö Cølömanni ni tïïc jap Øt Jwøk Mana Dwøŋ ki ge, ni bee gïr pïï mana dwøŋ, ki gïïa näk caala dïkweeye, ki jap paac.

⁹ 'Ba kanya ö Töu nyeny jø Amath na wïny gø ni Deebit jø leny mo Adadëdher bëët ee nø böötö,

¹⁰ Töu wääde ma Adöram aput jääŋŋö baŋ nyeya ma Deebit nee määdhe mare ki gwïëth mare caan jï Deebit, kiper mana ö Deebiti na këëde ka Adadëdher ni bööt gø; kiper Adadëdher bëëdö ni këëdö ki Töu. 'Ba Adöram o Töu aay ni käädö jï Deebit ki gïï mo tïïc ka warkey, ki gwel-bïrö, ki nywïënyö ma jwïël.

¹¹ 'Ba Deebit gïïögø aput cïp kur keerge jï Wuuö Jwøk, ni dwal ge bäät warkie ki gwet-bïrö moa näk ee kälö baŋ wïth juurre bëët, ni beege jø Ëdöm, ki jø Möap, ki jø Amön, ki jø Pilitin, ki jø Amalëk.

¹² 'Ba Abicay o Dheruya jø Ëdöm ma kume apaar ka abära anääe yi Goor Acäbö;

¹³ ni put dï Ëdöm kïthö ki jø leny mo koor, ni ö jø Ëdömmi bëët ni putge tïmö ni ge bëënna Deebit. 'Ba Deebit kany wø tuge yie jaak Wuuö Jwøk puta bëëte ni køønynya gø.

Luum Jic Deebit Moa Kwörge Døøŋŋø

¹⁴ Køøre Deebit aput bëëdö na nyeya mar jø Icriel bëët, ni luup ŋøle na karge, ni bëëde ni tïïya adïëri jï jiye bëët.

¹⁵ 'Ba Jöap o Dheruya beeye kwääy lwaa leny, ni ö Jøcapati wär Akilut ni bëëde na nyikugö.

¹⁶ 'Ba Dhadök wär Akitöp ka Ayemëlëk wär Abiethaar beege dïlämme moa døøŋŋø, ni ö Cabca ni bëëde ni beeye ŋat wø göör luup akwöma piny.

¹⁷ 'Ba Benaya o Jööda beeye kwääy lwaak mar jø leny mo wø koor nyeya, ni beege jø Kelita ki jø Pelita. 'Ba wäät Deebit beege jøøa kwörge døøŋŋø na en buut nyeya.