1 Luup Nyeye 14 - Wëël Jwøk

Luum Geer Øt Deebit

¹ 'Ba Kiram nyeny Tayar ajääk baŋ Deebit ki jiy ni ge käädö ki jer øtø moa perge leth, ki jø wø gëëdö ki kïte, ki jiy ma dïjëëth opämi, kiper nee gëëtge ki øtø jï Deebit.

² 'Ba aput Deebiti ŋäc ni beeye Wuuö Jwøk na këël tier nyec mare piny, nee put bëëte na nyeya mar jø Icriel; ni ŋäc gø thuwø ni beeye Wuuö Jwøk na tïŋ nyec mare maal kiper jiye ma jø Icriel.

³ Køøre Deebit aput nyöömö ki mään møøk yi Jerucalem, ni put jïtö ki wääte ki nyïïe møøk.

⁴ 'Ba nyeŋ obwöre moe moa nywøle kanya en Jerucalem beege Cimia, ki Cöbap, ki Nathan, ki Cølöman,

⁵ ki Ibar, ki Elicua, ki Elpelet,

⁶ ki Nöga, ki Napëk, ki Japia,

⁷ ki Elicama, ki Beeliada, ki Elipelet.

Kanya Ö Deebiti Na Bööt Jø Pilitin

⁸ 'Ba kanya wïnynyi ya jø Pilitinni ni Deebit onø røøny na nyeya mar jø Icriel, jø leny mo jø Pilitin bëët atïŋŋö ni cige kuna määnyge baŋ Deebit; 'ba gïnögø awïny Deebiti ni ci wøk baŋge.

⁹ 'Ba jø leny mo jø Pilitin apïï ni putge goor Rapayim tuk.

¹⁰ Kanyøgø Deebit Jwøk apëënynye, ni kööe, ni «?Løny man cøøa baŋ leny baŋ jø Pilitin? ?A ni näk mo aano ci baŋge, ge cïbï cera?» 'Ba Wuuö Jwøk aköö jï Deebit, ni «Ciï; ge cïba cerï.»

¹¹ Kanyøgø, gena put ci kanya cakge ni Baal-Peradhim, ni ö Deebiti ni put jø Pilitin böötö kaace; ni kööe, ni «Wuuö Jwøk nyïïmän 'moa abööte ki raa ni caala pänh jwïëö kany wø räänye.» Kiper manøgønø, nyeŋ kaace aputge cak ni Baal-Peradhim.

¹² 'Ba jø Pilitin juu moge mo wø lamge adööŋ piny kaace; ni ö Deebiti ni cïpe ki dwøl nee juu mo jø Pilitin waaŋ; ni puti waaŋ ki maac.

¹³ 'Ba jø leny mo jø Pilitin acäŋ duuö ni cäŋge gool manøgø tugö.

¹⁴ 'Ba Deebit Jwøk acäŋ pëënynyö, ni kö Jwøki jïre, «Ï ba doo cøøa baŋge ni tiir jaak; 'ba ge diï ŋøønya piny ni cääthï bäätge kanya enge yie deŋ lul.

¹⁵ 'Ba kanyo tïme ni da dwøl mo caala tiet jø leny mo wïnynyï wïnynyö ki bäät lul, ï doo puta døny wøk baŋ leny; kiper nyootha gø ni Jwøk onø ci nyïmmu ki man këëde ki jø leny mo jø Pilitin.»

¹⁶ Køøre gïnögø aput Deebiti tïïc na kare, kaawat mana ö Wuuö Jwøki na kööm eni, ni putge jø leny mo jø Pilitin 'näk ki mana täge ki Gibien këël mana këët Gëdher.

¹⁷ 'Ba gïr Deebit awïnyö tiet mïëri bëët; ni ö Wuuö Jwøki ni käl lwär mo dwøŋ bäät wïth juurre bëët ni ge lwäära Deebit.