1 Körin 8 - Wëël Jwøk

Luum Olämme mo Wø Ŋaal Ni Wø Cïp Jï Gïï Wø Lam

¹ 'Ba kawaane mar luum olämme mo wø ŋaal ni wø cïp jï gïï wø lam, ŋääø bëët ni tiet jammi yøø kwanyø. 'Ba gïn wø kwany dhaanhe wø käla atöör, 'ba mëër beeye wø wëëk jiy tëënnö.

² 'Ba nee da ŋat mo wïïe ee caarø ni da gïn mo ŋääe, eni poot bäŋ gïn mo ŋääe keda mana dee gø ŋääö.

³ 'Ba ni näk dhaanhø mëër ka Jwøk, eni ŋäc Jwøki.

⁴ Kiper manøgønø, mar luum olämme mo wø ŋaal ni wø cïp jï gïï wø lam ni wø cam, ŋääø ni gïn wø lam patha gïn ma adïëri pinyi en, ni bäŋ Jwøk mør, 'ba beeye aciel keere.

⁵ 'Ba këël na dee gïï mo cøøri ni juu maal ki piny, kaawat man bëëde en ni juu thööth ki kwääri bëët,

⁶ ki jïïø, beeye Jwøk aciel keere, na näk Wuuö, eni na ö jammi bëët ki baŋe, ni beeye eni ni bëënnø en, ki kwäärö aciel ma Jecu Krictø, ŋata ö jammi bëët ki køøre, ni poot na eni ni tïmø ni ø nut en ki køøre.

⁷ 'Ba paa jiy bëët ni gïnögø ege nø kwany. 'Ba jø møøk kiper mana näk geno ŋïyö ki gïï wø lam, ge wø poot cämö ni camge no olämme mo ocïbö jï gïn wø lam. Ni räny leec cwïny marge kiper na thiinh ŋäädhe marge.

⁸ 'Ba gïï wø camø ø ba wëëk kïth baŋ Jwøk. Ni näk mo ø cämö, bäŋ gïn mo bëënynyi, 'ba ni näk mo ø ba cämö, bäŋ gïn mo raanynye thuwø.

⁹ 'Ba beeye gïn en keere, beerra man gwøgu rou, nee pät maru ba tïme na gïn wø ö jøøa näk ŋäädhe marge poot thiinh ni cwanyge tietge ki gø.

¹⁰ ?Kiper ni näk da ŋat mo joota ïïni, ï na näk tier gïnögø iï kwanyø, niï cämö yi øt gïï wø lam, ni näk eni ŋäädhe mare poot thiinh, aŋø, eni cwïnye ba mïnni ki man cam olämme mo wø ŋaal ni wø cïp jï gïï wø lam?

¹¹ 'Ba køøre, eni na cöögu na ŋäädhe mare thiinh enø aränynyö ki køør gïna kwanyï, eni na thøw Krictø kipere.

¹² Ni tïmu nou tïïya raay dëër Krictø, kiper mana tïme nou tïïya raay dëët nyïïmëëgu, ni raanynyu cwïnyge, kany wø pootge ni ŋäädhe marge thiinh.

¹³ Kiper manøgønø, ni näk beeye cam rïŋö wø wëëk coka pädhö, a ba doo cämö ki rïŋö na bäre bäre, kiper ni näk maa cämö, kanymør coka wëëga pädhö.