1 Körin 7 - Wëël Jwøk

Luum Nywöm

¹ 'Ba kiper luupa göönnu baŋa kiperge, doo beer ki man ö dhaanhe ni ba gut dhaagø.

² 'Ba kiper läm cwïny ki man ci dhaanhe baŋ käp, ŋati man nø beerra man jïte ki cïïe, ni ö dhaaŋŋi nø ni jïte ki cwøre.

³ Ni ö dïcwøø ni wëëk dëëre cïïe, ni ö dhaagø thuwø ni wëëk dëëre cwøre.

⁴ Kiper dhaagø bäŋ wø bëën dëëre keere, 'ba bëënna cwøre. Ni dïcwøø thuwø bäŋ wø bëën dëëre keere, 'ba bëënna cïïe.

⁵ Käru kweeyø ki dëëtu. 'Ba kanymør ni näk mou jïëy karuriet ki man mänu dëëtu dïciel kiper nou lämu døc, doo beer. 'Ba noo näk køøre, cäŋu dwätö, kiper nee Ceethan cwïnynyu ba wëëk lämmö ki køør mano ba lønye jïïu ki man mänu dëëtu.

⁶ 'Ba luummögø caana naa nyutha uuni jöö, naa ba cem gø ni tïïyu.

⁷ 'Ba para ni jiy bëët onää caala aani. 'Ba atïmö ni ŋati man nø jïre da muuy mo owëëk Jwøki eni, ni ŋati man nø ki teeŋ mare.

⁸ 'Ba mar jøøa näk kär nyöömmö, ki määr thuunhnhi, aana köö ni ge doo bëëdö keerge kaawat mara.

⁹ 'Ba ni näk ba løny jïge ki man mänge dëëtge, ge doo nyöömmö. Kiper doo beerra eni ki man nyööm dhaanhe ki man bëëde ni cwïnye lïëth ki ciin køør mään.

¹⁰ 'Ba a köömma jøøa näk onyöömmö, ni paa aani, 'ba beeye Wuuö, ni dhaagø kär pääö ki cwøre.

¹¹ 'Ba ni näk eno pääö, wär bëëde keere, wala eni doo døøa baŋ cwøre. Ni ö dïcwøø ni ba kwier cïïe.

¹² 'Ba mar jø møga, aana köö, ni ni näk da cöögö mo jïre da dhaagø mo patha ojïëy, ni dhaaŋŋøgø yie met ki man bëëde ki eni, dhaaŋŋøgø ba dee kwierø. 'Ba luummögø caana aani, ni paa dwør Wuuö.

¹³ 'Ba ni näk da dhaagø mo jïre da dïcwøø mo patha ojïëy, ni dïcwøønnøgø yie met ki man bëëtge ki eni, dhaaŋŋøgø dïcwøønnøgø ba dee kwierø.

¹⁴ Kiper dïcwønna näk patha ojïëy, ocïp kur keere na mar Jwøk ki køør cïïe. Ni ö dhaaŋŋa näk patha ojïëy ni cïbi kur keere na mar Jwøk ki køør cwøre. Onää patha enønø, nyïïu doo tïmö ni ba waany, 'ba kawaane gena tïmö ni ge ena kur keerge na mo Jwøk.

¹⁵ 'Ba ŋat mo kär jïëy, ni näk manynya apääk, wär cøøe. Ki yi luubö ma enøgønø, cöögø ma dïcwøø wala ma dhaagø patha omaa ree. Kiper øøna cööl Jwøki bëët-mëër.

¹⁶ ?A ï na dhaagø, ŋäyï gø nidïï, ni cwørï ba piemï? ?A ï na dïcwøø, ŋäyï gø nidïï, ni cïïï ba piemï?

Luum Bëëtö Mana Cïp Kwäärö

¹⁷ 'Ba mana beerra eni keere, ŋati man nø wär bëëde kare kaawat mana cïp Wuue jïre, ki waŋjööra cwøli ya Jwøki ki gø. Manøgø beeye dwøl mara man wø caana jï acook Jwøk bëët.

¹⁸ Ni näk da ŋat mo ocwølø ni eno nø daŋ, wär ŋatøgø bëëde ni ba many man cäŋ dëëre tïïyö ni patha odaŋø. 'Ba ni näk da dhaanhø mo ocwølø ni eni patha odaŋø, wär ŋatøgø bëëde ni ba many daŋ këët.

¹⁹ Kiper daŋ wala bäŋ daŋ bäŋ gïn tïïcge, 'ba beeye gwøk luup moa cem Jwøki keerge.

²⁰ 'Ba ŋati man nø doo bëëdö kare kaawat mana cwøli.

²¹ ?Aŋø, kanya cwøl ïïni, ïïna laŋŋø na bëëde? Kär lääŋŋï. 'Ba nee løny jïrï ki man wïïlï dëërï wøk, wär dëërï pätï.

²² Kiper eni na cwøl Wuue ni ena laŋŋø na bëëde, ena tïmö na dhaanhø mo opät Wuue. Kaawat manøgø thuwø, ŋata cwøl na näk bëëdö ka wïïe na bëëde, ena tïmö na laŋ Krictø.

²³ 'Ba uuni, u ŋeew ka gïn mo pere leth. Käru tïmö ni uuna laak jiy.

²⁴ Kiper manøgønø, nyïïmera, wär ŋati man nø bëëde nyïm Jwøk ki bëëtö mana bëëde ki gø kanya cwøli.

Luum Ŋat Mo Kär Nyöömmö

²⁵ 'Ba kawaane mar jøøa näk kär nyöömmö, bäŋ gïn mo okøp Wuue jïra. 'Ba a caana mara ni aana dhaanhø mo maar ka ŋääth ki køør met yi Wuuö.

²⁶ Ni yaa caarø ni doo beer ki man bëët dhaanhe ki bëëte na beede, kiper nïr gïïa leth na nø tägö.

²⁷ ?Ïïni, jïrï da dhaagø? Kär niï caya apääk. ?Ï bëëdö ni bäŋ dhaagø jïrï? Kär ni caya nywöm.

²⁸ 'Ba ni näk miï nyöömmö, marï paa bääyö. 'Ba ni näk mo nyakøø di nywømø, mare paa bääyö. 'Ba jø wø nyöömmi wø poot jïtö ki luup mo teek yi pinyi en, naa doo naa manynya man mäna gïïö ni leth yøø ki uuni.

²⁹ 'Ba nyïïmera, tier mana caana beeye ni kanya wäŋŋi kare acäännö døc. Kiper manøgønø, wär jøøgø ni jïge da mään yøø, bëëtge kede jïge bäŋgø.

³⁰ Ni ö jøø ni kïmmi yøø, ni bëëtge kede ge ba kïmmi. Ni ö jøø yïthge met yøø, ni bëëtge kede yïthge ba met. Ni ö jøø ni wø ŋëëö ki jammi yøø, ni bëëtge kede paa moge.

³¹ Ni ö jø wø ceŋge da tïïe pinyi en, ni bëëtge kede karge bäär ki gø. Kiper pinyi en aløny ni manynya ränynyö.

³² A manynya uuni nou bëëdö ni bäŋ gïï mo lääŋŋu ki cwïnynyu. Ŋat mo kär nyöömmö lääŋŋa gïï Wuuö, ki man tïïc gïï wø met yi Wuuö ki geni.

³³ 'Ba ŋat mo onyöömmö, wø lääŋŋa gïï pinyi en, ki man tïïc gïï wø met yi cïïe ki ge,

³⁴ ni cwïnye ee pääŋŋö. 'Ba nee dhaagø mo kär nywømø wala nyakøø, eni wø lääŋŋa gïï Wuuö, ki man cïp dëëre ki cwïnye kur keere na mar Jwøk. 'Ba dhaagø mo onywømø, wø lääŋŋa jap pinyi en, ki man tïïc gïï wø met yi cwøre ki ge.

³⁵ 'Ba manøgø caana naa kønya uuni, naa ba cem uuni. 'Ba a nyutha u jöö mo beer, kiper nee røgu cïpu jï Wuuö na bäre bäre.

³⁶ 'Ba ni näk da dhaanhø mo wïïe ee caarø ni gïna tïïe paa gïna beer na dee tïïö jï nyakøønna dee nywømø, ni cwïnye caya gø døc, ni ba maar wec, mana manynye wär tïïe. Mare paa bääyö. Wär rege nywømge.

³⁷ 'Ba ŋat wäro mak cwïnye døøc, ni eni kär maa ki teek, ni cwïnye ee mänö ki gïïa dee cayø, ni ee nø cooŋ ki cwïnye, ni mare mëër ki nyaanøgø kaamar dhaanhø ki coki, mare doo beer.

³⁸ Kiper manøgø ŋat wø nywøm nyaana mëëre ki gø, mare beer. Ni ŋat wø kwier nywöm, mare beerra eni.

³⁹ 'Ba dhaagø wø bëënna cwøre kany wø poot cwøre ni kwøw. 'Ba ni näk mo cwøre othøw, ni dhaagø yie met ki man nywømi, eni doo nywøm ŋata manynye. 'Ba eni doo nywøma dïcwøø mo ena ri Wuuö.

⁴⁰ 'Ba ki mana caara, yie doo meta eni ki mana dee bëëdö keere ni ba nywøm këët. Ni yaa caarø ni Jwïëc Jwøk ena bääta.