1 Körin 6 - Wëël Jwøk

Ciin Jø Krictø Baŋ Løøk

¹ ?Kany wø näk da dhaanhø dïïu mo jïre da luubö ki coki, aŋø wø ci baŋ løøk nyïm jøøa kuc luum Jwøk ni kaal jø Jwøk?

² ?Aŋø, kuyu ni jø Jwøk beege noo ŋøl luum pinyi? ?'Ba ni näk luum pinyi beeye uuni noo ŋøl gø piny, aŋø, u doo dhällö ki man ŋøllu luup moi ni thenh thenh ii piny?

³ ?Kuyu ni beeye øøni noo ŋøl luup nyïïatwiet maal piny? ?Aŋø nø, ni ba ŋølø luup bëët pinyi en?

⁴ ?'Ba ni näk jïïu da løøe ma yøøgønø, aŋø ni peedhu ge nyïm jøøa näk otaak acook Jwøki?

⁵ Manøgø caana naa lääa wïthu. ?Aŋø, doo bäŋ dhaanhø aciel dïïu bäre mo wïïe leer ki man ŋøl luum wø tägi yïthakic nyïïmëëe moa näk jø Jwøk?

⁶ 'Ba atïmö ni cöögö löö ka coki, ni løøa nyïm jøøa näk patha ojïëy.

⁷ 'Ba ki man dee løøe yïthakiyu keeru beeye ränynyö maru. ?Aŋø ni ba jïëyu gïn wø baac dëëtu, ni jïëyu man møt uuni?

⁸ 'Ba uuni ki dëëtu, u wø bääö, ni räänyu, këël dëët nyïïmëëgu kiree.

⁹ ?Aŋø, kuyu ni jø wø tïïc gïïa reyø, buc Jwøk ba doo maara ci jïge? Käru cøøgi. Bäŋ kääpe, wala jiy mo lama jwøk mør, wala jø lugi, wala cwøw wø døø røkge ki niine,

¹⁰ wala kuuwe, wala jø wärö, wala jø meeye, wala jø ajaany, wala dïtwïët jiy, mo ci buc Jwøki jïge.

¹¹ 'Ba teeŋ bëëtö manøgø beeye bëët jø møøk dïïu na poode. 'Ba uuna lwøk, ni cïp uuni kur keeru, ni uuno jïëö ni maru beer ki nyeŋ Kwäärö ma Jecu Krictø, ki ri Jwïëc Jwøø.

Jiemmu Jwøk Ki Rïŋ Dëëtu

¹² Jammi bëët daa maara tïïc, 'ba jammi bäŋ wø kunyö bëët. Jammi bëët daa maara tïïc, 'ba a ba many man tïma ni aana laŋŋø jï gïrpiny.

¹³ Kwön atïïc kiper ec, ni ö eci ni tïïi kiper kwön. 'Ba gïïögø geno raany Jwøki karge riet. 'Ba dëël kär cwäny käp, 'ba cwääc kaper Kwäärö. Ni ö dëëlli ni bëën Kwäärö.

¹⁴ 'Ba Jwøk Kwäärö atïŋ maal, ni øøno tïŋ maal thuwø ki teege.

¹⁵ ?Aŋø, kuyu ni dëëtu beeye thäk dëër Krictø? ?Kiper manøgønø, thäk dëër Krictø daa kälö ni døøya ge thäk dëër kääbi? Ba doo løny.

¹⁶ ?Kuyu ni ŋat wø dwal dëëre ki kääbi wø tïmö na dëël aciel ki eni? Kiper ogöörö, ni «Geni na näk ariiø otïmö na dëël aciel.»

¹⁷ 'Ba ŋat mo odwätö ki Kwäärö wø tïmö na jwïëy aciel ki eni.

¹⁸ Bëëdu ni karu bäär ki käp. Kiper raay møga bëët mo wø baac dhaanhe ba en ri rïŋ dëël, 'ba ŋat ma kääbi wø raanynya rïŋ dëëre kiree.

¹⁹ ?Aŋø, kuyu ni rïŋ dëëtu beeye øt Jwøk mar Jwïëc Jwøk na en kur keere ni en cwïnynyu, na jootu baŋ Jwøk? Uuni, u ba bëëdö ka wïthu,

²⁰ kiper u ŋeew ka gïn mo pere leth. Kiper manøgønø, jiemmu Jwøk ki rïŋ dëëtu.