1 Körin 4 - Wëël Jwøk

Tïï Nyïïatwieli

¹ 'Ba man en beeye mana doo caar dhaanhe kiperwa, ni waana jø wø tïny Krictø, na näk jøøa wëëk tïïe mo Jwøk na näk ee kwøŋ kan.

² 'Ba jø wø wëëk tïïc, manynya jiy mo oŋäädhö.

³ 'Ba ki jïra nëëni keda gïn mo thiinh døc ni näk beeye uuni noo ŋøl mara piny wala jø møøk noo ŋøl mara piny. 'Ba këël aani ki dëëra, mara ba daa ŋøla piny.

⁴ Bäŋ gïn mo ŋääa mo obøth mo raa daa jäälö kipere, 'ba gïnögø a käre ŋunnö, 'ba beeye Wuuö noo ŋøl mara piny.

⁵ Kiper manøgønø, käru ŋut piny ni kanya wäŋŋi poodi, ni Kwäärö poot kär öö, ŋato wëëk jammi nëënne, moø no okanø yi muudhö yøø, ni nyooth tiet luup moa en cwïny jiy. 'Ba kanyøgø jiy bëët ojïti ki pwøc mano wëëk Jwøki geni.

⁶ 'Ba nyïïmera, moøgø bëët akïtha bäätwa ka Apøla kiper nou bëënynyu, nou kwänynyu ki køørwa ki man bëëdu ki køør luup moa en yi wëël Jwøk, nee bäŋe dhaanhø dïïu mo töödö ni jiema dhaanhø mør ni jøøŋ maya.

⁷ ?Kiper aŋa wø neen uuni nou patha aciel ki jø møga? ?Agïnaŋø ni en jïïu ni ba cïpa Jwøki? ?'Ba ni näk mo cïpa jïïu, aŋø ni töödu keda gïn mo ba cïpa jïïu en?

⁸ Uuni, uuna nø jäŋ, ni nø kwärru, ni tïmu ni uuna nyeye ni karu bäär ki waani. 'Ba tïmu nø ni uuna nyeye, nee wa tïmwa ni waana nyeye ki uuni na aciel.

⁹ Kiper yaa caarø ni Jwøk waani na nyïïatwieli, waana nyoodhe ni canna waani dï jiy bëët, ni wa caala jiy mo okööp thøø. Kiper waana tïmö na gïï mo di neet nyïïatwiet maalli neetø ki jiy bëët dï piny.

¹⁰ Waana bøøre kiper nyeŋ Krictø, 'ba uuni, wïthu leer ki kur Krictø. Wa jääk, 'ba u teek. Uuno wøørø, 'ba waano taaø.

¹¹ Këël kawaane en, rewa da käc ki riew, ni wa cäädhi ka nywate, ni wa di pöötö, ni jïwa bäŋ mïëri,

¹² ni wa tïïö ka tïï öölö ki ceŋwa keerwa. Ni kany wø jany wa, wa dwøga gwïëth. Ni kany wø caan wa, wø jïënywa jïënyö.

¹³ Ni kany wø wac nyeŋwa, wa wø dwøga luup mo met. 'Ba waana tïmö kaamar juu mo wø wet jiyi bäät piny, na cït jammi bëët mo wø weti, ni beeye bëëtwa eni ennø.

¹⁴ Gïn ba gööra naa lääa wïthu ki gø, 'ba a nyuunhnha uuni ni uuna nyïïa na mëëra ki ge.

¹⁵ Kiper këël na näk jïïu da dïnyuuthe mo ba nøk ki kur Krictø, jïïu bäŋ wëëe mo thööth. Kiper aana tïmö ni aana wääu ki kur Krictø Jecu ki køør luumma nyään na met.

¹⁶ Kiper manøgønø, a köömma uuni ki man ŋwaallu mara.

¹⁷ Ni beeye na jääŋŋa Timöthi baŋu, na mëëra ki gø, na nyilaal mo oŋäädhö døc ki ri Wuuö, nee wïthu cäŋ parrø ki jöör bëëtö mara na en ri Krictø, kaawat man wø pööa ki gø yïth mïëri bëët ki yïth acook Jwøk bëët.

¹⁸ 'Ba jø møøk wïthge owïl keda a ba duu baŋu.

¹⁹ 'Ba aano laar ö baŋu noo kö Wuue. 'Ba no ööa, teek mar jøøgø na näk jø atöör yøø jooda joodø, ni paa cäänö marge keere.

²⁰ Kiper buc Jwøk bäŋ wø bëën cäänö jaak, 'ba bëënna teek.

²¹ ?Agïnaŋø nø ni manynyu? ?Ööa baŋu ka athøra, wala ööa ki mëër naa mwöl?