1 Körin 3 - Wëël Jwøk

Pwöc Kiper Apääk Mana Tägö Ya Acooŋ Jwøk

¹ 'Ba nyïïmera, kär løny jïra ki man cäänna uuni kede uuna jiy mo cwïnyge ena køør Jwøk, 'ba uuna cäänna ni uuna jiy mo cwïnyge ena køør mo dëël, nou therø dëër Krictø.

² Ni caama uuni ki caak, ni paa kwön mo teek, kiper na poodu ni ba løny jïïu, këël man poodu kawaane ni poot ba løny jïïu en.

³ Kiper cwïnynyu poot ena køør mo dëël, kiper kanyo poode nou këëö ni dïïu da pïëm, ?aŋø, cwïnynyu ba poot en køør mo dëël, nou bëëdö nou caala jiy møga jaak?

⁴ ?Kiper kany wø kö dhaanhe mørri dïïu, ni «Aana dhaanh Pøøl,» ni kö maya, ni «Aana dhaanh Apøla,» manøgø ba nyooth gø ni uuna jiy jaak?

⁵ ?Aŋø, Apøla aŋa? ?Ni Pøøl aŋa? Waana jø tïïc ni beege jøøa jïëyu ni ŋäädhu ki køørge, kaawat mana ö Wuue na pääŋ tïïe jï ŋati man nø.

⁶ Beeye aani na pïïdhö, ni ö Apøla ni jwëën tietge ki pïï, 'ba beeye Jwøk na wëëk ge pïth.

⁷ Kiper manøgønø, bäŋ ŋat wø pïïdhö wala ŋat wø jwïëk pïï mo pere leth, 'ba beeye Jwøk keere ni wø wëëk ge pïth.

⁸ Kiper ŋat wø pïïdhö ki ŋat wø jwïëk pïï, ge röömi bëët. Ni ŋati man nø jape ojoode kaawat mana tïïe.

⁹ Kiper waana jø tïïc bëët na aciel jï Jwøk, ni nägu pwöth Jwøk, ni uuna øtø mar Jwøk.

¹⁰ 'Ba ki køør met yi Jwøk na wëëk aani, tier øtø acaaa keda man wø tïïc kwääc geerri mo ŋäc geer døøc, ni ö dhaanhe maya ni gëët bäät gø. 'Ba ŋati man wïïe wär caare ki geer man gëët bääte nidïï.

¹¹ Kiper bäŋ tier øtø mør mo doo cak dhaanhe, ni näk paa manøce no onø cak en na näk beeye Jecu Krictø.

¹² 'Ba ni näk da ŋat mo gëëta bäät tier ødøgø, ni gëëdö ka warkey, wala gwet-bïrö, wala nyeŋ kïte mo perge leth, wala jenni, wala luum, wala thieŋ,

¹³ ŋati man nø tïïe onyooth. Kiper onyooth dïcäŋöca, kiper geno jier ki maac, ni ö maaci ni pääny ge ki man näk teeŋ tïïe mo nyïëdi na tïïc ŋati man nø.

¹⁴ 'Ba ni näk tïïe moa tïïc dhaanhe na gëët bäät tier ødøgø dööŋ ni kär waaŋ, mano mëëk eni oci jïre.

¹⁵ 'Ba ni näk tïïe moa tïïc dhaanhe waaŋ, eno cänni, 'ba eni ki dëëre opiem, 'ba otïmö keda dhaanhø mo käl wøk ka yi maac ni piemi.

¹⁶ ?Aŋø, kuyu ni uuna øtø mar Jwøk, ni Jwïëc Jwøk wø bëëdö dëëtu?

¹⁷ 'Ba ni näk da ŋat mo raanynya øtø mar Jwøk, eno raany Jwøki. Kiper øtø mar Jwøk ena kur keere, ni ødøgø beeye uuni.

¹⁸ Kär dee ŋat mo cøøk ree keere. 'Ba ni näk da dhaanhø dïïu mo dëëre ee caarø ni wïïe leer pinyi en, wär eni tïme kaamar bøøl, nee wïïe tïme ni leer na adïëri.

¹⁹ Kiper leec wïc mar pinyi en beeye gïr bøøl ki jï Jwøk. Kiper ogöörö, ni «Eni jø wø ŋääth leec wïc marge keerge wø wëëge mak ka abïëp riek waŋ marge.»

²⁰ Ni cäŋi caannø, ni «Wuuö Jwøk acaac jøøa wïthge leer ŋääe, ni bäŋ gïn duuge.»

²¹ Kiper manøgønø, kär dee ŋat töödö kiper jiy. Kiper jammi bëët mou,

²² nee Pøøl, wala Apøla, wala Ciipa, wala piny, wala kwøw, wala thøø, wala bëëti en, wala mano en nyïm, gïïögø bëët mou.

²³ Ni uuna mo Krictø, ni ö Krictø ni näk mar Jwøk.