1 Körin 13 - Wëël Jwøk

Pwöc Kiper Mëër

¹ 'Ba ni näk maa cäänö ka dhøk jiy wala ki mo nyïïatwiet maal, ni jïra bäŋ mëër, a caala gïn mo darri jaak, wala okööt mo di pöötö.

² 'Ba ni näk mo jïra da muuy mar køp dwør Jwøk, ni gïïa näk tietge okwøŋ kan bëët yaa kwanyø, ni jammi bëët ŋääa, ni jïra da ŋäädhe mo päl døc mo løny ki man daaa kïte ki gø, 'ba jïra bäŋ mëër, bäŋ gïn duua.

³ 'Ba ni näk japa bëët yaa muuö, ni wëëga dëëra waaŋ, 'ba jïra bäŋ mëër, bäŋ gïn jooda.

⁴ Mëër kunyö ni ba jøøm. Mëër ba këëö ni ba töödö.

⁵ Ni eni ba koori, ni dhee ba teek. Mëër bäŋ wø ŋäc dëëre keere, ni ba wëëyi, ni gïï raay mo wø tïïc dëëre ba keee.

⁶ Ni yie ba mïnni ki gïï mo reyø, 'ba yie wø mïnni ka gïn ma adïëri.

⁷ Mëër rïëpa jammi bëët, ni jïëc jammi bëët, ni ŋääth jammi bëët mo poot ena nyïm, ni jïëny jammi bëët.

⁸ Mëër ba cuŋ. 'Ba køp dwør Jwøk jøøl. Ni muuy mar cäänö ki dhøgi møøk, ocuŋ. Ni ki man ŋäc jammi, jøøl.

⁹ Kiper gïïa ŋääø, paa othur karge. Ni marø wø købø dwør Jwøk, paa othur kare.

¹⁰ 'Ba kanyo ö mano näk othur kare, mana näk patha othur kare jøøl.

¹¹ Kanya pooda ni aana nyilaal, a cäänö ka luum lal, naa caara acaac lal, ni tiet luup caana ka cään lal. 'Ba kanya tïma ni aana dïcwøø mo dwøŋ, jap lal awiia.

¹² 'Ba kawaane jammi poot nëënö ni jïrri yi räŋi, 'ba kanyo tïme na kanyøca, dëëtø oneetø ni ø neeta nyeŋŋø. 'Ba kawaane a ŋäya mo thiinh keere, 'ba kanyøca oŋääa bäre, keda man ŋäc aani døøc en.

¹³ 'Ba kawaane, ŋäädhe, ki ŋäädhe mar nyïm, ki mëër, gïï na adäk ii, bëëdö ni nut. 'Ba mana dwøŋŋa eni dï gïïögø beeye mëër.