1 Körin 11 - Wëël Jwøk

¹ Tïmu nou ŋwaala mara, keda man wø ŋwaala mar Krictø.

Pwöc Kiper Loop Wïc Kar Lam

² Uuna pwøa kiper mana lääŋŋu aani ki yïth jammi bëët, ni gwøgu kööŋŋe kaawat mana wëëga ge uuni.

³ 'Ba a manynya man ŋäyu gø, ni dïcwøø man nø bëënna Krictø, ni dhaagø bëënna cwøre, ni ö Krictø ni bëën Jwøk.

⁴ 'Ba dïcwønno wäro lämö wala køpa dwør Jwøk ni wïïe ee loobø, lääa wïïe.

⁵ 'Ba dhaaŋŋo wäro lämö wala køpa dwør Jwøk ni wïïe paa ee loobø, lääa wïïe. Eni mare röömi ka mana dee öö ni wïïe ogwäär wøk.

⁶ 'Ba ni näk dhaagø okweer ki man loop wïïe, doo beerra mana dee jïëye nyaarø. 'Ba ni näk nyaar ki gwän wøk beege gïï wø määnö ki jï dhaagø, wär eni wïïe loobe.

⁷ 'Ba dïcwøø ba doo løny ki man loop wïïe, kiper mana tïme ni ena kïdö na ajiem mar Jwøk. 'Ba dhaagø beeye ajiem dïcwøø.

⁸ Kiper dïcwøø ba cwääca dëër dhaagø, 'ba beeye dhaagø na cwääc ki ri dëër dïcwøø.

⁹ Ni dïcwøø ba cwääc kaper dhaagø, 'ba beeye dhaagø na cwääc kiper dïcwøø.

¹⁰ Kiper manøgønø, dhaagø wïïe dee loobø kiper nyïïatwiet maal, ni nyootha gø ni dhaagø ena tier teek mar dïcwøø.

¹¹ 'Ba këël na näk enøgønø, ki kur Wuuö, doo bäŋ dhaagø onää bäŋ dïcwøø, ni doo bäŋ dïcwøø onää bäŋ dhaagø.

¹² Kiper dhaagø cwääc ni käla dëër dïcwøø, ni ö dïcwøø thuwø ni tïme ni nywøla dhaage. Ni jammi bëët ööi ki baŋ Jwøk.

¹³ ?Ennø, luummögø nëëne nidïï ki baŋu? ?Beeye gïn mo beer jï dhaagø ki man lam Jwøk ni wïïe patha ee loobø?

¹⁴ ?Aŋø, u bäŋ wø pwöny gïn wø en cwïnynyu ni beeye gïn mo määnö jï dïcwøø ki man kääde ki jïër mo bäyö?

¹⁵ 'Ba ni näk dhaagø käära jïër mo bäyö, beeye gïr ajiem jïre. Kiper jïëye amëëk eni na rëëbi.

¹⁶ 'Ba nee da ŋat mo manynya man pïëme kiper gïn, bäŋ jöö mør mo ŋäcwa, këël ki yïth acook Jwøk.

Gïïa Reyø Na Tägö Kar Cam Mar Kwäärö Ma Jecu

¹⁷ 'Ba luup caana jïïu en, a ba pwøc uuni, kiper dwätö maru man wø dwätu kanya ciel paa dwän bëënynyö, 'ba beeye dwän rääö.

¹⁸ Kiper mana dïkwøŋ na wïnynya, akøp ni kany wø cooŋŋu dëëtu ni uuna acooŋ Jwøk, ni da apääk dïïu, ni jïëa gø ki mo thiinh.

¹⁹ Kiper apääk atïïyu møn, kiper nee jøøa näk marge adïëri nee ŋec dïïu.

²⁰ 'Ba kany wø cooŋŋu dëëtu kanya ciel, atïmö ni paa cam mar Kwäärö ni wø cammu.

²¹ Kiper kany wø näk kar cam, ŋati man nø laara pööth ri cam mare keere ni cam gø, ni wati maya onäk käci, ni ö maya ni meere.

²² ?Aŋø, jïïu bäŋ mïëri mo cämu yïthge ni mädhu? ?Wala u jøøŋŋa acooŋ Jwøk, ni lääu wïth jøøa jïge bäŋgø? ?Agïnaŋø noo caana jïïu? ?Aŋø, u daa pwøø kiper manøgø? Jïra bäär, u ba daa pwøø.

Pwöc Kiper Cam Mar Kwäärö Ma Jecu

²³ Kiper gïna jooda baŋ Kwäärö beeye na mëëga u thuwø, ni Kwäärö ma Jecu, wääna ö eni na cïbi ceŋ nyïïmän, alwötö ki møø.

²⁴ 'Ba na nø dwøk met ec, møø apøte, ni kööe, ni «Man beeye dëëra, na pøti kiperu. Gïn wär tïïyu nou para aani.»

²⁵ Kaawat manøgø thuwø athöödhi alwøre kanya lønyge ki cam, ni kööe, na «Athöönhnhi beeye athöönh luumma nyään na tuut ki køør remma. Tïïyu gïn kany wäro maathu gø, nou para aani.»

²⁶ 'Ba kany wäro cammu møgi ni mäthu ya athöönhnhi, u køpa thøw Kwäärö ma Jecu gøøc mano ööe.

Camø Cam Kwäärö Ma Jecu Ni Røø Yøø Jiiŋŋø

²⁷ Kiper manøgønø, ŋat wäro cam møk Kwäärö ma Jecu, ni mäthe ya athöönhnhe ni bëëtö mare patha kare, eni di jäälö kiper mana päät dëër Kwäärö ki remme.

²⁸ 'Ba ŋati man dëëre wär caare keere. Køøre eno luuny cam ki møgøgø ni mäthe ya athöönhnhögø.

²⁹ Kiper ŋato wäro cämö ni mädhe ni bäŋ gïn mo ee caarø kiper dëërögø, cam mare ki maath mare käla ajäla bääte.

³⁰ Ni beeye na tïm jø mo thööthi dïïu ni jägö ni tuu, ni thøw jø møøki.

³¹ 'Ba onää dëëtø yøø jäälö na adïëri døc, ø ba doo jäälö.

³² 'Ba kany wø ö Wuue wø jääl øøni, pwönynya øøni, kiper nee ø ba jääl ki jø piny na aciel.

³³ Kiper manøgønø, nyïïmera, kany wø cooŋŋu røgu kiper cam, beerra man jïtu røgu.

³⁴ 'Ba nee da ŋat mo dëëre da käc, wär eni cäme paac. Kiper ni näk mou ba tïïö na enøgønø, kanymør u cooŋa acooŋ ajäla. 'Ba mar jammi møga, uuno nyuunhnha ki jöö kanyo ööa.