1 Körin 1 - Wëël Jwøk

Määdhe Mar Pøøl

¹ Aana Pøøl na cwøl nee tïme na nyïïatwiel mar Krictø Jecu ki køør mana many Jwøki, ki cöögø ma Cøtheni.

² A göönna baŋ jø acooŋ Jwøk moa en yi Körin, jøøa näk ocïp kur keerge ki ri Krictø Jecu, na cwøl ni jø Jwøk na aciel ki jøø ni en kwörögø bëët ni wø cøør nyeŋ Kwääyø ma Jecu Krictø, na näk Kwääyge, ni näk marø.

³ Met ec bëëde bäätu, ki bëët-mëër man wø ööi ki baŋ Jwøk na näk Wääø, ki Kwääyø ma Jecu Krictø.

Dwøk Met Ec

⁴ Met yia wø dwøga baŋ Jwøk kiperu cooth, ki køør met yi Jwøk na cïbe jïïu ki ri Krictø Jecu,

⁵ kiper na bëënynyu ree ki yïth jammi bëët, ki yïth luup bëët, ka acaara bäre,

⁶ kaawat mana ö luumma caan kiper Krictø na kïthi cwïnynyu ni teek.

⁷ Ni tïme ni bäŋ muuy mar Jwøk mo tøør jïïu, kany poodu nou koora Kwääyø ma Jecu Krictø noo nyoodhi,

⁸ ŋato käär uuni këël aŋuun nïne, ni bäŋ ajäla dëëtu dïcäŋo näk dïcäŋ Kwääyø ma Jecu Krictø.

⁹ 'Ba Jwøk dwøre ba dak, ŋata cwøl uuni ki man dwätu ki wääde ma Jecu Krictø na näk Kwääyø.

Luum Pääŋ Røk Mana Tägö Ya Acooŋ Jwøk

¹⁰ Nyïïmera, a kwaya uuni ki nyeŋ Kwääyø ma Jecu Krictø, ni jïëyu ki luumma näk aciel karubëët, ni bäŋe apääk yïthakiyu, ni dwallu cwïnynyu na aciel, ki dwøl aciel.

¹¹ Kiper awïnynya baŋ jø tuuŋ Kalööe ni da pïëm dïïu, nyïïmera.

¹² 'Ba man cääna kipere en beeye ni ŋat mør wø köö, ni «Aana dhaanh Pøøl,» ni kö maya, ni «Aana dhaanh Apøla,» ni kö maya, ni «Aana dhaanh Ciipa,» ni kö maya, ni «Aana dhaanh Krictø.»

¹³ ?Aŋø, Krictø opääŋŋö? ?Beeye Pøøl na 'näk bäät jaath kiperu? ?Wala u lwøk na nyuudhi ka nyeŋ Pøøl?

¹⁴ 'Ba yia met na bäŋe ŋat mo yaa lwøø na nyuudhi røgu, 'ba tiirra Karicpa ki Geea keerge na lwøa,

¹⁵ nee bäŋe ŋat mo köö, nou lwøk ka nyeŋŋa.

¹⁶ Ni lwøa tuuŋ Ectipana thuwø. 'Ba køør manøgønø, kuua nee da ŋat mo yaa lwøø.

¹⁷ Kiper a kär jääŋ Krictø baŋ lwøk na nyuudhi, 'ba a jääŋŋe kuna køba luumma nyään na met, nee caana ni kära døønnø, kiper nee gïr jaadha no odëëdö mar Krictø nee ba bänhnhe.

Krictø Beeye Teek Jwøk Ni Näk Leec Wï Jwøk

¹⁸ Kiper luum jaadha no odëëdö bëëdö na luum bøøl ki jï jø wø ränynyi, 'ba ki jïïø, ø wø piem, beeye teek Jwøk.

¹⁹ Kiper ogöörö, ni «Aani leec wïc mar jøøa wïthge leer, oraanynya. Ni ö riek waŋŋi mar jøøa nyeŋge reegø ni mäna gø ki thur kare.»

²⁰ ?Age ŋata wïïe leer? ?Na age ŋata näk dïpööy mar ciik Jwøk? ?Age ŋata ŋäc pïëm ki luup yi pinyi en? ?Aŋø, Jwøk leec wïc mar jø piny käre tïïö na luum bøøl?

²¹ 'Ba Jwøk, ki køør leec wïc mare, jø piny amäne ki man ŋäcge eni ki køør leec wïthge. 'Ba eni yie amïnnö ki man piem jø wø jïëy ni ŋääthge ki køør luum bøøl ni wø køpwa.

²² Kiper jø Juuth wø manynya ŋïïce, ni ö jø Gïrïïk ni manyge leec wïc.

²³ 'Ba waani, wa wø køpa gø ni Krictø anäk bäät jaadha no odëëdö, ni wø ö jø Juuthi ni wø cwanyge tietge ki gø, ni näk luum bøøl ki jï juurre.

²⁴ 'Ba ki jï jøøa näk ocwølø, na näk jø Juuth këël jø Gïrïïk, beeye Krictø na näk teek Jwøk, ni näk leec wï Jwøk.

²⁵ Kiper bøølø mar Jwøk, leec wïth jiy ee kaalø, ni jäk mar Jwøk teeka eni ki teek mar jiy.

²⁶ 'Ba caarru cwödö mana cwøl uuni ki gø, nyïïmera. Kiper paa mo thööth dïïu na wïthge leer keda man wø caan jø pinynyi, ni paa mo thööth na teek, ni paa mo thööth na nywöli yi tuuŋ kwär.

²⁷ 'Ba Jwøk jiera gïïa näk bøøre dï jap piny, nee wïth moa wïthge leer lääe, ni Jwøk jiera gïïa jägö dï jap piny nee wïth moa teek lääe.

²⁸ Ni Jwøk jiera gïïa can dï jap piny, na näk ojar pinynyi, këël jammi moa näk otagø, kiper nee japi ni en pinyi en nee raanynye.

²⁹ Kiper manøgønø nee bäŋe ŋat mo töödö nyïm Jwøk.

³⁰ Ni beeye eni na kïth uuni dëër Krictø Jecu, ŋata tïïc Jwøki na leec wïc marø, na näk ŋata jïëc ø kipere, ni cïp ø kur keerø na mo Jwøk, na wïïl ø wøk.

³¹ Kiper ogöörö, ni «Ŋat wäro töödö, wär wø tööde kiper Wuuö Jwøk.»