1 Jøøn 5 - Wëël Jwøk

Böötö Man Wø Bööt Piny Ki Gø

¹ Jiy bëët mo wø jïëy ni Jecu beeye Krictø, gena nyïï Jwøk, ni jiy bëët mo wø mëër ki wuuö, ge mëër ki nyey thuwø.

² 'Ba beeye gïn en noo ŋääø gø ni ø mëër ki nyïï Jwøk, beeye man bëëdø ni ø mëër ki Jwøk ni leŋø moa ceme.

³ 'Ba mëër ki Jwøk beeye ki man gwøø gïïa ceme. Ni gïïa ceme dhaanhø ba ööle.

⁴ Kiper ŋat wø näk nywøla Jwøki, piny wø bööte böötö. 'Ba gïn wø bööt piny ki gø beeye ŋäädhe marø.

⁵ ?Aŋa ni wø bööt piny? Beeye ŋat wø jïëy ni Jecu beeye O Jwøk.

⁶ 'Ba eni na Jecu Krictø beeye na öö ki pïï ki remø, ni eni kär öö ki pïï keerge, 'ba beeye ki pïï ki remø.

⁷ 'Ba beeye Jwïëc Jwøk na näk lïŋi, kiper Jwïëc Jwøk beeye adïëri.

⁸ Da lïŋŋe adäk, Jwïëc Jwøk, ki pïï, ki remø. Ni geno dwätö karge dääi.

⁹ 'Ba ni näk mo ø jïëy ki lïŋ mar jiy, dwøŋŋa lïŋ mar Jwøk. 'Ba man beeye lïŋ mar Jwøk na købe kiper Wääde,

¹⁰ ni ŋat wø jïëy ki O Jwøk, lïŋ ena cwïnye kiree. 'Ba ŋat wø ba jïëy ki Jwøk, døøya Jwøk twöt, kiper na käre jïëy ki lïŋ mana køp Jwøki kiper Wääde.

¹¹ 'Ba lïŋ mana køp beeye en, ni øøna mooc Jwøki ki kwøw mana näk adïëri mo bäŋ cuŋŋe, ni kwøwøgø ena ri Wääde.

¹² Ŋat wø en ri Wäädö, kwøw ena jïre. 'Ba ŋat wø tøør ri Wäädö, kwøw bäŋgø jïre.

Luum Kwøw Mana Näk Adïëri

¹³ A gööra luubö man baŋu, u no ojïëy ki nyeŋ O Jwøk, nee ŋäyu ni jïïu da kwøw mana näk adïëri mo bäŋ cuŋŋe.

¹⁴ Ni man beeye ŋäädhe man wø ŋäädhø eni ki gø, ni ni näk eni pëënynyø pëënynyö ki gïrpiny keda mano manynye, döötø wïnynye wïnynyö.

¹⁵ 'Ba ni näk mo ŋääø nø ni eni döötø wø wïnynye wïnynyö ki gïï wäro pëënynyø bëët, ŋääø nø ni gïïa pëënynyø baŋe wø cøøa jïïø.

¹⁶ 'Ba ni näk da ŋat mo neena coki no obääyö ni patha bääyö man wø cööp ri thøø, Jwøk opëënynye, ni ö Jwøki ni wëëk eni kwøw, ni beeye teeŋ jøø ni bääyö marge patha bääyö man wø cööp ri thøø enø. Kiper da raay mo wø cööpa ri thøø. Naa ba caan gø ni dhaanhø doo lämö kiper manøgø.

¹⁷ Kiper gïïa ba beyø bëët beege raay. 'Ba da raay mo ba cööp ri thøø.

¹⁸ Ni ŋääø ni ŋat mo onywøl Jwøki bäŋ wø bëëdö ni bääö, kiper mano gwøgi ya O Jwøki, ni ba guti ya ŋata raaci.

¹⁹ Ŋääø ni øøna mo Jwøk, ni piny bäre ena kur ŋata raac.

²⁰ 'Ba ŋääø ni O Jwøk anø öö, ni mooc øøni ka acaara ki man ŋääø ŋata näk adïëri. Ni ø ena ri ŋata näk adïëri ki køør Wääde ma Jecu Krictø. Manøgø beeye Jwøk mana näk adïëri ni näk kwøw mana näk adïëri mo bäŋ cuŋŋe.

²¹ U ni therø, bëëdu ni karu bäär ki gïï wø lam jaak.