1 Jøøn 4 - Wëël Jwøk

Päänynyu Jwïëy

¹ Omëëya, kär jwïëy jïëyu bëët. 'Ba päänynyu jwïëy nee neennu nee gena mo Jwøk. Kiper nyïïkuk Jwøk mo thööth mo patha adïëri okeethø dï piny.

² 'Ba Jwïëc Jwøk oŋäyu ki køør luummi en: Jwïëy bëët mo wø jïëy ni Jecu Krictø oöö ni da dëël beege mo Jwøk.

³ 'Ba jwïëy bëët mo wø ba jïëc Jecu ni ööi ni da dëël, ge patha mo Jwøk. Manøgø beeye jwïëc nyimän Krictø na wïnynyu ni öö, ni enø nø ö piny ennø.

⁴ U ni therø, uuna mo Jwøk, ni jwïëyögø you nø böötø. Kiper ŋat en cwïnynyu en dwøŋŋa eni ki ŋati ni en piny en.

⁵ Gena mo piny. Kiper manøgønø, gïn wø caange, ge caana mo piny, ni ö pinynyi ni wïny marge.

⁶ 'Ba øøni, øøna mo Jwøk. Ŋat wø ŋäc Jwøk, marø wø wïnynye wïnynyö. 'Ba ŋat wø näk patha mar Jwøk, marø bäŋ wø wïnynye. Ni beeye gïnögø ni ŋääø jwïëy moa en ra adïëri, ki moa en ri cwøk.

Jwøk Beeye Mëër

⁷ Omëëya, beerra man mëërø ki røgø, kiper mëër a mar Jwøk. Ni ŋat wø mëër nywøla Jwøki ni ŋäc Jwøk.

⁸ 'Ba ŋat wø ba mëër, Jwøk kuue, kiper Jwøk a mëër.

⁹ Ni beeye gïn en na nyooth mëëc Jwøk dïïø, kiper mana ö Jwøki na jääŋ Wääde na näk aciel piny kiper nøø kwøø ki køøre.

¹⁰ 'Ba mëër beeye en, ni patha øøni na mëër ki Jwøk, 'ba beeye eni na mëër ki øøni ni jääŋ Wääde nee tïme no olämi kiper raay moø.

¹¹ Omëëya, nee Jwøk mëër ki øøni na enønø, ø doo mëër ki røgø thuwø.

¹² Bäŋ dhaanhø mo oneen Jwøk. Ni näk mo ø mëër ki røgø, Jwøk bëëdö dëëtø, ni mëëye othur kare cwïnynyø.

¹³ Ni beeye gïn en ni ŋääø gø ni ø bëëdö dëëre, ni bëëde dëëtø, kiper mana mëëk Jwïëye øøni.

¹⁴ 'Ba mana neenwa ni wø køpwa beeye ni Wuuö Wääde ajääŋŋe na Pïëmi mar piny.

¹⁵ 'Ba ŋat wø jïëc Jecu ni ena O Jwøk, Jwøk wø bëëdö dëëre, ni en dëër Jwøk.

¹⁶ Kiper manøgønø, ŋääø ni yøø jïëø ni Jwøk mëër ki øøni. Jwøk a mëër. Ni ŋat wø bëëdö ri mëër, bëëdö ri Jwøk, ni Jwøk wø bëëdö dëëre.

¹⁷ Ni beeye gïnögø na thur mëërri kare cwïnynyø, kiper nøø bëëdø ni cwïnynyø da ŋäädhe kiper cäŋa näk cäŋ ŋøl luup. Kiper kany bëëdø pinyi en, ø bëëdö keda manø bëëde.

¹⁸ Bäŋ lwär ri mëër. 'Ba mëër mana näk adïëri, lwär wø rieme wøk. Kiper lwär ena kur pöödö, ni ŋat wø lwäär, mëëye paa othur kare.

¹⁹ Ø mëër kaper na kwøŋ mëër ki øøni.

²⁰ Ni näk da ŋat mo köö, na «A mëër ki Jwøk,» ni mäne ki coki, ena dïtwöt. Kiper ŋat wø ba mëër ki coki na näk ee neenø, ba løny ki man mëëre ki Jwøk na näk käre neenø.

²¹ 'Ba man en beeye dwøl mana jootwa baŋe, ni ŋat wø mëër ki Jwøk, doo mëër ki coki thuwø.