1 Camiel 9 - Wëël Jwøk

Kanya Ö Cøølli Na Many Arëëni Moa Rwäänyö

¹ 'Ba da nyen ma nyï tuuŋ Benjamen mo nyeŋŋe cwøl ni Kic wär Abiël, nyïkwaar Dhörör, Dhörör o Bekörat, Bekörat wär Apik, Apik nyïkwaar jø tuuŋ Benjamen. 'Ba Kic beeye nyen mo teek mo kare dagø dï jø poge.

² 'Ba eni da wääde mo nyeŋŋe cwøl ni Cøøl, ma dïcwøø mo teek mo kïte mïërö, ni bäŋ ŋat mo okaath cere ki mïërö dï jø Icriel. 'Ba Cøøl beeye nyen mo bäära eni døc yïthakic jø Icriel, ni jiy ee thany piny ni dïët ki gööge.

³ 'Ba dïcäŋ aciel Kic wää Cøøl arëëni moe arwäänyö. Køøre Kic aköö jï wääde ma Cøøl, ni «Ennø, lwötï ki ŋat tïïc aciel, ni tïŋŋï, ni ciï kuna manynyï arëëni.»

⁴ Ni ö Cøølli ni tïŋŋe, ni ci mïëya en bäät kïte na en kur jø tuuŋ Ipariem, ni pöödhe ni ci ŋööm Calica; 'ba geni arëëni kärge joodø. Køøre gena cäŋ pöödhö ni cige ŋööm Caalim; 'ba arëëni tøør kaace. Køøre gena cäŋ pöödhö ni cige ŋööm jø tuuŋ Benjamen; 'ba arëëni kärge joodø kaace thuwø.

⁵ 'Ba kanya pïïcge ŋööm Dhup, Cøøl aköö jï ŋat tïïc mana cäädhö ki eni, ni «Ööï, waa døø paac; kanymør wära oløny ni cädö kaperø, ni paa kiper arëëni këët.»

⁶ 'Ba ŋat tïïc manøgø aköö jï Cøøl, ni «Neenï, da ŋat ma dhaanh Jwøk yi pääny man, mo bëëdö ni eno wøørø; ni jammi bëët mo wø care wø thura karge na adïëri. Ennø, beerra man cøø baŋe kunece; kanymør da gïn mo caane caanø kiper wääth man caadhø en.»

⁷ 'Ba Cøøl aköö jï ŋat tïïc mare, ni «Neenï, ni näk mo ø cøøa baŋ ŋatøgø, ?agïnaŋø noo cïbø jïre? Kiper dääpe yøø nø thöör yo opïr marø, ni bäŋ gïn cïbö jïre. ?A da gïn mør këët mo cïbø cïbö jïre?»

⁸ 'Ba acäŋ ŋat tïïc løgø jï Cøøl ni kööe, ni «Neenï, jïra da gwet-bïrö mo thenh; cïba cïbö jï dhaanh Jwøk manøgø, køøre eni jöö mana døø cørø ocaane jïïø.»

⁹ 'Ba wara bëëde dïkwøŋ Icriel, kanyo näk mo dhaanhø cøøa kuna pëëny Jwøk, eni wø köö, ni «Ööï, waa cøø baŋ ŋat wø joot jammi ki køør man wø nyooth Jwøki.» Kiper ŋat cwøl ni nyikuŋ Jwøk nïri en, dïkwøŋ cwøl ni ŋat wø joot jammi ki køør man wø nyooth Jwøki.

¹⁰ Køøre Cøøl aköö jï ŋat tïïc mare, ni «Luubö mana caanï enø beeye kare; waa cøø nø.» Ni putge ci pääny manøgø kanya en dhaanh Jwøki manøgø yie.

¹¹ 'Ba kanya tïme ni ge etha maal ni ge cøøa pääny manøgø, gena jïtö ki nyïïakuue mo ö wøk ka yi päänyögø ni ge ummö ki pïï. Køøre gena köö jï nyïgögø, ni «Ŋat wø joot jammi ki køør man wø nyooth Jwøki, nut kaagø?»

¹² 'Ba aløk nyïgögø jïge ni köge, ni «Nutö; neennu, ni nyïmmu kaagø. Rwädhu nø, kiper beeye öönynye pääny dïcäŋi ennø, kiper jiy cïpö ko olämme dïcäŋi kar lam mana en bäät thuur.

¹³ 'Ba kanyo pïïyu dhi kiir mar pääny, eni jootu joodø ni eni poot kär ci kar lam mana en bäät thuur baŋ cam, kiper jiy ba cämö ni eni poot kär pïï, kiper beeye eni wø gwïëth olämme; køøre jiy moa no ocwølø ge cämö nø. 'Ba ennø cou; eni putu ka joot.»

¹⁴ Køøre gena ci pääny. 'Ba kanya pïïcge yi pääny, ka adïëri møn, Camiel aputge joot ni ööa wøk jï kuna näk da geni ni eni cøøa kar lam mana en bäät thuur.

Kanya Ö Cøølli Ni Ci Baŋ Camiel

¹⁵ 'Ba ki dïcäŋ maya ni Cøøl poot kär öö, Wuuö Jwøk gïno tägi anyoodhe jï Camiel ni kööe,

¹⁶ ni «Diøø kar kany nø, aani a jääŋŋa baŋï ki dhaanhø ma nyï tuuŋ Benjamen; 'ba eni wïïe thïïmmï thïïmmö ki maaw niï røønya gø na wïth jiya ma jø Icriel; ni ö eni ni køny jiya ceŋ jø Pilitin. Kiper bëëtö mar jiya ajooda møn, ni wïnynya jwøk mana jwøkge.»

¹⁷ 'Ba kanya ö Camielli na joot Cøøl, Wuuö Jwøk aköö jï Camiel, ni «Neenï, ŋata caana jïrï beeye en. Eni jiya kääre käärö.»

¹⁸ Køøre Cøøl aci baŋ Camiel dhi kiir ni kööe, ni «?Ŋat dwøŋ, po ŋat wø joot jammi ki køør man wø nyooth Jwøki, en kaa?»

¹⁹ 'Ba aløk Camielli jï Cøøl ni kööe, ni «Ŋatøgø ni manynyu enø beeye aani. Ennø, pööthu maal nyïma ni cou kar lam mana en bäät thuur, kiper u cämö ki aani na aciel dïcäŋi; 'ba noo tïme na amöölla nø, ïïno wëëga wääth, ni ö gïnö ni caarï ki cwïnyï enø ni caana gø jïrï.

²⁰ 'Ba kärï cädö kiper arëëni moï moa rwäänyö køør nïne adäk, kiper geno nø joot. ?Aŋø, ŋat mo jø Icriel cädö kipere døc kawaane aŋa? ?Paa ïïni ki dhi øt wäru?»

²¹ 'Ba aløk Cøølli ni kööe, na «?Aŋø, a paa nyï tuuŋ Benjamen, na näk beeye wï tuuŋ mana thiinhnha eni røk wïth tuŋi mo jø Icriel? ?A dhi øt kwara, paa beeye dhi øtø mana thiinhnha eni døc røk dhøk uudi bëët moa en ri tuuŋ Benjamen? ?A teeŋ luubö manøgø ni cäänï kipere enø, orømø ki aani?»

²² Køøre Cøøl ki ŋat tïïc mare akäl Camielli ni kïth ge yi øda dwøŋ, ni mooc ge ki kwör pïge piny yïthge kwör jøøa no owøørø yïthakic jøøa no ocwølø, ni beege cwøw mo jïtö ki pïëradäk.

²³ 'Ba Camiel aköö jï ŋat thaal, ni «Käl rïŋŋa cïba jïrï na kööa ni cïp kur keere.»

²⁴ Ni ö ŋat thaalli ni put ääm lwør ni cïp gø nyïm Cøøl. Køøre Camiel aköö, ni «Man beeye rïŋö mana no okanø ni cïp nyïmï en. Cämu nø, kiper kanya jiiŋ cam man, na cwøla jiy kipere, rïŋö man akan kiperï.» Ni ö Cøølli ni putge cämö ki Camiel na aciel dïcäŋögø.

²⁵ 'Ba kanya löönyge piny ki kar lam na en bäät thuur ni ge ööa pääny, Camiel acäänö ki Cøøl kanya no ojiiŋŋø na kar niine wï øtø maal.

²⁶ 'Ba na tïme ni tiet øw kwäärö, gena päy, ni ö Camielli ni cwøl Cøøl wï øtø maal ni kööe, ni «Jek riï nø, niï jiedha.» Køøre Cøøl ree ajiie, ni ö eni ki Camiel ni tïŋge ni cige dhi jöö na aciel.

²⁷ 'Ba kanya poode ni ge cäätha ya aŋuun pääny, Camiel aköö jï Cøøl, ni «Caanï jï ŋat tïïc marï nee pööth maal nyïmmø, ni ö ïïni ni cuŋŋï buuta kany ki kany mo thiinh, nee dwør Jwøk mana caane nee wïnynyï baŋa.» Køøre ŋat tïïc aput pööth maal.