1 Camiel 5 - Wëël Jwøk

Luum Gïïa Tägö Dëët Jø Pilitin Ki Køør Acanduk Mar Jwøk

¹ 'Ba jø Pilitin acanduk man wø nyooth luumma tuut Jwøki ki jiy akälge ki kanya cwøl ni Ëbënëdhër ni kïthge gø paana cwøl na Acdöt.

² Køøre jø Pilitin acanduk mar Jwøk akälge ni kïthge gø yi øt jwøge ma Dagön ni putge gø cïp buut Dagön.

³ 'Ba kanya tïme na amöölla cøøn na päny jø Acdöti maal, ka adïëri møn, jwøge ma Dagön aputge joot no opädhö ki bäp yie nyïm acanduk mar Wuuö Jwøk. Kanyøgønø, jwøge ma Dagön atïŋge maal ni dwøkge gø kare na bëëde yie.

⁴ 'Ba kanya tïme na amöölla maya cøøn na pänyge maal, ka adïëri møn, jwøge ma Dagön acäŋge jootø no opädhö ki bäp yie nyïm acanduk mar Wuuö Jwøk. 'Ba wï Dagön ki ceŋŋe oŋørø ni päthge piny bäät thudhi mar dhi øtø; ni beeye dëëre na dööŋ keere.

⁵ Kiper manøgønø, aput tïmö ni kany wø døny dïlämme mo Dagön ki jiy bëët yi øt jwøge ma Dagön na en Acdöt, thudhi mar dhi øtø ba nyøønge këël dïcäŋi en.

⁶ 'Ba Wuuö Jwøk aput tïmö ni cere ena dëët jø Acdöt ni raany geni, ni mooc dëëtge ki børi, ni beege jøøa bëëdö Acdöt këël mïëri moe moa en buute bëët.

⁷ 'Ba kanya jooti ya jø Acdöti ni gïnögø otägö, gena köö, na «Acanduk mar Jwø Icriel ba doo bëëdö dïïø kany, kiper Jwøk cere atïmö ni ena dëëtø ki dëër jwøø ma Dagön.»

⁸ Kanyøgønø, jø Acdöt kwääri moge møga mo jø Pilitin acwølge ni cooŋge ge, ni köge, na «?Agïnaŋø noo tïïcwa ka acanduk mar Jwø Icriel?» Køøre kwääri aköö, ni «Beerra man ö acanduki mar Jwø Icriel ni daai ni kïthi Gëth.» Ni putge acanduk mar Jwø Icriel daak.

⁹ 'Ba na tïme na køøre cään na acanduk mar Wuuö Jwøk ege nø daa kunece, Wuuö Jwøk aput tïmö ni cere ena dëët jiy moa bëëdö yi pääny manøgø, ni jït wïth jiy ko okiera mo päl; ni ö Wuuö Jwøki ni raany jø päänyögø, ki mana täge ko obwöre këël jø døøŋŋø, ni put dëëtge gääbö ki børi.

¹⁰ Kanyøgønø, acanduk mar Jwøk ajääŋge paana cwøl na Akarön. 'Ba gïna tägö, kanya pïïc acanduki mar Jwøk Akarön, jø Akarön aput göö ko oduuru, ni köge, ni «Geni, acanduk mar Jwø Icriel akälge baŋø, nøø thøø ki jø pøø bëët.»

¹¹ 'Ba kiper mana tïm jø päänyögø ni wïthge rege ege kierø døc ki thøø mana päl, ni Jwøk bëëdö ni cere ena dëëtge døc, geni kwääri mo jø Pilitin bëët acwølge ni cooŋge ge ni köge, «Daagu acanduk mar Jwø Icriel; dwøk kare kanya käl yie, nee wa ba 'nääe ki jø powa bëët.»

¹² 'Ba kar kaaca jøøa bøth ki thøø, gena raanynyi ki børi, ni ö oduuru mana gøøc jiyi moa bëëdö pääny manøgø ni wïnye kany mo bäär.