1 Camiel 31 - Wëël Jwøk

Luum Thøw Cøøl Ki Wääte

¹ 'Ba jø Pilitin gena këëdö ki jø Icriel; ni ö jø Icrielli ni bwøkge nyïm jø Pilitin, ni thøw mo thööthi rege bäät Kïn Gilböa.

² 'Ba jø Pilitin Cøøl ki wääte amaage jöö, ni 'näkge wäät Cøøl, ni beege Jönathan ka Abinadap ki Mëlkica.

³ 'Ba leny atïmö ni teek dëër Cøøl. Køøre jø leny mo wø këëdi ka athëëre Cøøl ajootge ni këëlge gø; ni put atheerø tïmö na ŋwellø mo leth døc dëëre.

⁴ Kanyøgønø, Cøøl aköö jï ŋat wø käär jap leny jïre, ni «Wöth opëëllö marï wøk ni cwøpï aani ki gø, nee jøøi ni kär daŋø ii nee ba tïme naa cööba geni, naa ba caarge.» 'Ba ŋata käär jap leny jïre akweer ki man 'näk gø, kiper ena lwäyö døc. Køøre Cøøl opëëllö mare aput lwør ni put dëëre cwøp ki gø.

⁵ 'Ba kanya ö ŋata käär jap leny jï Cøøl na joot gø ni Cøøl onø thøø, eni thuwø ree acwøbe ko opëëllö mare, ni put thøø ki Cøøl na aciel.

⁶ Kanyøgønø, Cøøl ki wääte moa na adäk, ki ŋat wø käär jap leny jïre, ki jiy mo wø koor eni, gena put thøø na aciel dïcäŋögø.

⁷ 'Ba kanya ö jø Icrielli moa bëëdö mïëya en løø gool, ni gool ena yïthakicge ki jø leny, ki moa bëëdö løø Naam Jördan løøga, na jootge gø ni jø leny mo jø Icriel onø bwøk, ni Cøøl ki wääte geno nø thøø, geni päänye moge aputge wec ni bwøkge; ni ö jø Pilitinni ni putge öö ni bëëtge yïth päänye moøgø.

⁸ 'Ba na tïme na amöölla maya, na ö jø Pilitinni ni ge ööa kuna twierge jap jiy moa no othøw, Cøøl ki wääte moa na adäk aputge joot no othøw bäät Kïn Gilböa.

⁹ Køøre jø Pilitin wï Cøøl aputge ŋul wøk, ni lwørge jap leny moe, ni putge ge jääŋŋö dï ŋööm jø Pilitin bäre, ni ge caana thøw Cøøl yïth uut juu moge ki jï jø poge.

¹⁰ Køøre jap leny mo Cøøl aputge cïp yi øt jwøge ma Actaröth, ni putge dëër Cøøl gur ri kiir mar Bëëth-Can.

¹¹ 'Ba kanya ö jø Icrielli moa bëëdö pääny Jabic-Gelät na wïnyge gïna nø tïïc jø Pilitinni dëër Cøøl,

¹² jø leny moa teek bëët gena put tïŋŋö, ni cääthge ki yi wäär bäre, ni pïïcge Bëëth-Can, ni ö dëër Cøøl ki dëët wääte na en ri kiir Bëëth-Can ni putge ge lwør, ni døøge Jabic-Gelät, ni putge geni waaŋ kaace.

¹³ Køøre geni cuu mo Cøøl ki mo wääte aputge kwany ni koonyge ge tier jaadha dwøŋ na en Jabic-Gelät, ni kweerge ki cam ki nïne abïriiø ni ge kïïna gïr thøwge.