1 Camiel 30 - Wëël Jwøk

Kanya Ö Deebiti Na Nwän Ciklak No Otwier Jø Amalëki, Ni Läp Køørge

¹ 'Ba na tïme na dää nïne, Deebit ki jiye gena pïï Ciklak. 'Ba kar kaagø, jø Amalëk mïëya en jï løø tier-piny këël Ciklak ege nø tuk, ni raanyge Ciklak këël mana waaŋge gø;

² ni makge mään ki jøøa en yi pääny manøgø bëët, ni beege obwöre ki jø døøŋŋø, ni putge aay ki geni ni bäŋ aciel mo ege nääö dëët jøøa makge.

³ 'Ba kanya ö Deebiti ki jiye na pïïcge Ciklak, ka adïëri møn, pääny aputge nwänö no owaaŋ, ni mään moge ko obwöre moge moa näk cwøw ki moa näk mään onø mak ki tøŋ ni puti käl.

⁴ Køøre Deebit ki jiye na cäädhe ki ge, gena jwöŋö døc ni döötge ege tïŋ maal këël mana rööc cwäkge.

⁵ 'Ba kar kaagø, määr Deebit karge riet, ni beege Akinaam nyi jø Jedhriel, ka Abigël cï Nabal nyï Karmël, geno maaø ki tøŋ ni put ge käl.

⁶ Kar kaagø thuwø, Deebit dëëre ajïtö ki luubö mo teek ki køør luup moa car jiyi ni eni doo këërö ki kïte, kiper jiy bëët yïthge atïmö ni reyø døc, kiper mana mak obwöre moge. 'Ba Deebit ajïtö ki teek baŋ Wuuö Jwøk, Jwøk mare.

⁷ Køøre Deebit acäänö ka Abiethaar Kwääy Lam Mana Dwøŋ, ni beeye Abiethaar wär Ayemëlëk, ni kööe, na «A kwaya ïïni, käl ëëput buuta kany.» Ni ö Abiethaarri ni kïth ëëput buut Deebit.

⁸ Kanyøgønø, Deebit, Wuuö Jwøk apëënynye ni kööe, «?Wui Wuuö Jwøk, läpa køør jøøa twier paani en? ?A ni näk mo aano läpö, ge maa maaø?» Ni kö Wuuö Jwøki jï Deebit, «Ci läp køørge. Ka adïëri møn, ge magï maaø; ni ö jiyi bëët moa näk omaaø ki tøŋ ni putï ge duuö.»

⁹ Kanyøgønø, Deebit aput aay ni cäädhi ka jø leny moe ma dïpe abïciel, ni pïïcge bäät Naam Bëcör; ni ö jic Deebiti moa ööl na dööŋ cään ni putge dööŋŋe ni geno pï piny kaace.

¹⁰ 'Ba Deebit aput pöödhö ni läp køør jøøa tuk paac, ni cäädhi ka jiye ma dïpe aŋween, kiper jiye ma dïpe ariiø moa näk ööl døc, na näk naam kär løny jïge ki man ŋølge gø, gena dööŋ ni geno pï piny bäät naam kaace.

¹¹ 'Ba jic Deebit moa cäädhö ki eni, gena jïtö ki nyen ma nyï Ijep dï paap, ni kälge eni baŋ Deebit; ni moocge eni ki gïn cam ni cäme, ni mëëkge pïï eni nee mäthe.

¹² Ni moocge eni ki nyïï olämmi mo omiiø na dhøk, ki nyïïomøki moa näk otal mo omiiø na dhøgi ariiø, ni ö nyï Ijepi manøgø ni cam gïïa cïp jïre, ni put jwïëye duuö. Kiper jïre da nïne adäk ki wärre moge ni bäŋ gïn mo ee camø wala pïï mo ee maadhø.

¹³ Kanyøgønø, Deebit aköö jï nyenøgø, «?Nyie dïcwøø, ïïna nyï kaa? ?Ïïna dhaanh ŋa?» Ni kö nyenøgø, ni «Aani, aana nyï Ijep, ni aana laŋ jø Amalëk; 'ba aana wii kwääya piny kanya täk täwi dëëra, ni beeye dää nïne ennø.

¹⁴ 'Ba waani, wa käla kuna twierwa mïëya en jï løø tier-piny, ni beege mïëc jø Kelita, ki mïëc jø tuuŋ Juuda, ki mïëya cïp na bëëdö na mo Kalëp; ni ciwa Ciklak ni putwa gø waaŋ.»

¹⁵ Køøre Deebit aköö jï nyenøgø, «?Aŋø, løny jïrï ki man kïthï wa baŋ jø twëër moøgø ennø?» 'Ba nyenøgø aköö, ni «Wøp, kööŋï ŋëët Jwøk ki man näk maa ba 'nägï wala a ba cïbï cer kwääya; køøre nø, u kïtha baŋ jø leny moøgø.»

Kanya Ö Deebiti Na Bööt Jø Amalëk Ni Duu Jiy Ki Jammi

¹⁶ 'Ba kanya ö nyenøgø na kïth Deebit baŋ jø leny moøgø, ka adïëri møn, gena put nwänö ni geno ninyaŋŋa ni ŋöömö manøgø bäre ege gääbö, ni ge cämö, ni ge mädhö, ni ge miel ni yïthge met kiper gïïa twierge bëët na kälge ki yi ŋööm jø Pilitin ki yi ŋööm jø tuuŋ Juuda.

¹⁷ Ni ö Deebiti ni put jøøgø 'näk ki mana täge ki wïthïënhö këël mana päth cäŋŋi maya; ni bäŋ dhaanhø aciel mo obøth dïge, 'ba beege jiy ma dïpe aŋween keerge mo rïïŋi ka bäät athïrööle na jöömmö.

¹⁸ Kanyøgønø, Deebit jiy bëët moa mak ki tøŋ, këël jammi bëët moa twier jø Amalëki, aduue; ni ö Deebiti ni put määre duuö karge riet.

¹⁹ 'Ba bäŋ jiy mo orwäänyö røk jø døøŋŋø ko obwöre, ni beege obwöre moa näk cwøw ki moa näk mään. Këël jammi moa twier jø Amalëki na kälge kiper dëëtge, bäŋgø mo orwäänyö thuwø; ni ö Deebiti ni put gïïögø bëët dwøk paac.

²⁰ 'Ba kar kaagø, Deebit dïëk ki dhäk bëët mo jøøgø alwøre; ni ö jic Deebiti ni køølge lääc paac moøgø nyïm dhäk moge, ni köge, ni «Moi beege gïïa twier Deebiti.»

²¹ Kanyøgønø, Deebit apïï baŋ jø leny moe moa näk dïpe ariiø, na näk odööŋ bäät Naam Bëcör ki køør mana öölge, ni kär løny jïge ki man läpge køør Deebit. 'Ba kanya pïïc Deebiti, jø leny moøgø aput ci baŋ Deebit ki jø leny moa cäädhe ki geni ni ge jøla geni. Ni ö Deebiti ni put ci baŋge ni määth geni.

²² 'Ba jiy bëët moa cïïrge cøl na wïthge reyø na en røk jø leny moa cäädhö ki Deebit, gena cäänö ni köge, ni «Kiper mana näk mo jø leny moøgø kär ci baŋ leny ki waani, bäŋ gïn mo cïpwa cïbö jïge røk gïïa twierwa na duuwa. 'Ba beege määrge ko obwöre moge keerge noo cïpwa jïge nee aacge ki geni.»

²³ Køøre Deebit aköö, «Nyie, jaay nyïïmera, gïnögø ba dou tïïö na bäre; kiper beeye Wuuö Jwøk na cïp gïïögø jïïø. Beeye eni thuwø na koor øøni, na cïp jøøa twier pøø ceŋŋø.

²⁴ ?Aŋø, da ŋat mo ïthe ciie ciiø ki luubö manøgø ni caru enø? Kiper ŋat wø ci baŋ leny, ki ŋat wø dööŋ ni koora jammi, ge doo jïtö ki gïï mo röömi bëët; gïïo jootge dege pääŋŋö na aciel bëët.»

²⁵ 'Ba ki mana täge dïcäŋögø, luubö manøgø aput Deebiti tïïc na ciik mo ena ri luup ŋøl jï jø Icriel këël dïcäŋi en.

²⁶ 'Ba kanya pïïc Deebiti Ciklak, ena lwötö røk gïïa twiere, ni jääŋ ge baŋ nyïïawääte moa en røk jø døøŋŋø mo jø poge ma jø tuuŋ Juuda, ni kööe, ni «Moi beege muuce moa jääŋŋa baŋu, ni beege gïïa twiera baŋ nyïïmän mo Wuuö Jwøk.»

²⁷ 'Ba gïïögø ajääŋŋe jï nyïïawääte moa en Bëthël, ki moa en Ramöth na en jï løø tier-piny, ki moa en Jatir,

²⁸ ki moa en Aröör, ki moa en Cipmöth, ki moa en Ëctemöa,

²⁹ ki moa en Raakal, ki moa en yïth päänye mo nyïïkwaac Jeramiel, ki moa en yïth päänye mo jø Këën,

³⁰ ki moa en Örma, ki moa en Bör-Acan, ki moa en Athak,

³¹ ki moa en Keeprön, këël moa en kwöra wara cääth Deebiti ki jiye yïthge.