1 Camiel 3 - Wëël Jwøk

Kanya ö Jwøki Na Nyooth Luumme Jï Camiel

¹ 'Ba nyilaarø na Camiel enø bëëdö buut Ëli ni tïnynya Wuuö Jwøk. 'Ba ki yïth nïreka, bäŋ luup mo thööth mo ocaan Wuuö Jwøki ki dhøk nyïïkuk Jwøk, ni bäŋ luup mo thööth mo ee nyoodhø ki ri lääk.

² Kar kaaca Ëli bëëdö ni nyeŋŋe rääbö, ni ba rääŋö døc. 'Ba dïcäŋ aciel ki wäär ni eno butö kar niine mare,

³ ni lamba mar Wuuö Jwøk poot kär thøw, ni Camiel obut piny yi Øt Wuuö Jwøk, ni beeye øda näk acanduk man wø nyooth luumma tuut Wuuö Jwøki ki jiy bëëdö yie,

⁴ Wuuö Jwøk Camiel acwøle. Køøre Camiel aköö, ni «Aani en.»

⁵ Køøre Camiel areŋ baŋ Ëli ni kööe, ni «Aana öö. ?A kärï cwølø na bëëde?» 'Ba Ëli aköö, ni «Ï kära cwølø; ci døø kun butï piny.» Køøre Camiel aay ni but piny.

⁶ 'Ba Wuuö Jwøk acäŋ cwötö, ni «Camiel!» Ni ö Camielli ni päny maal ni ci baŋ Ëli, ni kööe, ni «Aana öö. ?A kärï cwølø na bëëde?» 'Ba aløk Ëli jïre, ni «Ï kära cwølø, wääda; ci cäŋ but piny.»

⁷ 'Ba Camiel kuue ni manøgø beeye dwør Wuuö Jwøk, kiper Wuuö Jwøk luumme poot käre nyoodhø jïre.

⁸ 'Ba Wuuö Jwøk Camiel acäŋ cwøllø ri dääge, ni ö Camielli ni päny maal ni ci baŋ Ëli, ni kööe, ni «Aana öö. ?A kärï cwølø na bëëde?» Køøre aput Ëli joot ni beeye Wuuö Jwøk ni cøør nyilaal enø.

⁹ Ni kö Ëli jï Camiel, «Ci but piny, 'ba ni näk miï cäŋe ka cwøllø, wärï kööï, ‹Wui Wuuö Jwøk, caan marï nø, kiper a na laŋŋï, ïtha yaa ciiø.› » Køøre Camiel adøøk ni but piny kare.

¹⁰ Køøre Wuuö Jwøk aöö ni cuŋŋe ni cwöte kaawat mana dïkwøŋ, ni «Camiel, Camiel.» Ni kö Camielli, ni «Caan marï nø, kiper a na laŋŋï, ïtha yaa ciiø.»

¹¹ Køøre Wuuö Jwøk aköö jï Camiel, ni «Neenï, aani a tïïö dï Icriel ki gïn mo jøw owïny gø bëët cwïnyge bwøk ki gø.

¹² 'Ba dïcäŋeca, gïna cääna kipere ni tïïa tïïö dëër dhi øt Ëli puta ka tïïc, ki mana täge ki luubö mana dïkwøŋ këël mana na aŋuudi.

¹³ Kiper aani, yaa nø caan jï Ëli ni dhi øde jääla jäälö na bäre bäre, kiper bääyö manøgø ŋääe, kiper wääte, Jwøk apäätge, 'ba eni wääte käre jooø.

¹⁴ Kiper manøgønø, aana kööŋ jï dhi øt Ëli ni gïna raac na baacge ba wëënna na bäre bäre, këël ge doo cïpö ko olämme wala muuce.»

¹⁵ 'Ba Camiel aput bëëtö no obut piny këël amöölla. Køøre ena ö maal ni jaam dhøk Øt Wuuö Jwøk. 'Ba Camiel alwäyö ki man caan gïna joode jï Ëli.

¹⁶ 'Ba Ëli Camiel acwøle ni kööe, «Nyie Camiel, wääda.» Ni kö Camielli, ni «Aani en.»

¹⁷ Ni kö Ëli, na «?Agïnaŋø na caan Wuuö Jwøki jïrï? Nyie, kär mooŋï ki aani. Ni näk mo luup moa care bëët mooŋï mooŋø ki aani, Wuuö Jwøk tïïö ki gïn mo dwøŋ mo raac dëërï.»

¹⁸ Køøre Camiel luup bëët moa caan jïre aput caan jï Ëli, ni bäŋgø mo ee mooŋø. Køøre Ëli aköö, ni «Man beeye dwør Wuuö Jwøk møn; beerra man ö Wuuö Jwøki ni tïïc mana beer ki jïre.»

¹⁹ Køøre Camiel adøøŋŋø ni Wuuö Jwøk nut buute, ni ö luupi bëët moa car Wuuö Jwøki jï Camiel ni thurge karge.

²⁰ 'Ba jø Icriel bëët, ki mana täge ki Daan na en jï løø wï-piny këël mana këët Bëërcïïba na en jï løø tier-piny, ŋäcge ni Camiel otïïc Wuuö Jwøki na nyikugö mare.

²¹ 'Ba Wuuö Jwøk acäŋ tägö ki man nyøth ree Cëëlö, ni ree nyøthe ka køør luup mo wø care jï Camiel. Ki køør manøgønø, luup moa car Camielli aput wïnynye jï jø Icriel bëët.