1 Camiel 27 - Wëël Jwøk

Luum Bëëtö Mar Deebit Dï Jø Pilitin

¹ 'Ba Deebit acäänö ki cwïnye ni kööe, ni «Ennø, a thøøa cer Cøøl dïcäŋ aciel jaak. Aani, bäŋ gïn mo bëënna bëënnö kany këët, 'ba beerra man päära wøk ni cøøa yi ŋööm jø Pilitin. Køøre nø, Cøøl yie ocwat ki many aani yi ŋööm jø Icriel, ni puta bødhø cere.»

² Kanyøgønø, Deebit aput tïŋŋö ki jø leny moe ma dïpe abïciel, ni ŋølge keew ni cige baŋ nyeny Gëth ma Akïc o Maøk.

³ Ni ö Deebiti ki jø leny moe ni putge bëëtö Gëth ki Akïc; ni Deebit ki jø leny moe, ŋati man nø bëëdö ka jø paare. 'Ba Deebit bëëdö ka määre karge riet, ni beege Akinaam nyi jø Jedhriel ka Abigël nyi jø Karmël, cï Nabal.

⁴ 'Ba kanya caani jï Cøøl ni Deebit onø reŋ Gëth, Cøøl køør Deebit aput wec ki ŋwiec.

⁵ Køøre Deebit aköö jï Akïc, «Beerra man nyoothï bäth ec marï jïra, ni cïpï ki kany bëëda yie yi pääny aciel røk päänye moi mo en paarï ii, naa bëëda yie. ?Aŋø, a na dhaanhnhï, a daa bëëdö ki ïïni na aciel yi pääny mana dwøŋ nidïï?»

⁶ 'Ba Akïc pääny mana cwøl ni Ciklak aput cïp jï Deebit dïcäŋögø; ni put Ciklaki bëëtö ni ena jï nyeny Juuda këël dïcäŋi en.

⁷ 'Ba nïne moa beet Deebiti po jø Pilitin, atïmö na cwiir aciel ki dwäde aŋween.

⁸ 'Ba Deebit ki jø leny moe ge wø aay ni tukge jø Gëcur, ki jø Gerdha, ki jø Amalëk; ni beeye ki mana täge ki Cur këël mana këët ŋööm Ijep; ni jøøgø beege jøøa beet ŋöömmögø ki mana täge ki ya acääŋŋe cøøn.

⁹ 'Ba Deebit jøøa bëëdö yi ŋöömmögø wø tuue tuuö, ni 'näk jøøgø bëët ni bäŋ dhaagø wala dïcwøø mo wiie ni kwøw; ni lwør dïëk, ki dhäk, ka arëëni, ka athïrööle, ka abïïe. Køøre eni wø duuö ni ö baŋ Akïc.

¹⁰ 'Ba kany wø pëënynyi ya Akïci, na «?A kaa na tugï yie yïth nïne moi?» eni wø köö, na «A käla kun tuga jï løø tier-piny baŋ tuuŋwa ma jø tuuŋ Juuda, ki baŋ thääŋ jø tuuŋ Juuda moa käl ri nyïïkwaac Jeramiel, ki baŋ jø Këën.»

¹¹ 'Ba Deebit bäŋ dïcwøø wala dhaagø mo wiie ni kwøw. Këël mo maae nee käl Gëth bäŋgø thuwø, kiper eni wø cädö ni kööe, ni «Gïna tïïcwa caange caanø,» 'Ba Deebit bëëdö ni tïïya teeŋ gïnögø yïth nïra beede po jø Pilitin.

¹² Kanyøgønø, Akïc Deebit aput ŋääth ni kööe, ni «Eni jø poge ma jø Icriel akwiere møn, ni tïïc ree kaamar gïn mo ŋwäänynye raac jïge; ennø, eni puta bëëtö na ŋat tïïc mara na bäre.»