1 Camiel 26 - Wëël Jwøk

Kanya Ö Deebiti Na Cäŋ Cøøl Weyø Ni Kwøw

¹ Køøre jø Jip acäŋ ö baŋ Cøøl Giba, ni köge, ni «Deebit ree ee kan bäät Kïn Akëla, na en buut ŋöömma näk dïtëën.»

² Kanyøgønø, Cøøl aput tïŋŋö ni løøc piny dï paap Dhip, ni eni cäädhi ka jø leny mo jø Icriel ma kume adäk moa teek døc, nee Deebit manynye dï paap Dhip.

³ Køøre Cøøl twïër mare atïïe bäät Kïn Akëla, buut ŋöömma näk dïtëën, thääŋ jöö. 'Ba kar kaagø, Deebit bëëdö dï paap. 'Ba kanya ö Deebiti na ŋäc gø ni Cøøl ööa køøre dï paap,

⁴ Deebit ajäägö ki dïlëëwe, ni ŋäc gø møn ni Cøøl ööa baŋe.

⁵ Kanyøgønø, Deebit aput ö maal ni ö kanya näk Cøøl twïër mare ee tïïö yi gø. Ni ö Deebiti ni joot Cøøl ni ena kar niine mare, na Abinër o Nër, kwääy lwaa leny mare, ena buute. 'Ba Cøøl obutö dïër dï twïër, ni jiy kurö deŋŋe kaagø bäre.

⁶ Køøre Deebit acäänö ka Ayemëlëk nyï Këth ka Abicay o Dheruya, cöök Jöap, ni pëëny ge ni kööe, na «?Aŋa noo aay ki aani na aciel nee wa ciwa baŋ Cøøl yi twïër?» 'Ba Abicay aköö, ni «Aani, a aay ki ïïni.»

⁷ Kanyøgønø, Deebit ka Abicay gena put ci baŋ jø leny mo Cøøl ki dïwäär. 'Ba ka adïëri møn, Cøøl obutö dïër dï twïër ni tøŋ mare ee cwöth piny wïïe, na Abinër ki jø leny moe geno but piny deŋŋe kaagø.

⁸ Køøre Abicay aköö jï Deebit, ni «Dïcäŋi, Jwøk nyimännï anø cïp cerï; 'ba ennø, beerra man wëëgï eni aani, nee këëla ki tøŋ yie aciel keere nee puta rep piny, ni ba cäŋa gø nwøyø këët.»

⁹ 'Ba Deebit aköö jï Abicay, ni «Kär niï 'näga gø, kiper ŋat moo 'näk eni, eni na tïïc Wuuö Jwøki nee wïïe thïïmmi ki maaw, ba kääŋi ka ajäl Jwøk.»

¹⁰ Køøre Deebit acäŋ köö, ni «Ŋëët Wuuö Jwøk na kwøw, ka adïëri møn, Wuuö Jwøk ni wø ŋøl luup, mare oŋøle bäät Cøøl; dïcäŋo thøøe yie opäŋ, ni put thøø, wala eni cøøa baŋ leny ni puti 'näk.

¹¹ Ŋëët Wuuö Jwøk, beerra man tïm kara ni bäär ki man kïtha cera dëër ŋata tïïc Wuuö Jwøki nee wïïe thïïmmi ki maaw; 'ba ennø, beerra man lwørï tøŋ manøgø ni ee cwöth piny wïïe enø, ka agwäy mar pïï, nee ø aaø.»

¹² Kanyøgønø, Deebit ka Abicay tøŋ ka agwää pïï aputge lwør buut wï Cøøl, ni putge aay. 'Ba bäŋ dhaanhø aciel mo oŋäc gø, wala ŋat mo opäy mo ojoot gø; kiper jiy bëët obutö, ni beeye Wuuö Jwøk na tïïc ge nee butge døc.

¹³ Køøre Deebit aput ŋut ri kïdi maya, ni cuŋŋe wï kïdi, ni yïthakicge bäär mëëth.

¹⁴ 'Ba Deebit jø leny mo Cøøl ka Abinër o Nër, arwaae ni kööe, «?Nyie Abinër, wïnyö jïrï enø?» Køøre Abinër ajutö ni kööe, ni «?Ïïna ŋa ni cwøl nyeya en?»

¹⁵ Køøre Deebit aköö jï Abinër, na «?Aŋø, ï paa dïcwøø? ?Aŋa ni caal ïïni dï Icriel? ?Aŋø na ba koorï nyeya marï en? Kiper da dhaanhø ma aöö ni manynya man 'näk nyenynyï.

¹⁶ 'Ba gïna tïïyï en beeye gïn mo raac. Ŋëët Wuuö Jwøk na kwøw, ka adïëri møn, u na jø leny, u bëët u rømi ka thøø, kiper uuni nyenynyu, na näk otïïc Wuuö Jwøki nee wïïe thïïmmi ki maaw, käru koorø. ?'Ba ennø, neenï, tøŋ mar nyeya ka agwää pïï na näk ee cïp wïïe enge kaa?»

¹⁷ 'Ba Cøøl dwør Deebit aŋiie ni kööe, ni «?Nyie Deebit wääda, manøgø beeye ïïni ni dwørï wïnynya enø?» Ni kö Deebiti, ni «Beeye aani, Awuuö, ï na nyeya.»

¹⁸ Ni cäŋ Deebiti köö, na «?Aŋø, ï na nyenynya, ï cäŋï køøra ŋweeyø aperŋø? ?Agïne na tïïa? ?Da gïn mo raac mo yaa tïïö?

¹⁹ 'Ba ennø, ï na nyeya mara, beerra man wïnynyï luupa, a na dhaanhnhï. Ni näk mo beeye Wuuö Jwøk na tïïc ïïni niï ööï maal bääta, beerra man ö Wuuö Jwøki ni jïëc olämi ni raanynya luubö manøgø yïthakiyø; 'ba ni näk mo tïïya jiyi, acïëni oen bäätge nyïm Wuuö Jwøk, kiper dïcäŋi ge riema aani wøk nee kara tïme ni bäär ki jø powa ni beege jic Wuuö Jwøk, ni marge köö, ni ‹Ci tïny juu møøk.›

²⁰ 'Ba ennø, beerra man ba køny remma piny kany mo kare bäär ki Wuuö Jwøk; kiper ïïni, ï na nyeny Icriel, ïïna ö kuna manynyï aani, a ni caal nyi twöŋö mo thiinh jaak en, ni caala mano ö dhaanhe wø ci baŋ dwaar ka ajwiero bäät kïdi.»

²¹ Køøre Cøøl aköö, «Nyie Deebit wääda, aana bääyö. Duu paac nø. Aani, a ba tïïö ki gïn mo raac dëërï këët; kiper ajooda dïcäŋi ni per jwïëya leth jïrï møn. Neenï, aana nø tïïö ki tïï bøøl, ni nø bääya ki bääyö mo dwøŋ døc.»

²² 'Ba aløk Deebiti ni kööe, ni «Neenï, ï na nyeya, tøŋ marï en; ennø, dhaanhø aciel røk jø leny moï ööe nee tøŋ lwøre.

²³ 'Ba Wuuö Jwøk ŋati man nø ocunne ki køør beer mare, ki køør ŋäädhe mare man wø ŋäädhi ki gø. Kiper Wuuö Jwøk ïïna cïp cera dïcäŋi; 'ba aana kweer ki man kïtha cera dëërï, ï na tïïc Wuuö Jwøki nee wïïe thïïmmi ki maaw.

²⁴ 'Ba ennø, neenï, kaawat man bëëde ni jwïëyï perge leth jïra dïcäŋi en, beerra man bëët jwïëya ni perge leth ki jï Wuuö Jwøk, ni ö Wuuö Jwøki ni piem aani yïth gïïo leth bëët.»

²⁵ Køøre Cøøl aköö jï Deebit, ni «Nyie Deebit wääda, gwïëth oen bäätï; 'ba ennø møn, gïï wäro tïïyï thura karge.» Kanyøgønø, Deebit aput aay ki wääthe, ni ö Cøølli ni put døø paare.