1 Camiel 25 - Wëël Jwøk

Luum Thøw Camiel

¹ Køøre Camiel athøw; ni ö jø Icrielli ni cooŋge rege kanya aciel ni kïmge kipere, ni koonyge eni paare na en Reema. Kanyøgønø, Deebit atïŋŋö ni ci dï paap Paran.

Luum Deebit Ki Nabal Ka Abigël

² 'Ba da nyen mør mo bëëdö Maøn mo tïïc mare ena Karmël. 'Ba nyenøgø beeye dhaanhø mo okwär døc, ni jïre da rööm ma kume adäk ka atëëe ma kuma. Ni kar kaagø, eni nyädö ki jïëc rööm moe Karmël kaace.

³ 'Ba nyeŋ nyenøgø beeye Nabal, ni nyeŋ cïïe beeye Abigël. Ni dhaagø manøgø beeye dhaagø mo wïïe leer ni kïte mïërö døc. 'Ba nyenøgø beeye dhaanhø ma ŋat ajage ni tïïe moe bëët reyø; ni eni, ena nyï tuuŋ jø Kalëp.

⁴ 'Ba kanya bëëde ni Deebit bëëdö dï paap, awïnynye ni Nabal nyädö ki jïëc rööm moe.

⁵ Kanyøgønø, Deebit ajäägö ki jiy apaar røk jiye, ni kööe jïge, ni «Cou Karmël baŋ Nabal ni caannu määdhe mara jïre.

⁶ 'Ba kanyo pïïyu, wär caannu jïre ni ïïna määth Deebiti ni kööe, ni ‹Met ec bëëde bäätï; bëëdï ki jööt dëël ki jø paarï, këël gïïa en jïrï bëët.

⁷ 'Ba awïnynya niï nyädö ki jïëc rööm moï. Ennø møn, jø kwaath moï abëëdö ki waani ni bäŋ gïn mo cwïnyge ewa raanynyø ki gø, këël gïn mo orwäänyö baŋge bäŋgø thuwø ki yïth nïne bëët moa beetge Karmël.

⁸ Løny ki man pëënynyï jiyï; caange caanø jïrï. 'Ba ennø møn, beerra man nyoothï bäth ec marï jï jiya, kiper waana ö baŋï ki dïcäŋ mana näk cäŋ ajwöma. A kwaya ïïni ki man cïpï gïna nut cerï jaak jï wäädï ma Deebit ki jiye.› »

⁹ Kanyøgønø, jic Deebit aöö, ni caange luup moøgø jï Nabal, ni beege luup bëët moa car Deebiti; ni putge lïŋŋe ni ge koora løk pïïc mano duu Naballi.

¹⁰ 'Ba aløk Naballi jï jic Deebit, ni kööe, «?Aŋø, Deebit aŋa? ?Eni na o Jeci enø, ena ŋa? Dïcäŋi en da laaŋe mo thööth mo geno päär wøk ki baŋ kwääri moge.

¹¹ ?Aŋø, jiy mo karge kuua jaak, daa mooø ki cam, ki pïï, ki rïŋ dïëk moa ŋara jï jiya mo wø nyaar jïëc rööm?»

¹² Kanyøgønø, jic Deebit rege aputge løk ni døøkge; 'ba kanya pïïcge, luup moøgø bëët aputge caan jï Deebit.

¹³ Køøre Deebit aköö jï jø leny moe, ni «Ŋati man nø dëëtu twöc opëëllö mare.» Ni ö ŋati man nø ni put opëëllö mare twöc. Ni ö Deebiti thuwø ni twöc opëëllö mare, ni ö jiyi ma dïpe aŋween ni putge aay ni ge cäädha køør Deebit; 'ba jø leny møøk ma dïpe ariiø adööŋ ni ge koora jammi.

¹⁴ 'Ba nyen mør røk jø tïïc mo Nabal acaane jï Abigël cï Nabal, ni kööe, «Neenï, Deebit ajääŋŋö ki jiy ki dï paap ni määtha kwäärö marwa. 'Ba eni jøøgø ajanynye.

¹⁵ 'Ba neenï, Deebit ki jiye kee gena jiy mo kunynyö kiperwa. Bäŋ gïn mo cwïnywa ege raanynyø ki gø, këël gïn mo orwäänyö bäŋgø thuwø ki yïth nïne bëët moa beetwa buutge ni wa ena kar kwaath.

¹⁶ Geni, ge caala gëëŋi kiperwa ki wäär këël dïcäŋ ki yïth nïne bëët moa beetwa buutge kaace ni wa kwaaya dïëk.

¹⁷ 'Ba ennø møn, cädï bäät luubö manøgø ni jootï gïna beerra eni ki man tïïyï gø, kiper da gïn mo raac mo tïïc Deebiti tïïö dëër kwäärö marwa, ki jøøa en paare bëët. 'Ba Nabal, ŋäcwa ni ena dhaanhø mo wïïe raac, ni bäŋ dhaanhø mo løny jïre ki man cääne ki gø.»

¹⁸ Køøre Abigël alaar lwötö ki dääpe ma dïpe ariiø, ki køøŋ nyïïomøki mo päŋ yïth opïr pëëne ariiø, ki dïëk abïïc mo onø jiiŋŋø, ki beel mo omuuö ma yïth rumme abïïc, ki nyïïomøki moa no otal mo omiiø na dhøgi ma dïpa, ki nyïï olämmi mo omiiø na dhøgi ma dïpe ariiø, ni put ge kïth bäät arëëni.

¹⁹ Ni kööe jï jø tïïc moe moa näk cwøw, ni «Ennø, bwøthu maal nyïma; ka adïëri møn, aani, a cäädhö køøru.» 'Ba Abigël bäŋ gïn mo ee caanø jï cwøre ma Nabal.

²⁰ 'Ba kanya ö nyijøøgø na cäädhe ni ena bäät arëën mare ni eni löönynya piny ki deŋ kïdi kany mo dhaanhø ba nëëni ki yie, ka adïëri møn, Deebit ki jiye ge löönynya piny ki bäät kïdi ki løøk maya ni ge cäänhnha kuna näk da eni; kanyøgønø, Abigël aput røømmø ki geni.

²¹ 'Ba kar kaagø, Deebit onø cäänö ki cwïnye ni kööe, ni «Ka adïëri møn, aana bëëdö naa koora dïëk mo nyenøgø bëët ki jaak dï paap, ni bäŋgø mo orwäänyö røk gïïa en jïre bëët; 'ba ki køør gïna beer na tïïa, acäŋ tïmö ni duua gïn mo raac jïra.

²² 'Ba diøø ka amöölla ni näk mo da dïcwøø aciel mo ena paare mo yaa wiiø ni kwøw, beerra man ö Jwøki ni raany aani, a na Deebit en.»

²³ 'Ba kanya ö Abigël na joot Deebit, ena laar eth piny ki bäät arëën mare, ni leeŋ ree piny nyïm Deebit, ni duu maal, ni këël cøŋŋe piny ni kuul wïïe piny.

²⁴ Kanyøgønø, Abigël apäth tiet Deebit ni kwac gø ni kööe, «Wui kwäärö, bääyö manøgø tïme ni ena bääta keera. 'Ba ennø, akwaya ïïni ki man wëëgï a cäännö, a na dhaanhnhï, ni cegï ïthï ki luup moo cara jïrï.

²⁵ A kwaya ïïni, ï na kwääya, luup moa car Naballi kär kïth cwïnyï; eni, ena dhaanhø mo wïïe raac. Nyeŋŋe beeye Nabal møn, kiper nyeŋŋe mana caai ki gø aput tïmö ni röömi ki bëëtö mare, ni bëëde ni tïïya gïï wø tïïc bøølli. 'Ba a na dhaanhnhï, ka adïëri møn, jiyï moa jääŋŋï, kanya öge, ge kära joodø na bäre.

²⁶ «'Ba ennø møn, ï na kwäärö mara, a kööŋŋa ŋëët Wuuö Jwøk na kwøw, ki ŋëëtï; kaawat mana ö Wuuö Jwøki na män ïïni ennø nee rem jiy ba kønynyï piny, ni ba coolï kwörï ki dëërï kiree, beerra man ö nyïïmän moï, ni beege jøøa many man tïïge ki gïn mo leth dëërï, ni tïmge kaamar Nabal.

²⁷ 'Ba ennø, beerra man ö gïïa käla jïrï, ï na kwääya, ni cïba ge jï jiyï moø ni cäädhï ki ge yøø.

²⁸ A kwaya ïïni ki man wëënnï bääyö mara, a na dhaanhnhï. 'Ba ï na kwääya, Wuuö Jwøk dhi øtø marï tïïe tïïö nee bëëde ni teek, kiper ïïni, ï këëla lenye moøgø ni en cer Wuuö Jwøk yøø. 'Ba ï puta bëëtö ni bäŋ gïn mo raac mo tïïyï ki yïth nïr kwøw moï bëët.

²⁹ Këël ni näk mo da ŋat mo ööa maal ni ŋwieya køørï ni manynya man rwääny jwïëyï, ï na kwääya, jwïëy moï bëëdö no ogwøk Wuuö Jwøki Jwøk marï ni perge leth døc. 'Ba jwïëy mo nyïïmännï wet Wuuö Jwøki wetø kany mo bäär, kaawat man wø thöör waŋ kïdi mo okïth yo okwat mar gïn wø thöör ni di wïrö.

³⁰ 'Ba kanyo tïme ni Wuuö Jwøk luup bëët moa beyø na care kiperï wëëge thur karge, ni tïïc ï na wïth jø Icriel,

³¹ kiper nee bäŋe gïn mo riï jäälï jäälö ki gø wala gïn miï døøa cwïnyï ki gø, beerra man bäŋe remø mo kønynyï piny ki jaak niï coola kwörï, ï na kwääya. 'Ba ennø, kanyo ö Wuuö Jwøki noo mooc ïïni ki bëëtö mo beer, beerra man parï wïïï ki aani, a na dhaanhnhï.»

³² Køøre Deebit aköö jï Abigël, ni «Pwøc en jï Wuuö Jwøk, Jwø Icriel, na jääŋ ïïni dïcäŋi en, nee ø røømmø ki ïïni.

³³ Ïïno gwïëth Jwøki kiper acaara marï na beer, ki køør mana mänï aani dïcäŋi ki man kønynya rem jiy piny ki jaak, ni kwöra coola aani ki dëëra kiree.

³⁴ 'Ba ŋëët Wuuö Jwøk, Jwø Icriel na kwøw, na män aani ki man tïïa dëërï ki gïn mo raac, dee niï kär laar rwänhnhö ni røømmø ki ïïni, ka adïëri møn, kanya dee tïmö na bäc øw diøø doo bäŋ dïcwøø aciel mo dööŋ jï Nabal.»

³⁵ Kanyøgønø, Deebit caammi alwøre cer Abigël, ni beege gïïa käle jïgø. Ni kö Deebiti jï Abigël, ni «Ci døø paarï ki jööt dëël nø. Neenï, aani dwørï aleŋa ni jïëa pïëc marï.»

³⁶ Køøre Abigël aay ni pïïe baŋ cwøre ma Nabal; 'ba kanya pïïe, ka adïëri møn, Nabal da cam ajwöma mo ee jiiŋŋø paare, mo caala man wø jiiŋ nyeya. 'Ba kar kaagø, Nabal bëëdö ni yie met jaak, kiper eno meer døc kiree. 'Ba Abigël bäŋ gïn mo ee caanø jï Nabal na bäre këël mana tïm pinynyi na amöölla.

³⁷ 'Ba na tïm pinynyi na amöölla, ni Nabal køøŋø onø waany wïïe, luup moøgø bëët acaan cïïe jïgø; ni ö cwïny Nabal ni put bwøk døc ni tïme kaamar dhaanhø mo othøw.

³⁸ 'Ba na tïme na køør nïne mo jïtö ka apaar, Wuuö Jwøk mare aŋøle bäät Nabal, ni put Naballi thøø.

³⁹ 'Ba kanya ö Deebiti na wïny gø ni Nabal athøw, ena köö, ni «Pwøc en jï Wuuö Jwøk, na ŋøl luubö na kare ki køør mana ö Naballi na jany aani. Beeye Wuuö Jwøk na koor aani, a na dhaanhnhe, ki man ba tïïa ki gïn mo raac. Wuuö Jwøk gïna raac na tïïc Naballi adwøk wï gø keere møn.» Køøre Deebit ajääk baŋ Abigël nee cäänö ki gø ki man tïme na dhaagø jïre.

⁴⁰ 'Ba kanya pïïc jic Deebit moa jääŋŋe Karmël baŋ Abigël, gena put cäänö ka Abigël ni köge jïgø, ni «Waana jääŋ Deebiti baŋï, nee ø aaø ki ïïni niï tïmï ni ïïna dhaagø jïre.»

⁴¹ Kanyøgønø, Abigël aput ö maal ni këël cøŋŋe piny ni kuul wïïe piny ni kööe, ni «Ka adïëri møn, a na ŋat tïïc maru, yia met ki man bëëda naa lwøga tiet jic kwääya ma Deebit.»

⁴² Køøre Abigël alaar ö maal ni eth bäät arëën, ni put aay ni cäädhi ka nyïïakuue abïïc moa näk jø tïïc moe; ni ö Abigëlli ni put wääth køør jøøa jääŋ Deebiti. 'Ba kanya pïïcge, Abigël aput tïmö na cï Deebit.

⁴³ 'Ba kar kaagø thuwø, Deebit Akinaam nyi jø Jedhriel ee nø nywøm, ni ö nyïgögø karge riet ni putge bëëtö na määre.

⁴⁴ 'Ba Cøøl nyaare ma Mikal, na bëëdö na cï Deebit, ee nø cïp jï Palti o Laaic nyï Gaalim.