1 Camiel 24 - Wëël Jwøk

Kanya Ö Deebiti Na Kweere Ki Man 'Näk Cøøl Øt Kïdi

¹ 'Ba kanya ö Cøølli na duue ki kuna ŋwiec køør jø Pilitin, acaan jïre, ni «Neenï, Deebit ena dï paap Ayn-Gadi.»

² Køøre Cøøl jø leny moa teek døc ma kume adäk alwøre røk jø Icriel bëët, ni ci kuna many Deebit ki jø leny moe deŋ kït wø bëët lääc paap moa näk caala atëëe bäätge.

³ Kanyøgønø, Cøøl apïï ri käädi mo dïëk moa en buut jöö, kany mo yie da øt kïdi; ni ö Cøølli ni døny yi gø ni mare ciin wøk. 'Ba kar kaagø, Deebit ki jø leny moe geno pï piny yi øt kïdi manøgø kany ma gøøt.

⁴ Kanyøgønø, jø leny mo Deebit aköö jï Deebit, ni «Neenï, dïcäŋi beeye dïcäŋa kö Wuuö Jwøki jïrï ni nyimännï cïbe cerï yie, ni tïïyï mana manynyï jaak dëëre.» Kanyøgønø, Deebit aput ö maal ni ŋul deŋ abïï Cøøl wøk mëëth ni kuc Cøølli.

⁵ 'Ba køøre cään, Deebit cwïnye apädhö kiper mana ŋul deŋ abïï nyeya wøk.

⁶ Køøre Deebit aköö jï jø leny moe, ni «Ŋëët Wuuö Jwøk kiree, beerra man tïm kara ni bäär ki man tïïa ki gïn mo leth dëër nyenynya na no otïïc Wuuö Jwøki nee wïïe thïïmmi ki maaw. Ka adïëri møn, cera ba kïtha dëëre, kiper beeye ŋata tïïc Wuuö Jwøki nee wïïe thïïmmi ki maaw.»

⁷ 'Ba Deebit jø leny moe ajwøe, ni män geni ki man tïïge ki gïn mo leth dëër Cøøl. Kanyøgønø, Cøøl atïŋŋö ki øt kïdi kaagø, ni aae ki wääthe na caadhe.

⁸ 'Ba na tïme na køøre cään, Deebit aö maal, ni duny wøk ki øt kïdi ni rwaac Cøøl, ni kööe, «Nyie, caan jï nyeya enø.» 'Ba kanya ö Cøølli na lwïthe køøre, Deebit cøŋŋe akëël piny ni kuul wïïe piny ni wøøra Cøøl.

⁹ Køøre Deebit aköö jï Cøøl, «?Aŋø, ï wïnynyï ŋø ki luup jiy moa köö ni Deebit manynya man tïïe ki gïn mo leth dëërï?

¹⁰ Neenï nø, ajootï, dïcäŋi ïïna cïp Wuuö Jwøki cera øt kïdi, ni kö jiya møøk niï 'näk. 'Ba cwïnya apädhö kiperï, ni kööa, ni ‹Cera ba kïtha dëër nyenynya, kiper ena ŋata tïïc Wuuö Jwøki nee wïïe thïïmmi ki maaw.›

¹¹ 'Ba ennø, Awuuö, ka adïëri møn, neen deŋ abïï marï ni en cera en; kiper deŋ abïïnï keere aŋula wøk, ni kära ïïni nääö. Ennø, wär ŋäyï ni bäŋ gïn mo raac mo ena cwïnya ki ïïni, ni bäŋ ageem maa gëëmö ki gø ki ïïni, ni bäŋ gïn mo yaa baaø dëërï; 'ba ïïni, ï bëëdö ni ïïno møør piny nyïma niï manynya jwïëya nee raanynyï.

¹² 'Ba ennø, beerra man ö Wuuö Jwøki ni ŋøl mare yïthakiyø ki ïïni, ni tïme ni beeye Wuuö Jwøk noo cool kwöra dëërï; 'ba aani cera ba kïtha dëërï.

¹³ 'Ba kaawat mana caani ya jø acääŋŋe, ni køp, ni ‹Gïn mo raac käla cwïny ŋata raac,› aani, teeŋ acaara manøgø bäŋgø cwïnya; cera ba kïtha dëërï.

¹⁴ ?Aŋø, aŋa ni køøre caathï en, ï na nyeny Icriel? ?Aŋø, ï ŋwieyï køør ŋa? ?Ï ba ŋwiec køøra, a ni caal gwök mo othøw en wala twöŋö jaak?

¹⁵ 'Ba Wuuö Jwøk na näk dïŋut luup, beerra man ŋøl luummögø yïthakiyø ki ïïni; ni ö eni ni neen tier luubö, ni ŋun aani, ni piem aani cerï.»

¹⁶ 'Ba kanya ö Deebiti na thöör luup moa care jï Cøøl, Cøøl aköö, «Nyie Deebit wääda, beeye ïïni ni dwørï wïnynya møn enø?» Køøre Cøøl aput jwøk døc ni dwøre ee tïŋ maal.

¹⁷ Køøre Cøøl aköö jï Deebit, ni «Beerra marï ki mara; kiper ïïna tïïö ki gïn mo beer kipera. 'Ba aani, mana tïïa dëërï beeye gïn mo raac.

¹⁸ 'Ba anyoothï jïra dïcäŋi ki man näk miï bëëdö niï tïïya gïn mo beer kipera; këël na bëëde ni Wuuö Jwøk a ee cïp cerï, a kärï nääö.

¹⁹ ?Aŋø, ni näk mo dhaanhø nyimänne ee joodø, a dee gø wiiø nidïï nee aae jaak? Beerra man ö Wuuö Jwøki ni mooc ïïni ki gïn mo beer kiper gïna tïïyï kipera dïcäŋi en.

²⁰ 'Ba ennø, ka adïëri møn, ajooda niï tïmö na nyeya møn, ni ö nyeci mar Icriel ni këët piny ni teek dhi cerï.

²¹ 'Ba ennø, kööŋï ki nyeŋ Wuuö Jwøk ki man näk mo nyïïkwaaya ba 'nägï køøra, ki man näk mo wïïa ba dïïrï røk jø dhi øt kwara.»

²² Kanyøgønø, Deebit akööŋ jï Cøøl. Køøre Cøøl aput døø paare, ni ö Deebiti ki jø leny moe ni cige kar gwøk røk mana en bäät kïdi.