1 Camiel 19 - Wëël Jwøk

Kanya Ö Cøølli Na Bëëde Ni Manynya Man 'Näk Deebit

¹ 'Ba acaan Cøølli jï wääde ma Jönathan ki jø tïïc moe bëët nee Deebit 'näkge. 'Ba wääde ma Jönathan yie met ki Deebit døc.

² Køøre acaan Jönathanni jï Deebit, ni kööe, ni «Wära ma Cøøl manynya gø niï nääe. 'Ba ennø, diøø ka amöölla, beerra man gwøgï riï døc ni kanï riï kany miï ba joot yie.

³ 'Ba aani, a cøøa kuna cuŋŋa buut wära yi pwöla mano enï yie, køøre a cäänö ki wära kiperï; 'ba gïno wïnynya, puta ka caan jïrï.»

⁴ Køøre Jönathan acäänö ki luup mo beyø jï wänni ma Cøøl kiper Deebit, ni kööe jïgø, ni «Ï na nyeya, beerra man ba bääyï dëër ŋat tïïc marï ma Deebit, kiper eni kär bääyö dëërï; 'ba gïï wø tïïe beege gïï mo beyø jïrï.

⁵ Këël eni thuwø, ena aay ni weta jwïëye ni 'näk nyï Pilitin mana teek døc na näk oŋääth jø poge, ni ö Wuuö Jwøki ni tïïe ki køny mo dwøŋ døc jï jø Icriel bëët. Këël ïïni thuwø, gïnögø ajootï ni mïn iï. ?'Ba aperŋø nø, ni cädï niï tïïö ki raay ki man kønynyï rem Deebit piny mo bäŋ gïn mo ee baaø en, ki man 'nägï eni ki gïn mo bäŋ tiere jaak?»

⁶ 'Ba Cøøl dwør Jönathan aleŋe, ni kööŋe, ni «Ki nyeŋ Wuuö Jwøk na kwøw, Deebit ba 'näk këët.»

⁷ Køøre Jönathan, Deebit acwøle, ni ö Jönathanni ni caan luup moøgø bëët jï Deebit. 'Ba Jönathan, Deebit akäl baŋ Cøøl, ni ö Deebiti ni bëëde buut Cøøl kaawat mana dïkwøŋ.

⁸ 'Ba leny mør acäŋ tägö, ni ö Deebiti ni cøøe ni këëde ki jø Pilitin, ni 'näk jø Pilitin mo thööth døc, ni ö jø Pilitinni ni putge bwøk nyïme.

⁹ 'Ba jwïëy moa reyø awëëk Wuuö Jwøki ööny bäät Cøøl kanya bëëde ni eno pï piny yi øde ni tøŋ ena cere; 'ba kar kaagø, Deebit pöödö ki thoom-othïënhö.

¹⁰ Kanyøgønø, Cøøl apääre ki man këël Deebit ki tøŋ nee kwøø ri øtø; 'ba Deebit ree apaanye nyïm Cøøl, ni ö tøŋŋi mana thöör Cøølli ni put pï dëër øtø. 'Ba Deebit aput reeŋø ni päär wøk dïwäänögø.

¹¹ 'Ba Cøøl ajääk po Deebit ki jiy nee Deebit koorge ki deŋ paare, nee 'näkge ka amöölla. 'Ba Mikal cï Deebit acäänö ki Deebit ni kööe, «Ni näk miï ba päär wøk dïwääni, diøø ï put ka 'näk.»

¹² Kanyøgønø, Mikal Deebit aput iith piny ki dha awëërnyeŋ, ni ö Deebiti ni put reeŋø ni päär wøk.

¹³ 'Ba Mikal gïna no otieŋø na gïn wø lam alwøre ni pïël gø bäät pëëm, ni tïïc gø no othäänh ki thänhi mo tïïc ka jïëc diel, ni rïëp gø ka aleeŋŋe.

¹⁴ 'Ba kanya ö Cøølli na jääge ki jiy nee Deebit kälge, Mikal aköö, ni «Deebit tuu.»

¹⁵ Køøre Cøøl acäŋ jäägö ki jiy nee Deebit neenge, ni kööe, ni «Kälu Deebit baŋa ni ena bäät pëëme, kiper nee eni nääa.»

¹⁶ 'Ba kanya ö jøøa jääŋŋi na dønyge yi øtø, ka adïëri møn, ajootge ni gïna no otieŋø na gïn wø lam opïël piny bäät pëëm no othäänhö ki thänhi mana näk tïïc ka jïëc diel.

¹⁷ Køøre Cøøl aköö jï Mikal, «?Aŋø, a cøøgï gø na ennø en aperŋø, ni tïïyï nyimän mara nee aae en, ni put päär wøk?» 'Ba Mikal aköö jï Cøøl, ni «Ena köö ki aani, ni ‹Wëëk aani wääth; 'ba ni näk maa mänï mänö, ï puta ka 'näk.› »

¹⁸ 'Ba Deebit apäär wøk ni reeŋe, ni ci Reema baŋ Camiel, ni caan jammi bëët moa tïïc Cøølli dëëre jï Camiel. Ni ö eni ki Camiel ni aacge ni bëëtge kany wø bëët nyïïkuk Jwøki yie na cwøl ni Newöt.

¹⁹ 'Ba acaan jï Cøøl ni køp, ni «Neenï, Deebit ena Newöt na en Reema.»

²⁰ Køøre Cøøl ajäägö ki jiy kiper nee Deebit kälge baŋe; 'ba kanya cige, lwaa nyïïkuk Jwøk ajootge ni ge pwøya Jwøk, ni Camiel cuŋŋö na bwödhi marge. Ni put Jwïëc Jwøki ö bäätge ni pwøcge Jwøk thuwø.

²¹ 'Ba kanya caan luummögø jï Cøøl, Cøøl ajäägö ki jiy møøk, ni ö jøøgø ni cige ni cäŋge tïmö ni ge pwøya Jwøk. Køøre Cøøl acäŋ jäägö ki jiy ri dääge, ni ö jøøgø thuwø ni cige ni cäŋge tïmö ni ge pwøya Jwøk.

²² Kanyøgønø, Cøøl ki dëëre aci Reema, ni aae këël mana pïïe bäät iidha dwøŋ na en Ceku; 'ba kanya pïïe kaagø, Cøøl apëëö ni kööe, na «?Age Camiel ki Deebit?» 'Ba ŋat mør aköö, ni «Ka adïëri møn, geni, ge ena Newöt na en Reema.»

²³ Ni ö Cøølli ni pööth Newöt na en Reema; 'ba Jwïëc Jwøk aö bäät Cøøl thuwø, ni put Cøøl tïïc nee Jwøk pwøe kanya cäädhe øtjöö këël mana pïïe Newöt na en Reema.

²⁴ Køøre Cøøl abïïe moa døøŋŋø agööny wøk, ni bëëde ni pwøya Jwøk nyïm Camiel; ni put bëëtö no obut piny, ni bëëdö ka abïïe moa reep ki yi cäŋ bäre ki wäär bäre. Kanyøgønø, jiy aköö, na «?Aŋø, Cøøl thuwø atïmö ni ena dï nyïïkuk Jwøk?»