1 Camiel 17 - Wëël Jwøk

Kanya Ö Göliati Na Ŋwöe Bäät Jø Icriel

¹ 'Ba jø Pilitin jø leny moge acwølge kiper nee cige baŋ leny ki jø Icriel; ni cooŋge rege pääny mana cwøl ni Cökö na en yi ŋööm jø tuuŋ Juuda, ni cige ni tïïcge twïër marge buut pääny mana cwøl ni Epec-Damim na en yïthakic Cökö ki pääny mana cwøl na Adhëka.

² 'Ba Cøøl ki jø leny mo jø Icriel rege acooŋge, ni tïïcge twïër marge goor Ëla, ni öge ni cïïmge rege na dhøgi kiper nee ge këëtge ki jø Pilitin.

³ Ni ö jø Pilitinni ni cuŋge bäät thuur løøk maya, ni jø Icriel cuŋŋa bäät thuur løøk maya, ni naam ena yïthakicge kaagø.

⁴ Køøre nyen mo teek døc mo oŋääth jø poge, mo nyeŋŋe cwøl ni Göliat, aö wøk ki dï jø leny mo jø Pilitin. 'Ba ena nyï Gëth, ni eni bäär døc, ni ni rømi, jïtö ki gööye abïciel ki wïïe, ni gööye moøgø røm ka cenø.

⁵ Ni wïïe ee kïthö ki cöör nywïënyö ma jwïël, ni dëëre ee runynyö ka abïï nywïënyö ma jwïël, mo peege beeye rumme ma kume abïïc mo røm ka rumi man wø cwøl ni cekel.

⁶ Eni thuwø otweeŋi moe ee kïthö ki gïï mo tïïc ka nywïënyö ma jwïël, ni käädö ki tøŋ mo thiinh mo ee twöö ki thøøl ni løny gø göönne.

⁷ 'Ba tøŋ mare mana dwøŋ, thiire caala athøra. Ni tøŋ mana näk nywïënyö kiree peege beeye rumme ma dïpe abïciel mo røm ka rumi man wø cwøl ni cekel. 'Ba kar kaagø, Göliat nyen wø käär jap leny jïre ee cöör nyïme.

⁸ Kanyøgønø, Göliat acuŋŋö ni rwaac jø leny mo jø Icriel moa näk rege ege cïïmmö na dhøgi, ni kööe jïge, na «?Aŋø, u öömu ŋø wøk baŋ leny? ?Aŋø, kuyu ni aani, aana ŋata teek døc na no oŋääth jø powa ma jø Pilitin? 'Ba uuni, uuna laak Cøøl møn. Ennø, jëëtu ki dhaanhø nee ö baŋa nee wa këëtwa ki gø.

⁹ 'Ba ni näk mo løny jï ŋateca ki man këëde ki aani, ni 'näk aani, jø powa puta tïmö na laaŋe jïïu; 'ba ni näk mo ŋateca bööta böötö ni nääa eni, u puta tïmö ni uuna laaŋe mowa ni putu waani tïnynyö.»

¹⁰ 'Ba nyï Pilitin manøgø acäŋ köö, na «A ŋwöö bäätu dïcäŋi ennø, u na jø leny mo jø Icriel; cïpu jïra ki dhaanhø nee wa këëtwa ki gø.»

¹¹ 'Ba kanya ö Cøølli ki jø Icriel bëët na wïnyge luup moa car nyï Pilitinni manøgø, cwïnyge abwøk ni putge lwäyö døc.

Kanya Ö Deebiti Na Kïth Caammi Baŋ Nyïïmenni Moa En Twïër Leny

¹² 'Ba Deebit beeye o Jeci nyï Eeparata, na käl Bethelem na en yi ŋööm Juuda. 'Ba Jeci jïre da wääte abära. 'Ba kanya bëët Cøølli na nyeya, Jeci oløny na jaal, mo cwiiye thöötha geni røk jø poge.

¹³ 'Ba wäät Jeci moa näk adäk na døøŋŋø geni, onø ci baŋ leny ki Cøøl na aciel. Ni nyeŋ wääte moa näk adäk na ci baŋ leny, beege kanynye ma Eliap, ki julle ma Abinadap, ki dääge ma Cimia.

¹⁴ 'Ba Deebit beeye ŋata thiinhnha eni døc røk nyïïmenni. 'Ba kanya bëët wäät Jeci moa näk adäk na døøŋŋø geni ni ge ena ri lwaa leny mar Cøøl,

¹⁵ Deebit bëëdö ni wïdö, ni cøøa po Cøøl, ni døøa Bethelem kuna kwaac dïëk mo wänni.

¹⁶ 'Ba Göliat, nyï Pilitin na teek døc na näk oŋääth jø poge, wø öö ka amöölla ka abøøya cooth, ni bëëde ni cäädhö ki nïne ma pïëraŋween, ni eni wø cuŋŋö ni ŋwöe.

¹⁷ Køøre Jeci aköö jï wääde ma Deebit, ni «Ennø, beel moi no omuuö ii na yi rumi mar iipa en, ki dääpe apaar moi, lwørï ni reŋŋï baŋ nyïïmeru twïër leny;

¹⁸ ni kwögï mädhi apaar moi na mo dhäk ii jï kwääc lwaa leny marge man wø käär jiy ma kuma; ni neenï jööt dëël mar nyïïmeru, ni duuï niï käädö ki gïn mo nyootha jööt dëël marge.

¹⁹ Kiper ennø, Cøøl, ki nyïïmeru, ki jø leny bëët mo jø Icriel, ge ena goor Ëla, ni ge këëdö ki jø Pilitin.»

²⁰ 'Ba na tïme na amöölla cøøn, Deebit apäny maal, ni wëëe ki dhaanhø mo kwaac dïëk, ni lwør caammi moøgø ni tïŋŋe kaawat mana caani ya wänni ma Jeci jïgø. 'Ba kanya pïïe twïër ennø, jø leny anwäne ni ge aa wøk ni rege ege cïïmmö na dhøgi ni ge twäädö.

²¹ Ni öge, ge na jø Icriel, ki jø Pilitin ni cïïmge rege kiper leny ni jøw raŋŋa rege.

²² Kanyøgønø, Deebit jammi moa kääre aput wii cer ŋat wø koor jammi, ni reŋ baŋ nyïïmenni kar leny nee ge määdhe.

²³ 'Ba kanya bëëde ni Deebit cäänö ki nyïïmenni, ka adïëri møn, nyï Pilitin manøgø ni teek døc enø, na näk oŋääth jø poge, ni beeye Göliat nyï Gëth, aput ö wøk ki dï jø leny mo jø Pilitin, ni cääne ki luupe ni wø care kaagø cooth; ni ö Deebiti ni wïny luup moøgø.

²⁴ 'Ba kanya ö jø lenynyi bëët mo jø Icriel na jootge Göliat, gena put reeŋø ki eni ni lwäcge døc.

²⁵ Køøre jø leny mo jø Icriel aköö, na «?Aŋø, nyenøgø ni ööi enø käru joodø? Ka adïëri møn, eni ööa kuna ŋwöe bäät jø Icriel. 'Ba ŋato 'näk nyenøgø, otïïc nyeya na dhaanhø mo okwär døc, ni cïp nyaare jïgø nee tïme na cïïe, ni tïïc dhi øt wää ŋatøgø ni ba cïpi ka ajwäk dï Icriel.»

²⁶ Køøre Deebit acäänö ki jøøa cuŋŋö buute kaagø, ni kööe, na «?Agïnaŋø noo tïïc jï ŋato käl ajøøŋ wøk bäät jø Icriel ki køør mano 'näk nyï Pilitin manøgø? ?Aŋø, nyï Pilitin manøgø ni kär daŋø enø aŋa, ni ŋwöö bäät jø leny mo Jwøa kwøw en?»

²⁷ 'Ba aløk jiyi jïre kaawat mana kwøŋge gø carø yïthakicge keerge, ni köge, ni «Teeŋ gïïa caanwa yøø di tïïö jï ŋato 'näk nyenøgø møn.»

²⁸ 'Ba Eliap, cöök Deebit mana dwøŋ, luup moa car Deebiti ki jø leny awïnynye, ni ö Eliapi ni put wëër døc ki Deebit, ni kööe, ni «?Ï öömï ŋø kany? ?Aŋø, dïëk moa thenh ni wø kwaayï dï paap, iï wiia baŋ ŋa? Aani, atöör marï ki gïïö ni reyø ni caarï ki cwïnyï yøø ŋääa; niï ööï kaper nee leny raŋï.»

²⁹ 'Ba Deebit aköö, na «?Agïnaŋø na tïïa ennø? ?Aŋø, mara paa pïëc jaak?»

³⁰ Køøre Deebit ree aløøe ni aae buut coki, ni ci baŋ dhaanhø mør, ni cäŋ luummögø pëënynyö, ni ö jøøa nut kaagø ni løkge gø jïre ni caala mana dïkwøŋ.

Kanya Ö Deebiti Na Ŋøl Acaara Mare Nee Ci Baŋ Leny Ki Göliat

³¹ 'Ba luubö mana caan Deebiti awïny jiyi, ni caange gø jï Cøøl; ni ö Cøølli ni jääk baŋ Deebit.

³² 'Ba Deebit aköö jï Cøøl, ni «Kär dee ŋat mo cwïnye bwøk ki luupögø ni car nyï Pilitin manøgø enø; aani, a na dhaanhnhï, a cøøa kuna këëda ki nyenøgø.»

³³ Køøre Cøøl aköö jï Deebit, ni «Ïïni, ï ba løny ki man ciï baŋ leny ki nyï Pilitin manøgø; kiper ï poot thiinh, ni eni, ena ŋat leny ki mana täge thïnhö.»

³⁴ 'Ba Deebit acäŋ köö jï Cøøl, ni «Aani, a na dhaanhnhï, aana bëëdö naa kwaaya dïëk mo wära. 'Ba kany wø ö ŋuuwi wala teeŋ cwieny mør kuna käde ki nyidiel dï dïëk,

³⁵ aani, a puta läp køøre ni gøøa gø, ni cööda nyidiel wøk dhee; 'ba kany wø päny baŋa, aani cwaage wø puta ka mak ni nääa gø.

³⁶ Aani, a na dhaanhnhï, aano nääö ki teeŋ lääy moøgø; 'ba nyï Pilitin manøgø ni kär daŋø enø, nääa nääö kaawat mana nääa teeŋ lääyögø, kiper mana ŋwöe bäät jø leny mo Jwøa kwøw.»

³⁷ Ni cäŋ Deebiti köö, ni «Wuuö Jwøk na piem aani cer ŋuu ki cer teeŋ cwieny mør, eni a pieme piemø cer nyï Pilitin manøgø.» Kanyøgønø, Cøøl aköö jï Deebit, ni «Wøp nø, ïïno cii; 'ba Wuuö Jwøk obëëdö ki ïïni.»

³⁸ Køøre Cøøl abïïge arøø dëër Deebit, ni kïth wï gø ki cöör nywïënyö ma jwïël, ni runy dëër gø ka abïï nywïënyö.

³⁹ Ni ö Deebiti ni twöö opëëllö bäät abïï nywïënyö mana røø dëëre, ni päär gø ki man cäädhe, kiper gïïögø poot käre päärö cøøn. Køøre Deebit aköö jï Cøøl, na «A ba aay ni gïï ena dëëra, kiper gïïögø poot kära päärö cøøn.» Køøre gïïögø aput Deebiti käl wøk dëëre.

⁴⁰ Kanyøgønø, Deebit athønynye aput lwør, ni jëëte ki nyeŋ kïte abïïc mo pøøth yi naam, ni kïth ge yo opïr mare, ni beeye teeŋ opïr man wø käär jø wø kwaac dïëk, ni kwany gïr leny mo tïïc ka kaw man wø thöör ni di wïrö ni kïdi ena yie; ni ci baŋ nyï Pilitin manøgø.

Kanya Ö Deebiti Na 'Näk Göliat

⁴¹ Køøre nyï Pilitin manøgø aput öö ni nyänh baŋ Deebit, ni ŋat wø käär jap leny jïre cäädha nyïme.

⁴² 'Ba kanya ö nyï Pilitinni manøgø na lwïthe, eni Deebit ajoode, ni put Deebit taak døc; kiper kar kaagø, Deebit poot thiinh, ni dëëre pulli, ni nëëni ni kïte mïërö.

⁴³ 'Ba nyï Pilitin manøgø aköö jï Deebit, na «?Aŋø, aana gwök na ööï baŋa niï käära athøra en?» Ni ö nyï Pilitinni manøgø ni cääne ki luup acïëni dëër Deebit ki nyeŋ juu moge.

⁴⁴ Ni cäŋ nyï Pilitinni manøgø köö jï Deebit, ni «Ö baŋa, nee rïŋ dëërï wëëga weny mo maal ki lääc paap.»

⁴⁵ Køøre Deebit aköö jï nyï Pilitin manøgø, ni «Ïïni, ï ö baŋa niï käära opëëllö, ki tøŋ mo dwøŋ, ki tøŋ mo thiinh; 'ba aani, a ööa baŋï ki nyeŋ Wuuö Jwøk, eni na wïth jammi bëët, Jwø jø leny mo jø Icriel, na ŋwöï bäätge ii.

⁴⁶ 'Ba dïcäŋi Wuuö Jwøk ï cïbe cera, ni nääa ïïni, ni ŋula wïïï wøk. 'Ba aani, dëët jø leny mo jø Pilitin moo 'näk dïcäŋi, wëëga wec maal ki lääc paap mo bäät piny, kiper nee ŋäc jø bäät pinynyi bëët ni Jwøk mana na adïëri nut dï jø Icriel;

⁴⁷ ni ö jø Icrielli moi ni rege ege cooŋ kany en, ni ŋäcge gø ni Wuuö Jwøk jiye ba kønye kiper mana dee opëëllö wala tøŋ; kiper leny bäre ena cer Wuuö Jwøk. 'Ba uuni, u na jø Pilitin, u cïbe ceŋwa.»

⁴⁸ 'Ba kanya ö nyï Pilitinni manøgø na jek ree, na ööe ni cäänhnha baŋ Deebit nee ge røømge ki gø, Deebit aput reeŋø ni läät kar leny nee ge røømge ki nyï Pilitin manøgø.

⁴⁹ Ni ö Deebiti ni rwaak cere yo opïr mare, ni lwöte ki kïdi ni kïth gø yi gïr thöör ni put thööthö, ni këël nyï Pilitin manøgø ki täärnyïm gø; ni put kïdi døny kuya, ni ö Göliati ni put pädhö ni yie ee rïëp piny.

⁵⁰ Kanyøgønø, Deebit nyï Pilitin manøgø abööte ki gïr leny mo tïïc ka kaw man wø thöör ni di wïrö ni kïdi ena yie. Nyï Pilitin manøgø akëële ni put gø 'näk møn; 'ba Deebit cere bäŋ opëëllö.

⁵¹ Køøre Deebit areeŋø ni cuŋŋe bäät nyï Pilitin manøgø, ni lwør opëëllö mar gø ni wöth gø wøk ki yi køp, ni put nyï Pilitin cwøp, ni ŋul wï gø wøk. 'Ba kanya ö jø Pilitinni na jootge gø ni ŋata teek døc na näk ege ŋäädhö othøw, gena put bwøk.

⁵² Køøre jø leny mo jø Icriel ki jø leny mo tuuŋge ma jø tuuŋ Juuda aput päny maal ni ge twäädö, ni ŋwiecge køør jø Pilitin ni ge nääö këël mana pïïcge waŋ jöör Gëth, ki dhi kiir Akarön. Ni ö jø Pilitinni moa no othøw ni dööŋ dëëtge piny waŋ jöör Caarayim, këël mana këët Gëth ka Akarön.

⁵³ Køøre jø leny mo jø Icriel gena duuö ki kuna riemge jø leny mo jø Pilitin ni twierge twëëre moge.

⁵⁴ 'Ba Deebit wï nyï Pilitin alwøre ni kïth gø Jerucalem; 'ba jap leny mo nyï Pilitin manøgø akan kar bëëtö mare.

Kanya Ö Cøølli Na Pëëny Abinër Kiper Deebit

⁵⁵ 'Ba kar kaaca, kanya ö Cøølli na joot Deebit ni cøøa wøk baŋ leny ki nyï Pilitin manøgø, Cøøl aköö jï Abinër kwääc lwaa leny, na «?Abinër, nyilaarøgø a o ŋa?» 'Ba Abinër aköö, «Wui nyeya, ŋëëtï keerï, aani, nyilaarøgø kuua.»

⁵⁶ 'Ba nyeya aköö, ni «Pëënynyï ki man näk mo nyilaarøgø a o ŋa.»

⁵⁷ Køøre kanya ö Deebiti na duue ki kuna 'näk nyï Pilitin manøgø, ena lwør Abinërri ni käl gø nyïm Cøøl ni wï nyï Pilitin manøgø poot di käärö ki cere.

⁵⁸ Kanyøgønø, Cøøl aköö jï Deebit, ni «Nyie nyilaal, ïïna o ŋa?» 'Ba aløk Deebiti, ni «Aana o dhaanhnhï ma Jeci nyï Bethelem.»