1 Camiel 15 - Wëël Jwøk

Kanya Ö Wuuö Jwøki Na Kööm Cøøl Nee Wïth Jø Amalëk Dïïre

¹ 'Ba Camiel aköö jï Cøøl, ni «Aani, aana nø jääŋ Wuuö Jwøki ni thiia maaw wïïï naa røønya ïïni na nyeya jï jiye ma jø Icriel; 'ba ennø, cek ïthï ni wïnynyï dwør Wuuö Jwøk.

² Man beeye dwør Wuuö Jwøk, eni na wïth jammi bëët, ena köö, ni ‹Jø Amalëk jääla jäälö kiper gïna tïïcge dëët jø Icriel, kanya møørge piny nyïm jø Icriel waŋjöö ni këëtge ki geni kanya öge wøk ki Ijep.

³ 'Ba ennø, ciï ni tugï jø Amalëk ni dïïrï wïthge na bäre, këël gïïa en jïge bëët, ni bäŋgø mo weyï ni kwøw; cwøw ki mään, ko obwöre, ko obwöre moa näk poot dhøøth, këël dhäk ki dïëk, ka athïrööle ka arëëni, wär put 'näk ge bëët.› »

⁴ Kanyøgønø, Cøøl jø leny mo jø Icriel aput cwøl ni kwaan geni päänya cwøl ni Thëlëm, ni tïm jø lenynyi mo jø Icriel na kume ma dïpe ariiø, ni kwään tuuŋge ma jø tuuŋ Juuda beege kume apaar, ni jøøgø bëët beege jø leny mo wø cäädhi ki tietge.

⁵ Køøre Cøøl ki jø leny moøgø gena ci pääny mar jø Amalëk, ni kange rege yïthakic kïte moa en buut päänyögø.

⁶ 'Ba Cøøl aköö jï jø Këën, ni «Ööu maal ni daagu rou buut jø Amalëk, nou ba rwöba ki geni na aciel; kiper uuni bäth ec maru anyoothu jï jø Icriel bëët kanya öge wøk ki Ijep.» Køøre jø Këën rege aputge daak buut jø Amalëk.

⁷ Kanyøgønø, Cøøl jø Amalëk aput tuk, ni 'näk geni ki mana täge ki Ëwlath këël mana këët paap Cur, na en løø Ijep jï løø kur tuul-cäŋ.

⁸ 'Ba Cøøl, Agaak nyeny jø Amalëk amaae, ni 'näk jø Amalëk bëët ko opëëllö.

⁹ 'Ba Cøøl ki jø leny, Agaak awecge ni kwøw, ni wecge lääy moa beyø geni røk dïëk, ki dhäk, ki nyïïrøøe moa no olør, ki nyïïrööm, ni lääy moøgø beege moa beyø bëët, ni kärge jïëy ki man 'näkge geni bëët; 'ba lääy moa no otaaø na reyø aputge 'näk na bäre bäre.

Kanya Ö Camielli Na Jääl Cøøl Ki Køør Dwør Jwøk

¹⁰ Køøre Wuuö Jwøk dwøre acaane jï Camiel ni kööe,

¹¹ ni «Cwïnya apädhö kiper mana tïïa Cøøl na nyeya, kiper ena gaa wøk ki man cäädhe køøra, ni käre ciik 'moa kïth bäät tïïc.» 'Ba Camiel awëër døc kiper gïna wïnynye na tïïc Cøølli, ni jwöŋe dëër Wuuö Jwøk ki yi wäär bäre.

¹² 'Ba na tïme na amöölla cøøn, Camiel apäny maal ni aae nee røømge ki Cøøl. 'Ba acaan jï Camiel, ni «Cøøl oci pääny mana cwøl ni Karmël; 'ba ena cööth piny ki gïr par wïc kaace, ni tïïya nyeŋŋe nee wïnye; køøre ena gak ni pööth Gëlgela.»

¹³ 'Ba kanya pïïc Camielli baŋ Cøøl, Cøøl Camiel amäädhe ni kööe jïgø, ni «Ïïno gwïëth Wuuö Jwøki. Aani, ciik Wuuö Jwøk akïtha bäät tïïc.»

¹⁴ 'Ba Camiel aköö, na «?Aŋø, a dööt dïëk ki dööt dhäk mo wïnynya ii a mo ŋø?»

¹⁵ Ni kö Cøølli, ni «Beege moa käl jø lenynyi ki baŋ jø Amalëk, kiper geni dïëk moa beyø ki dhäk moa beyø awecge ni kwøw, kiper nee cïpge no olämme jï Wuuö Jwøk, Jwøk marï; 'ba moa dööŋ anäkwa na bäre bäre.»

¹⁶ Køøre Camiel aköö jï Cøøl, ni «Lïŋï nø, nee gïna caan Wuuö Jwøki jïra yawïtïni caana jïrï.» Ni kö Cøølli jïgø, ni «Wøp, caanï nø.»

¹⁷ 'Ba Camiel aköö, na «?Aŋø, këël na bëëdï ni karï thiinh ki jïrï, ï kär tïmö na bwödhi mar wïth tuŋi mo jø Icriel bëët? Wuuö Jwøk ïïna tïïe nee wïïï thïïmmi ki maaw ni røønya ïïni na nyeya bäät jø Icriel;

¹⁸ ni ö Wuuö Jwøki ni jääŋ ïïni ni kööe, ni ‹Ci baŋ jø Amalëk na tïïc gïna raac, ni dïïrï wïthge na bäre bäre, ni këëdï ki geni këël mano thöörï geni.›

¹⁹ ?'Ba aperŋø na ba leŋï dwør Wuuö Jwøk, ni tïme niï lääta baŋ twëër en, niï tïïya gïn mo nëëni ni raac ki jï Wuuö Jwøk?»

²⁰ 'Ba Cøøl aköö jï Camiel, ni «Aani dwør Wuuö Jwøk aleŋa, ni cøøa baŋ gïna ö Wuuö Jwøki na jääŋ a baŋe; 'ba Agaak nyeny jø Amalëk amaa ni käla gø, ni dïïra wïth jø Amalëk na bäre bäre.

²¹ 'Ba jø leny, dïëk moa beyø ki dhäk moa beyø, na no owärö ni wär 'näk bëët, atwierge ni kälge ge nee cïp no olämme Gëlgela jï Wuuö Jwøk, Jwøk marï.»

²² 'Ba Camiel aköö, na «?Aŋø, Wuuö Jwøk yie met ko olämme mo wø waaŋ bäre ki teeŋ olämme møøk ni kaala man wïny dwøre, eni na Wuuö Jwøk? Neenï, ki man wïny dwøre pöödha eni døc ni kaala man cïpö ko olämme jïre, ni ki man leŋ mare pöödha eni ni kaala man waaŋ dwäle mo nyöök rööm no olämme.

²³ Kiper ki man gëëmö ki Wuuö Jwøk caala raay mo ŋat wø tïïc tïï ajwøa, ni ö teek wïci ni caal raac ŋat wø lam juu møøk. 'Ba ennø møn, kiper mana nø kwierï dwør Wuuö Jwøk, Wuuö Jwøk thuwø ïïna kwiere ki man bëëdï na nyeya.»

²⁴ Køøre Cøøl aköö jï Camiel, ni «Aana bääyö; aani møn, dwør Wuuö Jwøk ki dwørï adhala, kiper aana lwäyö ki jiy ni tïma naa leŋa döötge.

²⁵ 'Ba ennø møn, a kwaya ïïni ki man wëënnï bääyö mara, nøø aa ki ïïni na aciel, nee Wuuö Jwøk wøøra.»

²⁶ 'Ba Camiel aköö jï Cøøl, na «A ba aay ki ïïni; kiper ïïni, dwør Wuuö Jwøk anø kwierï, ni ö Wuuö Jwøki thuwø ni kwier ïïni ki man bëëdï na nyeya bäät jø Icriel.»

²⁷ 'Ba kanya tïme ni Camiel løga ree ennø nee aae, Cøøl cer abïïn Camiel aput mak, ni put jeeø cere.

²⁸ Kanyøgønø, Camiel aköö jï Cøøl, ni «Wuuö Jwøk nyec mar jø Icriel acööt wøk cerï dïcäŋi, ni caala abïïnögø na jeeø cerï enø, ni nø cïp gø jï ŋat ma nyï pou, mo beerra bëëtö mare ni kaala marï.

²⁹ 'Ba Jwø Icriel ni wø bëëdö ni dwøre ba dak ba cäänö ki tööt, na acaara mare ba wiile; kiper eni ba caal dhaanhø na acaara mare di wiilø.»

³⁰ Køøre Cøøl aköö, ni «Aana bääyö møn; 'ba ennø, a kwaya ïïni, tïïc aani naa wøør nyïm jø døøk powa, këël jø powa ma jø Icriel bëët, nøø aa ki ïïni na aciel, nee Wuuö Jwøk, Jwøk marï, nee wøøra.»

³¹ Kanyøgønø, Camiel Cøøl acöör nyïme, ni aacge na aciel; ni ö Cøølli ni wøør Wuuö Jwøk.

³² Køøre Camiel aköö, ni «Kälu Agaak nyeny jø Amalëk baŋa.» Ni ö Agaaki baŋe ni yie met jaak, kiper ena cädö, ni kööe, ni «Thøø na raac, kare anø pöödhö.»

³³ 'Ba Camiel aköö, ni «Kaawat mana ö opëëllö marï na tïïc mään ni bäŋ obwöre, meru thuwø dööŋ ni bäŋ nyilaal jïre dï mään bëët.» Ni ö Camielli ni put Agaak ŋørø na thäŋi Gëlgela nyïm Wuuö Jwøk.

³⁴ Køøre Camiel adøø Reema, ni ö Cøølli ni døø paare na en Giba.

³⁵ 'Ba këël kanya thøw Camielli, Cøøl käre joodø këët; 'ba Camiel abëëdö ni kïmmö kiper gïna tïïc Cøølli. Ni ö Wuuö Jwøki ni päth cwïnye kiper mana tïïc Cøøl na nyeya bäät jø Icriel.