1 Camiel 1 - Wëël Jwøk

Luum Elkana ki Määre

¹ 'Ba da nyen mør ma nyï Reema-Dhöpim na en mïëya en bäät kïte na näk kur jø tuuŋ Ipariem mo nyeŋŋe cwøl ni Elkana o Jeröam nyikwaar Eliyu, Eliyu o Töwu, Töwu o Dhup.

² 'Ba Elkana jïre da mään ariiø, ni nyeŋ aciel beeye Anna, ni ö nyeŋ maya ni näk Penana. Penana jïre do obwöre; 'ba Anna jïre bäŋ obwöre.

³ 'Ba ki yi cwiir cooth, Elkana wø tïŋŋö ki yi pääny mana bëëde yie ni ci kuna wøør Wuuö Jwøk, eni na wïth jammi bëët, ni cïpe ko olämme jïgø kanya cwøl ni Cëëlö. 'Ba wäät Ëli karge riet, ni beege Apni ki Piniac, ge bëëdö na dïlämme jï Wuuö Jwøk kaace.

⁴ 'Ba dïcäŋ wø cïp Elkana ko olämi, kur cïïe ma Penana wø cïbe cïbö jïgø ko obwöre moe bëët moa näk cwøw ki moa näk mään.

⁵ 'Ba kur Anna wø di cïbö ni ee meedø, kiper eni mëër ki Anna døc; 'ba Wuuö Jwøk Anna ee mänö ki nyöödö.

⁶ 'Ba cooth Anna yie wø cwaat nyäge cwaadø døc këël mano räny cwïnye, kiper mana näk eno män Wuuö Jwøki ki nyöödö.

⁷ 'Ba kany wø ci Anna Øt Wuuö Jwøk na en Cëëlö ki yi cwiir cooth, yie wø cwaat nyäge cwaadø døc këël mano jwöŋe ni kweere ki cam.

⁸ Køøre cwøre ma Elkana wø köö jïgø, ni «?Anna, ï jwøgï ŋø? ?Ï ba cämï aperŋø? ?Aperŋø ni bëëdï ni cwïnyï opädhö en? ?Aŋø, ba letha pera jïrï ni kaala obwöre mo thööth?»

Kanya Läm Anna Jï Jwøk Nee Jïte Ki Nyilaal

⁹ 'Ba dïcäŋ aciel ni Elkana ki määre ge ena Cëëlö, kanya nø lønyge ki cam, Anna aö maal. 'Ba Ëli na bëëdö na Kwääy Lam Mana Dwøŋ opï piny bäät køøm buut jaath dhi øtø mar Wuuö Jwøk.

¹⁰ 'Ba Anna yie akeeye ni jwöŋe døc, ni läme jï Wuuö Jwøk.

¹¹ Kanyøgønø, ena kööŋ jï Wuuö Jwøk ni kööe, «Wui Wuuö Jwøk, ï na wïth jammi bëët, ni näk mo caannø mara raŋï raŋø møn, a na laŋŋø marï, ni lääŋŋï aani, ni ba wïl wïïï ki aani, a na laŋŋø marï, ni cïpï jïra ki nyilaal ma dïcwøø, aani nyilaal maneca puta ka cïp jïrï, ï na Wuuö Jwøk, këël yïth nïr kwøw moe bëët moo beede; 'ba wïïe bäŋ doo lielø na bäre.»

¹² 'Ba kanya bëëde ni Anna lämö jï Wuuö Jwøk, Ëli bëëdö ni neeta dhi gø.

¹³ 'Ba kiper mana näk Anna lämö ka cwïnye, ni dhee keere beeye na nemmi, ni dwøre ba wïnyi, Ëli acädö ni Anna mare beeye meerø.

¹⁴ Køøre Ëli aköö jïgø, «?A këël kany mo nyïëdi noo bëëdï niï meeyø? Wec maath nø.»

¹⁵ 'Ba aløk Anna ni kööe, «Wui kwäärö, jïra bäär, aana dhaagø mo bëëtö mara teek; aani, a kär mädhö ki køøŋ nyïïomøki wala teeŋ køøŋø mo keec. 'Ba beeye mara na en cwïnya bäre na caana jï Wuuö Jwøk enø.

¹⁶ Kärï cädö ni aana dhaagø mo raac; kiper mara beeye lam jï Jwøk kiper caannø mana näk aano caannø ki gø, ki cwat ec mana näk yia ocwaadø ki gø.»

¹⁷ Køøre aløk Ëli jïre ni kööe, «Nya nyaara, ciï ki met ec nø; Jwø Icriel gïna kwayï baŋe enø owëëk ïïni.»

¹⁸ Ni kö Anna, ni «Beerra man bëët yiï ni met ki aani.» Ni ö Anna ni put aay, ni cäme ni täärnyïme leer jaak.

Kanya Lwaar Anna ki Nyilaal Ni Cïp Gø Kur Keere Jï Wuuö Jwøk

¹⁹ Køøre Elkana ki määre, gena päny maal ka amöölla cøøn ni wøørge Wuuö Jwøk, ni putge døø poge na en Reema. 'Ba Elkana aci baŋ cïïe ma Anna na dhaagø, ni ö Wuuö Jwøki ni køny Anna ki man jïte ki nyilaal.

²⁰ 'Ba na päŋ nïr lwaarri, ena lwaar ki dhaanhø ma dïcwøø; ni cak nyeŋ gø ni Camiel, ni kööe, ni «Kiper eni kwaa baŋ Wuuö Jwøk.»

²¹ Køøre nyenøgø ni Elkana enø aay ki jø paare bëët nee cïpe ko olämme mo wø cïp ki yi cwiir cooth jï Wuuö Jwøk, ni cïpa gïna kööŋe kipere.

²² 'Ba Anna keere kär aay, kiper acaane jï cwøre ni kööe, ni «Aani, a ba ci kunece këël mano män nyilaal ki caak. 'Ba kanyo mäni ki caak nø, eno käla ni kïtha gø nyïm Wuuö Jwøk nee put bëëtö kaace na bäre.»

²³ 'Ba cwøre ma Elkana aköö jïgø, ni «Tïïc mana beerra eni ki jïrï. Løny ki man dööŋï këël mano män nyilaal ki caak; 'ba beerra man ö Wuuö Jwøki ni wëëk luumme thur kare.» Kanyøgønø, Anna aput dööŋŋe ni bëëde ni dhwøtha wääde këël mana män gø ki caak.

²⁴ 'Ba kanya ö Anna na män nyilaal ki caak, nyilaal aput lwør ni aae ki gø, ni kääde ki nyirøøa ma rwaath mo cwiiye adäk, ki møø mo røm ki rumi mana cwøl ni iipa, ki køøŋ nyïïomøki mo ena ya agwäy, ni aae ni kïth nyilaal Øt Wuuö Jwøk na en Cëëlö. 'Ba kar kaagø, nyilaal poot thiinh døc.

²⁵ Køøre geni nyirøønnøgø na rwaath enø aŋaalge, ni kïthge nyilaal baŋ Ëli.

²⁶ 'Ba Anna aköö jï Ëli, «Wui kwäärö, aani a kööŋŋa riï; kar kaaca dhaaŋŋa cuŋŋö buutï kany na lämö jï Wuuö Jwøk beeye aani.

²⁷ Aana lämö naa jïta ki nyilaal, ni ö Wuuö Jwøki ni cïp nyilaari en jïra.

²⁸ Aani thuwø nyilaal man acïba kur keere jï Wuuö Jwøk; këël yïth nïr kwøw moe bëët eni puta bëëtö ni ena kur keere jï Wuuö Jwøk.» Køøre Elkana Wuuö Jwøk awøøre kaace.