Biblia Todo Logo
Bìoball air-loidhne

- Sanasan -

Taitus 3 - Aria New Testament


Itodue elio itau vala

1 Omsruk osep aitno lisak ma tidong moli ke osep ka tivri mgo ke omur omur e ke osep gavman ina e tididi urok pelengon. E tidong redi ma tidue bokongon bitna bitna ka itau.

2 Amwai ke isak ma tiwai soulu ke osep kovok. Aling aling aitno lisak dong epen vala e tidue mada ke osep e tidue elio itau ke osep ka pula keniye.

3 Emile oglou ite blang iteile omur ke Ida Tapolngon kovok e itotuk ila pelengon. Alo ari Satan pagolgol aitno lite deka itedidi Ida Tapolngon ila pelengon kovok. Deka itodong langka elio epmes ina plau ite e itedidi elio soulu. E aitno lite itau ke elio soulu e itedidi pampamu lite. Itedidi elio ka aitno lite amnga e aitno lite soulu ke osep leklou e itangale urok wan bitna bitna. Aitno lite engil ke osep e aitno lisak engil ke ite blang.

4 Itodong langane deka Ida Tapolngon ka iye Ida Luangan blang lana iye omba ke ite. Iye makai ite e nis ite ke wan ka iye due ke ite kodong.

5 Deka iye lua ite ke udo elio epmes ina. E aitno mter ke elio itau ka itodue e iye lua ite ke udo elio epmes ina kovok. Aurou. Iye tona aitno due ite deka iye lua ite ke udo elio epmes ina. Iye langka ris ite deka itopolou langka mimi edimor. Deka Ano Itau kar ite udo mosongon ka oku ina.

6 Ida Tapolngon tuktuk Ano Itau karanga ke ite kente kente kesua batne ke Ida Luangan Yesus Krais.

7 Ida Tapolngon makai ite e due ite itopolou itau lokono ke bitna. Ke elio langane iye rere ite ma itodong ke udo mosongon ka oku ina aling aling. E itodong itapara ke udo mosongon ka dong vala dong.

8 Pelengon ane lokono lokono. Ngawaiki amwai pelengon dagar ke osep ka pula keniye ka aitno lisak dagar ke Ida Tapolngon. Amwai ke isak ma aling aling tidue elio itau vala. Tidue elio isuk isuk ka itau ma tilua osep pula ine.

9 E ompul dogur ke elio ka umotuk opmu pulu. E ke basikngen bitna bitna ka la ke osep urok seia angainsak. E ke elio ka umotuk opmu pulu ke Moses ila sogongon lana ine. Kesua pelengon langane manga manga e pelengon adai vala e karanga lua ite ma itedidi elio itau kovok.

10 Langka gute gesa wai pele-ngon ka due Ida Tapolngon ila osep tidardar deka amwai pelengon dagar ke iye ma ommosi aitno. Ma iye wai langane blang kovok. Langka omdue langane aling orwo ina e iye dau klingen pelengon kovok deka umopul dogur ine e umodong kap iye kovok.

11 Umo-due elio langane kesua iye ile kodong iye songon elio itau e due elio epmes ina vala. E ila elio epmes ina nisngen ke iye tona.


Pol waiki Taitus me ke iye

12 Mase ma ngapagei gute Artemas koke gute Tikikus uti ke wom. Alo ka gute polou ma omsuong omo ke ngong ke armok Nikopolis. Kesua ngawaiki nga-dong ke armok tonari la lama taim ka omur epen e engen dagar mela yagos.

13 Emkere gute Apolos e gute Senas itau. Senas iye gute ka ile omur itau ke pelengon dagar bitna bitna. E omlua isak ke wan bitna bitna ke urok langan ma urok wan bitna bitna dong itau.

14 Nga-waiki aling aling Ida Tapolngon ila osep tidue elio itau. Elio langka tilua osep ka urok wan isuk boto vala. Ma tidong adai e tidue wan ulik ulik kovok.

15 Osep ka pula keniye ka tidong kap ngong tiwai “oklou itau” ke wom. E ngawaiki wom Taitus amwai “oklou itau” ke osep ka aitno lisak dagar ke Yesus e aitno lisak itau ke imi blang. Ida Tapolngon ila makaingan dong kap umu ka pula keniye.

copyright 2003 New Tribes Mission, Sanford, FL 32771

New Tribes Mission
Lean sinn:



Sanasan