Taitus 2 - Aria New Testament

Taitus parere osep ke pelengon lokono

¹ Deka Taitus. Alo ka amparere osep amparere isak ke pelengon lokono vala.

² Amparere osep arang ka namormor ma tinim aki dagar ma amtarsak balilu kovok. Ma tile isak itau e tididi elio itau vala. E tivri dagar ke aitno lisak ila dagar e ke elio ka isak lana isak ke osep ka pula keniye. E langka wan gesa polou ka opru isak ma tivri dagar ine.

³ E amparere apmang ka namormor blang ma tidue elio ka Ida Tapolngon aitno itau ine vala. Ma tidue adis ke osep leklou kovok. Aling aling tinim aki dagar ma amtarsak balilu kovok. E tiparere apmang pasinga oku ina ke elio itau vala.

⁴ Tiparere apmang pasinga oku ina ma aitno lisak la ke sasarak e titorok blang.

⁵ E apmang pasinga oku ina tiplau isak itau e tididi elio itau vala. E tile elio ka tidue urok bokongon bitna bitna itau e tidue elio itau ke osep. E tidong moli ke urok soboget e tini urok pelengon. Tidue elio itau langane ma osep tikaranga tiwai soulu ke Ida Tapol-ngon ila pelengon kovok.

⁶ E amwai ke osep ka auram aitno ma isak blang tiplau isak itau vala.

⁷ Deka Taitus ke wan ka pula keniye ka omdue ma omdue elio itau ine vala ma osep tivati lem elio isuk isuk itau e tikanae. Alo ka amparere osep amwai osuk vala e omdue anit ke Ida Tapolngon ila pelengon.

⁸ Amwai pelengon lokono vala deka osep tikaranga tiwai soulu ke lem pelengon kovok. E tikaranga tituk orsak pulu kap wom kovok. Deka ma isak mnak isak ke urok elio soulu e tikaranga tiwai blang kovok.

⁹ Amwai ke osep ka isak wok-boi nating langane. Tididi osep ka tiplau isak urok pelengon e aling aling tiboko itau ke wan bitna bitna keniye ma inarak gute aitno itau ke urok bokongon. Langka gute tonari wai deka tituk ila pelengon kovok.

¹⁰ E tipanako wan ke osep ka tiplau isak kovok. E tidue elio itau e tididi osep ka tiplau isak urok pelengon vala. Langka tidue langane ma osep aitno lisak itau ke Ida Tapolngon ka iye Ida Luangan blang ila pelengon.

Elio ka itodong itapara ke Yesus

¹¹ Iteile Ida Tapolngon due ila makaingan polou malak kodong. Ke ila makaingan iye karanga lua ite ka pula keniye ke udo elio epmes ina.

¹² Ida Tapolngon ila makaingan nis ite ke elio ka itopul dogur ke elio ka Ida Tapolngon aitno soulu ine. E nis ite ma itepli elio soulu bitna bitna ka taklak ane ina. E nis ite ma itaplau ite itau e itodue elio itau vala ka Ida Tapolngon aitno itau ine alo ka itodong ke taklak ane.

¹³ E aitno lite dagar ke Ida Tapolngon e itapara ke oklou ka ite ma itavati iye e itapara ke Ida Luangan Krais Yesus ka iye itau lokono. Ma iye polou malak lokono deka itavati iye kap ila bublongon e ila arit.

¹⁴ Yesus Krais mete e kasip amunte. Iye kli udo elio epmes ina e klok udo elio epmes ina la kesua iye waiki itopolou ila osep ka itau lokono. Deka itodong itau lokono sep ila sorip. E aitno lite itau lokono ma itodue elio itau vala.

¹⁵ Deka Taitus. Aling aling amparere osep ke pelengon ane e omsruk aitno lisak ma tididie. E amwai dagar ke osep ka tididie itau kovok. Omdue langane ma osep tidue anit ke wom.