Pas ka Pol sogoe uti la ke osep Rom ina 9 - Aria New Testament

Pol aitno kro ke osep Israel ina

¹ Ngawai pelengon lokono e ngayak kovok. Kesua ngong Krais ila gute bokongon ina. Ano Itau plau aitno lungong ma ngakaranga ngaile elio itau e elio soulu deka ngaile ngayak kovok e ngawai lokono vala.

² Ngawai lokono e aitno lungong kro lokono e aitno lungong soulu lokono ke lou osua osep Israel ina.

³ E aitno lungong langane. Ngawaiki ngalua osep Israel ina ka lou osua ma Ida Tapolngon kot isak kovok. Ngawaiki ngakasip osep tonari amunsak ma Ida Tapolngon kot isak kovok e ngawaiki ma ila kotngon due ngong vala. Langka elio langane karanga lua osep Yuda ina ngawaiki ma Ida Tapolngon kot ngong ine. E elio tonari karanga polou kovok.

⁴ Ida Tapolngon rere osep Israel ina ila osep e tivati ila bublongon ka bublo omba. Iye wai promis dagar ke isak e ma iye tona didie. Iye kar isak Moses ila sogongon. Iye kar isak sogongon tonari e iye waiki tididie e ma aitno lisak la ke iye.

⁵ Osep Israel ina tiduru ke urok seia ka angainsak omba urok osua. E Krais ila osua ka didi itosep dong ke osep Israel ina. Krais tona Ida Tapolngon lokono e plau wan ka pula keniye. Ma itakakai angaine tito la egim lokono dong vala dong. Lokono.

Osep ka Ida Tapolngon rere ila osep

⁶ Gute Israel ila napakngan isak keniye Ida Tapolngon ila osep kovok. Lama langane Ida Tapolngon ila pelengon dagar ka la ke isak dau dong lokono.

⁷ Lama osep ka pula keniye urok napakngan ka la ke oglou lokono Abraham dau osep leklou tonari Abraham titno lokono kovok. Kesua Ida Tapolngon wai ke osep ka Abraham ila napakngan lokono tipolou ke Aisak.

⁸ E langane. Abraham ila napakngan leklou Ida Tapolngon titno kovok. E Abraham ila napakngan ka tipolou kesua batne ke Ida Tapolngon wai dagar ke Abraham ine iye vati isak kensak kensak langka Abraham ila napakngan lokono.

⁹ Kesua oglou Ida Tapolngon wai promis ke Abraham langane. “Mase ke taim ka ngarere kodong ma ngabauluk ngapolou ke wom e ari ma Sara divir otno arang kodong.”

¹⁰ Silang blang langane. Rebeka divir titno arang orwo ka pmarak gute kene ka Aisak ka udo apa.

^11-12 Alo ka Rebeka dau divir padanga kovok Ida Tapolngon palongo Rebeka ila ke elio kene kene ka ma polou ke titno arang orwo. Iye wai mimi ka sisu bitna ma mgo e plau mimi ka sirngen. Ida Tapolngon wai langane alo ka mimi orwo tonari dau tipolou kovok. Iye wai langane alo ka isak dau tidue elio soulu koke elio itau kovok. Iye wai langane kesua batne iye didi aitno e rere osep ka iye waiki rere isak. Iye didi itosep udo elio gesa ine kovok. Aurou. Iye rere osep ka iye waiki rere isak.

¹³ Elio ane eriar langka Ida Tapolngon ila pelengon ka oglou osep tisogo ine. Osep tonari tisogo Ida Tapolngon aitno langane. “Ngong lana ngong ke Jekop e ngapli Iso.”

¹⁴ Ida Tapolngon due elio langane e aitno lite lange ine? Ma itawai Ida Tapolngon due elio soulu ine koke aurou? Aurou. Ma itawai langane kovok.

¹⁵ Kesua Ida Tapolngon wai ke Moses langane. “Osep ka ngawaiki aitno lungong due isak ma aitno lungong due isak. Ma ngalua isak kesua aitno lungong soulu ke urok mosongon.”

¹⁶ E langane. Itosep udo elio gesa dong ka mter Ida Tapolngon aitno ma aitno due ite kovok. Aurou. Iye didi aitno e aitno due osep ka iye waiki aitno due isak.

¹⁷ Ke Ida Tapolngon ila pelengon iye wai ke Fero langane. “Ngadue wom emvri mgo ke omur Isip. Ngadue lang-ane kesua batne ma osep ka pula keniye ke taklak ka pula keniye tivati lou arit ka ngadue ke wom. E ma osep pula tikakai angain ngong tito la egim ine.”

¹⁸ E Ida Tapolngon aitno due osep ka iye waiki aitno due isak e iye pono osep aitno lisak ka iye waiki pono isak.

Ida Tapolngon ila kotngon e ila makaingan

¹⁹ Ida Tapolngon ila elio lang-are dong. E ngaile ma gute gesa pmi ngong ine langane. “Ina lange Ida Tapolngon wai osep epmes ina urok elio vri ke isak? Kesua iye didi aitno e sei dong ka karanga dangdang Ida Tapolngon ke elio gesa ka iye waiki due?”

²⁰ Aisudo ke umu osep. Umu sei ma umawai ke Ida Tapolngon langane? Langka gute gesa boko ke ila wan gesa ma wan tonari pmi iye langane. “Ai oka ina lange omdue ngong eriar langka ngadong ane?”

²¹ Wan tonari ma wai langane kovok. Langka gute gesa waiki boko ke taklak oplok ma due ulo ine iye karanga due langane. Langka iye waiki kapo ulo itau ma ina ngangon dong ine iye karanga due langane. E langka iye waiki kapo ulo ma iye due tokonkon sep ine iye karanga due langane blang.

²² Ida Tapolngon ila elio lang-ane blang. Osep pula tidue elio epmes ina bitna bitna ka due aitno engil ke isak. Deka iye waiki aitno ila engil due osep tonari ma osep pula tivati ila arit. Lama iye waiki due elio langane lokono iye due langane kovok. Aurou. Iye dong dau tauni ine e lokono aitno ila engil due isak kovok.

²³ Iye dong dau tauni ine kesua batne ke osep leklou ka iye waiki aitno due isak. Iye waiki osep tonari tidong itau ke ila bublongon ka itau lokono. Kesua oglou ari kodong iye rere osep tonari ma tidong itau ke ila bublongon.

²⁴ E langane. Osep tonari ka iye rere ma tidong ke ila bublongon isak itosep ane. Iye rere osep leklou ka itosep Yuda ina e osep leklou blang ka isak osep Yuda ina kovok.

²⁵ Gute napaprangan ina Hosea sogo Ida Tapolngon ila pelengon langane. “Ma ngawai ke osep ka oglou isak lou osep kovok isak tidong lou osep. E ma ngawai ke osep ka oglou ngong lana ngong ke isak kovok ngong lana ngong ke isak.”

²⁶ E Hosea wai silang blang langane. “Ida Tapolngon wai ke osep ka tidong ke omur ka oglou ila osep tidong ine kovok ma mase ila osep tidong ine. E ma osep tisir isak Ida Tapolngon ka ila mosongon dong ke iye isak ila osep isak.”

²⁷ Aisaia wai ke osep Israel ina langane. “Lama tipolou pula pula langka misuon ina lavu Ida Tapolngon lua gute kene kene vala ke ila elio epmes ina.

²⁸ E ma Ida Puda suong due ila kotngon ke osep epmes ina ka pula keniye ka tidong ke omur ka pula keniye.”

²⁹ Ma elio ka oglou Aisaia wai ine ma polou lokono. Alo ari Aisaia wai langka Ida Puda ka ila arit ombatno lokono makai itosep kovok deka ila kotngon ma kot itosep keniye. Langka iye makai ite kovok ma itopolou yagos eriar langka osep Sodom ina e osep Gomora ina tipolou yagos.

Ida Tapolngon ila omon itau karanga ke osep Israel ina

³⁰ E aitno lite lange ke elio tonari? Kesua oglou ari osep ka isak osep Yuda ina kovok tikrim ekreng ma tipolou itau e osuk ke Ida Tapolngon bitna kovok. Lama langane Ida Tapolngon due isak tipolou itau e osuk ke bitna kesua aitno lisak dagar ke iye.

³¹ E osep Israel ina ka tiwaiki tididi elio ka due isak tipolou itau e osuk ke Ida Tapolngon bitna tibure.

³² Kesua isak kensak kensak tididi urok elio ka tiwaiki due isak tipolou itau e osuk ke Ida Tapolngon bitna. E aitno lisak dagar ke iye kovok. Urok elio eriar langka osep ka kamsak tinepir ke opmu gesa e tigene ine.

³³ E elio tonari eriar langka Ida Tapolngon ila pelengon ano ka wai langane. “Osep umoklingen. Ngadue opmu gesa dong ke omur Saion e osep pula kamsak tinepir ine e tigene ine. E osep keniye ka aitno lisak dagar ine ma aitno lisak soulu ine kovok. Aurou. Ma aitno lisak itau ine vala.”