Pas ka Pol sogoe uti la ke osep Rom ina 8 - Aria New Testament

Ano Itau plau osep Kristen

¹ E eknikane Ida Tapolngon aitno engil ke itosep ka iteneklep ke Krais Yesus kodong kovok. Aurou. Aitno epen ke ite vala e ma iye mulu ite kovok.

² Eknikane Ida Tapolngon Ano Itau plau ite kesua iteneklep ke Krais Yesus kodong. Iye plau ite e elio epmes ina e metengen karanga kis ite ma tiplau ite blang kovok.

³ Oglou osep ka tididi Moses ila sogongon vala tipolou itau e osuk ke Ida Tapolngon bitna kovok. Kesua elio epmes ina dong ke pampamu lisak e tidar sogongon tonari vala. E Ida Tapolngon due ite itopolou itau e osuk ke bitna batne ke Otno Arang Yesus. Oglou Ida Tapolngon pagei Yesus ke itosep e ari iye dong langka itosep blang. E iye polou Ida Kasipngen ka kli itosep udo elio epmes ina.

⁴ Yesus polou itosep ka pula keniye Ida Kasipngen e kli udo elio epmes ina. Iye kli ite ma itedidi udo elio oglou ina kovok e ma Ano Itau plau ite itau. Ma itodong itau e osuk ke bitna eriar langka osep ka tidar Moses ila sogongon aling kene gesa kovok.

⁵ Osep ka elio oglou ina vala pagei pampamu lisak ma aitno lisak mter ke elio epmes ina bitna bitna vala. E osep ka Ano Itau plau isak ma aitno lisak mter ke elio itau bitna bitna ka Ano Itau waiki tidue.

⁶ Silang blang langane. Osep ka aitno lisak mter ke elio epmes ina bitna bitna vala ma timete ine. E osep ka Ano Itau plau isak ma tidue mosongon ka itau dong vala dong e ma aitno lisak tidong epen vala.

⁷ E osep ka elio epmes ina plau isak vala isak Ida Tapolngon ina oul. Kesua tidar ila pelengon e tididi aitno lisak vala. Osep ka langane tidar ila pelengon vala e tikaranga tididie kovok.

⁸ Osep ka elio oglou ina pagei isak vala ma Ida Tapolngon aitno itau ke isak kovok.

⁹ E langka umu io elio oglou ina pagei pampamu lumu kovok. Kesua Ida Tapolngon Ano Itau ka dong ke aitno lumu plau umu vala. E osep ka Krais Ano Itau dong ke aitno lisak kovok isak Krais ila osep kovok.

¹⁰ Umu ka Krais dong ke aitno lumu umopolou itau e osuk ke Ida Tapolngon bitna kodong. Lama pampamu lumu mete batne ke elio epmes ina ka dong ke isak ma anmu tidong itau lokono vala.

¹¹ Oglou Yesus mete deka ari Ida Tapolngon due poga tito ke ina denga. E umu ka Ano Itau dong ke aitno lumu ma Ida Tapolngon due umu umopoga umetito ke upu denga. Ma iye due elio ke umu langka oglou iye due ke Yesus. E ma iye due pampamu lumu tipoga titito ke inarak denga.

¹² Sipmi. Ano Itau dong ke aitno lite ma plau ite. E Ida Tapolngon waiki ma itedidi ila plaungan vala. E iye waiki ma itedidi elio oglou ina ka dong ke pampamu lite kovok.

¹³ Langka umedidi lumu elio oglou ina vala ma umemete ine. E langka umedidi Ano Itau ila plaungan vala ma umodue elio oglou ina mete deka umodue elio epmes ina bitna bitna kovok. Deka ma umodong itau vala.

¹⁴ Osep ka Ida Tapolngon Ano Itau plau isak itau isak Ida Tapolngon titno.

¹⁵ Ida Tapolngon tuktuk Ano Itau ke ite kente kente ma lua ite. E Ano Itau dangdang ite ke elio ka itoulou tarna lite ke wan bitna bitna e ma elio tonari plau ite blang kovok. Ida Tapolngon tuktuk Ano Itau ke ite ma itopolou titno vala. Deka Ano Itau due ite ka titno aitno lite e itawai ke Ida Tapolngon langane. “Abo. Livou.”

¹⁶ Ite kente kente itesir Ida Tapolngon Livou kesua ite titno ite. E Ano Itau ka dong ke aitno lite kodong wai ke ite kente kente ine blang langane. “Wom Ida Tapolngon otno gesa.”

¹⁷ E ma Ida Tapolngon kere ite ka titno langka iye kere Krais. Ila kerengen ka la ke Krais kodong ma me ke ite ka titno blang. E silang blang langane. Langka oglou agegeng polou ke Krais agegeng ma polou ke ite blang. E silang blang langane. Eriar langka Ida Tapolngon kakai Yesus ma iye kakai ite kap iye blang.

Alo ka itodong itau ke omur heven

¹⁸ E ngaile agegeng ka polou ke ite batne aitno lite la dagar ke Yesus isak wan gesa kovok. Kesua ma itodong itau lokono kap Ida Tapolngon ke omur heven. Deka ari ma udo mosongon dong itau lokono.

¹⁹ Eknikane Ida Tapolngon ila duengen keniye dong e para ke alo ka iye nis osep ka pula keniye ke osep ka isak Ida Tapolngon titno.

²⁰ Oglou oglou ari Ida Tapolngon ila duengen keniye tidong itau lokono. Mase iye due isak tipolou soulu e eknikane ila duengen keniye tidong soulu vala. Ma tidong soulu e tipara ke alo ka ma iye kere isak ma tipolou itau lokono blang.

²¹ Alo ka Ida Tapolngon ma due ila duengen tipolou itau lokono blang e ma isak tikaranga tipolou okus blang kovok. Aurou. Ma tidong itau vala. Deka alo ari alo ka elio ane polou ma iye due ite ka titno ite ma itodong itau lokono kap iye ke omur heven.

²² Iteile omur oglou ari me iding ke eknikane Ida Tapolngon ila duengen ka pula keniye tidong soulu e tingangir langka apmang gesa ka mimi ngene.

²³ E ite ka titno lokono aitno lite kro ine blang. Aitno lite kro ine kesua itapara ke alo ka itodong kap Ida Tapolngon. Iye kar Ano Itau ke ite kodong e itapara ke alo ka iye due pampamu lite tipolou itau lokono.

²⁴ Aitno lite la dagar ke Ida Tapolngon deka iye lua ite. E aitno lite dagar ma iye due pampamu lite tipolou itau lokono. E iye due pampamu lite tipolou itau lokono dau kovok. E dau itapara ine.

²⁵ E eknikane itapara ke alo ka Ida Tapolngon due pampamu lite tipolou itau. Itodong itapara ine e aitno lite kro ine kovok.

²⁶ Itodong itapara e Ano Itau ka dong ke aitno lite lua ite ine. Ano Itau lua ite kesua aitno lite tipolou dagar lokono dau kovok. E iye lua ite alo ka itawai itau ke Ida Tapolngon. Iye lua ite ine kesua iteile omur ke pelengon ka Ida Tapolngon waiki itawai la ine dau kovok. Deka Ano Itau dong ke aitno lite ma iye loulou ke ite ke Ida Tapolngon. Deka iye wai pelengon ka itakaranga itawai ine kovok.

²⁷ Ida Tapolngon ile omur ke itosep aitno lite. E silang blang langane. Iye ile omur ke Ano Itau ka dong ke aitno lite aitno. Iye ile omur ine kesua Ano Itau didi Ida Tapolngon aitno e loulou ke ite ma Ida Tapolngon lua ite ka ila osep.

²⁸ E iteile omur ine langane. Ite ka ite lana ite ke Ida Tapolngon iye rere ite ila osep kodong. E elio keniye ka polou ke ite batne langane. Ida Tapolngon due isak tipolou ke ite ma tilua ite ma udo mosongon polou itau lokono e ma itodue wan ka iye rere ke ite.

²⁹ Oglou ari Ida Tapolngon rere ite kodong ma itopolou eriar langka Otno Arang Yesus. Iye rere ite deka Yesus ina saiver ite e ida tovro iye.

³⁰ Ida Tapolngon rere ite ila osep e wai langane. “Osep ka ngarere umu kodong umu lou osep.” Iye wai ke ite langane kodong e due ite itopolou itau e osuk ke bitna. Deka osep ka tipolou itau e osuk ke bitna iye kakai isak.

Ida Tapolngon lana iye ke ite e ma songon ite kovok

³¹ Ida Tapolngon lua ite itau lokono kodong deka aitno kene ke ite. E aitno lumu lange ine? Sei dong ka karanga paiavu ite ma mole ite? Kesua Ida Tapolngon aitno kene ke ite kodong. Aurou lokono.

³² Oglou Ida Tapolngon dangdang Otno Arang Yesus ke itosep kovok. Aurou. Iye pagei Yesus me polou ke ite ma iye kere itosep ka pula keniye ke elio itau lokono. E aitno lumu lange? Ida Tapolngon lua ite ke Yesus kodong deka mase ma iye songon ite? Ma iye lua ite kovok? Aurou. Ma iye lua ite itau lokono vala. Ila luangan dong vala dong ke ite.

³³ E sei dong ka karanga sin elio vri ke ite ka Ida Tapolngon rere ite ila osep? Kesua iye due ite itopolou itau e osuk ke bitna kodong. Gute kene gesa dong ka ila sinngen elio karanga mole ite ka Ida Tapolngon ila osep kovok.

³⁴ Ma sinngen elio keniye tibure vala. Kesua Yesus Krais mete e kasip amunte kodong. Ari Ida Tapolngon due poga tito ke ina denga deka eknikane iye lua ite e dong ke Ida Tapolngon limla odung e loulou ke ite.

³⁵ Krais lana iye omba lokono ke osep ka ila osep. E sei dong ka karanga dangdang elio ka iye lana iye ke ite? Aurou. Gute kene gesa e elio kene gesa dong ka karanga dangdang elio ka iye lana iye ke ite kovok. Langka elio soulu e elio ka opru tipolou ke ite ma tikaranga tidangdang elio ka iye lana iye ke ite kovok. Langka agegeng e sapanga ombatno polou ke ite ma tibure blang. Langka udo klos kovok ma Yesus dau lana iye ke ite. Langka elio soulu polou ke ite ka itoulou tarna lite ine ma Yesus dau lana iye ke ite. Langka evlei polou ke ite ma Yesus dau lana iye ke ite blang.

³⁶ Oglou ari gute Devit sogo Ida Tapolngon ila pelengon palma ka wai langane. “Oklou aling aling osep tiwaiki tidue burwa ke ite kesua batne ite lem osep. Tivati ite eriar langka sipsip ka tiwaiki timter isak deka timete.”

³⁷ Eknikane lama osep aitno lisak soulu ke ite langka Devit sogo ine ma itoulou tarna lite ke isak kovok. Ma elio soulu tonari mole ite kovok kesua Yesus lana iye ke ite. E ma itomole isak.

³⁸ Eknikane aitno lungong dagar lokono langane. Elio kene gesa dong kovok ka karanga dangdang Ida Tapolngon ma iye lana iye ke ite kovok. Langka itodong koke itemete ma iye dau lana iye ke ite. Langka ensel itau koke angelo soulu io tikaranga tidangdang iye ma iye lana iye ke ite kovok. Eknikane elio kene gesa dong ka karanga dangdang Ida Tapolngon ma iye lana iye ke ite kovok. E mase elio kene gesa ma polou ka karanga dangdang Ida Tapolngon ma iye lana iye ke ite kovok.

³⁹ Omur ka egim koke omur ka moli tikaranga tidangdang Ida Tapolngon ma iye lana iye ke ite kovok. Wan kene gesa dong ke omur ka pula keniye ka karanga dangdang Ida Tapolngon ma iye lana iye ke ite kovok. Aurou. Iye lana iye ke ite vala kesua batne ke Ida Puda Krais Yesus dong.