Pas ka Pol sogoe uti la ke osep Rom ina 7 - Aria New Testament

Eknikane itedidi elio oku ina

¹ Sipmi. Umoklingen lou pele-ngon ane. Umeile omur ke itosep Yuda ina udo pelengon dagar ka itedidie e ka plau ite. Udo pelengon dagar ka itedidie karanga plau osep ka timete kovok. Aurou. Iye plau osep ka dau tidong vala.

² Oglou Moses sogo pelengon dagar ka langane. Langka apmang gesa gi gute ma ila boget plau iye. Ma iye plau apmang tonari la lama iye mete deka ma iye plau apmang tonari kovok. Kesua iye mete e apmang dong vala.

³ E langka apmang ila boget dau dong e iye la dong kap gute silang apmang tonari ila elio soulu lokono. Kesua iye klou ila boget e dar Moses ila sogongon. E silang blang langane. Langka apmang gesa ila boget mete mgo deka iye la gi gute silang apmang tonari klou ila boget e dar Moses ila sogongon kovok. Kesua ila boget mete kodong.

⁴ Sipmi. Umoklingen lou pele-ngon. Umogosok Yesus umemete kodong. Deka Moses ila sogongon plau umu kovok. Kesua umeneklep ke Yesus ka oglou mete e Ida Tapolngon due poga tito ke ina denga. Deka iye Upu Puda e plau umu kesua iye waiki umodue Ida Tapolngon ila bokongon itau vala.

⁵ Oglou elio oglou ina pagei pampamu lite e itodue elio epmes ina bitna bitna vala. Alo ari iteile ke Moses ila sogongon kodong. Iteile ila sogongon dangdang ite ke elio epmes ina bitna bitna. Iteile omur ke sogongon tonari e aitno lite dau dagar ke udo elio soulu bitna bitna. E itodue elio epmes ina pula. E udo elio isuk isuk ka pula keniye soulu ma itemete ine.

⁶ E eknikane itodong langka itemete kap Yesus kodong. Itemete kap Yesus deka Moses ila sogongon karanga plau ite blang kovok. Kesua itemete ine kodong. E eknikane Ida Tapolngon kar ite elio oku ina ka Ano Itau ka karanga plau ite vala.

Elio oglou ina ka opru ite

⁷ Aitno lumu lange? Moses ila sogongon iye sogongon soulu koke aurou? Aurou. Sogongon tonari itau e nis ite ke udo elio epmes ina vala. Sogongon tonari dangdang ite ma itangale osep urok wan kovok. Ngaklingen ke sogongon tonari langane deka lokono ngaile oglou ngadar Moses ila sogongon e ngangale osep urok wan.

⁸ E Moses ila sogongon dangdang ite ma itangale osep urok wan kovok. E aitno lungong mter ngawaiki ngangale osep urok wan. Langka ngaile Moses ila sogongon kovok aitno lungong mtere kovok. E ngaile ke sogongon tonari deka ngadare.

⁹ Oglou ngadong vala e ngaile itau ke Moses ila sogongon kovok. Ari aitno lungong mter ngawaiki ngadong itau vala. Mase ngaklingen Moses ila sogongon e ngaile ngadare kodong. Deka ari ngaile ma ngamete ine.

¹⁰ E Ida Tapolngon waiki ma osep ka pula keniye tididi ila pelengon vala. E osep ka tididie itau ma tidong itau vala. E ngaile ngakaranga ngadidie itau kovok e ma ngamete ine vala.

¹¹ Ngaile Moses ila sogongon dangdang itosep ke elio epmes ina bitna bitna. Ngaile ine e ngawaiki ngadidie. E aitno lungong dau waiki ngadue elio epmes ina bitna bitna. E elio epmes ina waiki pagolgol aitno lungong ine. Deka ngadar sogongon tonari e ngamete ine. Kesua osep ka tidar Moses ila sogongon ma timete ine.

¹² E Moses ila sogongon keniye itau lokono vala. E silang blang langane. Sogongon tonari osuk lokono e wai ke elio ka lua osep.

¹³ E langka ngadar Moses ila sogongon kodong ma ngamete ine. Aitno lumu lange? Ngau metengen ina poloungon batne ke Moses ila sogongon ka itau? Kesua langka ila sogongon ka itau dong kovok ma ngadare ma ngamete ine kovok. Aurou. Ngau metengen ina poloungon batne ke Moses ila sogongon ka itau kovok. Ngong tona ngadar Moses ila sogongon deka ngamete ine. E ngaile Moses ila sogongon nis ngong lou elio soulu lokono.

¹⁴ Oglou Ano Itau due Moses aitno deka iye sogo ila sogongon ka itau. E ngong gute e elio epmes ina waiki plau ngong ma ngadue elio soulu vala.

¹⁵ E eknikane ngaile ngong itau kovok. Kesua alo ka ngawaiki ngadue elio itau ngadue elio soulu vala. E ngawaiki ngadue elio soulu kovok e ngawaiki ngadue elio itau vala.

¹⁶ Ngawaiki ngadue elio itau vala kesua aitno lungong kene ine. E ngadue elio soulu ka dar Moses ila sogongon deka aitno lungong kro ine. E ngaile Moses ila sogongon wan ka itau vala e lou elio isuk isuk wan ka soulu.

¹⁷ Lama ngawaiki ngadue elio epmes ina bitna bitna kovok ngong dau ngadue elio epmes ina pula. Kesua elio epmes ina dong ke pampamu lungong kodong.

¹⁸ Ngong kenngong aitno lungong karanga mter elio gesa ka itau kovok. Langka ngawaiki ngadue elio itau ngakaranga ngadue kovok e ngadar Moses ila sogongon vala.

¹⁹ Ngawaiki ngadue elio itau e ngadue elio itau kovok. E ngadue elio epmes ina bitna bitna ka ngawaiki ngadue kovok.

²⁰ Ngawaiki ngadue elio epmes ina bitna bitna kovok e dau ngadue. E lou elio nis ngong ngaplau pampamu lungong itau kovok e elio epmes ina dau dong ke ngong.

²¹ Ngadong langane. E nga-ile omur ke elio gesa ka dong ke pampamu lungong langane. Ngawaiki ngadue elio itau e ngadue elio soulu vala.

²² E aitno lungong dagar lokono ma ngadidi Moses ila sogongon vala.

²³ Aitno lungong dagar ma ngadue elio itau vala e elio gesa dong ke pampamu lungong ka para pulu kap aitno lungong ma ngadue elio soulu vala. Deka aling pula elio tonari mole aitno lungong e ngadue elio soulu vala.

^24-25 Aisudo. Ngong tona vala. Ngausine? Ngadar Moses ila sogongon aling pula e aitno lungong soulu lokono ine. Aitno lungong dagar lokono ma ngadue elio itau vala. E elio epmes ina ka dong ke pampamu lungong para pulu kap aitno lungong e waiki plau ngong. E ngausine? Sei ma lua ngong ine? Umoklingen. Ida Puda Yesus Krais ma lua ngong ine. E eknikane ngakakai Ida Tapolngon angaine tito la egim ine.