Pas ka Pol sogoe uti la ke osep Rom ina 5 - Aria New Testament

Osep ka tipolou itau e osuk ke Ida Tapolngon bitna

¹ Eknikane itopolou itau e osuk ke Ida Tapolngon bitna kodong kesua batne aitno lite ila dagar la ke Ida Puda Yesus Krais mgo. Deka iye lua ite e due Ida Tapolngon aitno epen ke ite batne ke iye.

² Iye lua ite e Ida Tapolngon ila makaingan kading ite batne ke Yesus ka aitno lite dagar ine kodong. Deka aitno lite neser ke iye kesua iteile omur ma Ida Tapolngon kakai ite kap Yesus.

³ Aitno lumu lange? Ma elio ka opru polou ke ite e ma aitno lite kro ine? Aurou. Ma aitno lite kro ine kovok. Ma itakakai Ida Tapolngon angaine tito ine vala. Ma itakakai angaine tito ine kesua iteile elio ka opru ite ma due aitno lite tipolou dagar lokono.

⁴ Aitno lite tipolou dagar lokono ke Ida Tapolngon deka ma aitno itau ke ite. Deka ite ka Ida Tapolngon aitno itau ke ite ma aitno lite tipolou dagar lokono ke iye e ma itapara ke alo ka itodong kap iye.

⁵ Deka elio ka itapara ke alo ka itodong kap iye ma la adai kovok. Aurou. Ma elio tonari polou lokono vala deka ma itodong itau kap iye. Kesua iye nis ite kodong iye lana iye ke ite alo ka iye tuktuk Ano Itau karanga ke ite kente kente.

⁶ Oglou elio epmes ina kading itosep. E ari iteile ke ekreng itau gesa ka karanga lua ite ma itomole udo elio epmes ina kovok. Ari Ida Tapolngon didi aitno e pagei Yesus me polou ke ite ma ina metengen kli udo elio epmes ina.

⁷ Langka itosep itakaranga itemete ma udo metengen kasip gute silang blang ina metengen kovok. Kesua itosep itakasip amunte pulu langane kovok. Langka gute itau mete ma gute silang blang ma kasip amune e mete ine? Aurou. Ma iye blang mete vala. E silang blang langane. Langka gute gesa ka oglou iye lua itosep aling pula mete. Ma gute silang blang kasip amune e mete ine koke aurou? Aurou. Sei ile?

⁸ Yesus ulou ke ina metengen ka kasip amunte kovok. Aurou. Iye mete vala. Oglou ari itosep ka pula keniye ite osep epmes ina e itodue elio epmes ina vala. E ari Ida Tapolngon pagei Yesus me polou ke ite ma kasip amunte. E Yesus kasip amunte e mete batne ke udo elio epmes ina. Kesua Ida Tapolngon lana iye ke itosep ka pula keniye.

⁹ E eknikane Ida Tapolngon due ite itopolou itau e osuk ke bitna batne ke Yesus ina metengen e ina marau ka kasip amunte. Itopolou itau e osuk ke Ida Tapolngon bitna batne ke Ida Kasipngen ka kasip amunte kodong. Deka Ida Tapolngon aitno epen ke ite. E ma aitno ila engil due ite kovok kesua batne Yesus kasip amunte kodong.

¹⁰ Oglou Ida Tapolngon ina oul itosep. E ari iye due Otno Arang ma iye kasip amunte. E elio ka iye due Otno Arang kasip amunte due aitno epen ke ite ma iye due mada ke ite. Iye due mada ke lite e due ite itopolou sisrok batne ke Yesus ka lua ite kodong iye dong.

¹¹ E silang blang langane. Aitno lite itau lokono ke Ida Tapolngon. Kesua iye due mada ke ite e itopolou sisrok batne ke Ida Puda Yesus Krais.

Gute Adam e gute Yesus

¹² Oglou ari Adam due elio epmes ina gesa ka mgo ke elio epmes ina ka pula keniye. Deka ari elio epmes ina e metengen duru dong ke iye. Deka elio epmes ina e metengen tonari pakes duru ke itosep ka pula keniye. Kesua batne elio epmes ina ka mgongon ka Adam due.

¹³ Oglou alo ka Moses ila sogongon dau polou kovok ari osep ka pula keniye tidue elio epmes ina bitna bitna. E ari urok elio vri ke isak e timete ine. E silang blang langane. Langka Moses ila sogongon dong kovok dau elio epmes ina dong kodong.

¹⁴ Lama sogongon tonari dong kovok osep ka pula keniye ka tidong Adam me iding ke Moses isak dau timete. Lama osep tonari tidar Ida Tapolngon ila pelengon kovok eriar langka oglou Adam dare isak dau timete. E gute Adam ka mgo ke itosep ka pula keniye due elio epmes ina ka kading itosep ka pula keniye. E Adam iye nisngen ke gute kene ka ma polou ke ite e due elio gesa ka karanga lua ite ka pula keniye ke udo elio epmes ina.

¹⁵ E Adam ka mgo ke ite e gute ka mase dau tauni me polou ke ite urok elio la pulu kovok. Kesua oglou Adam due elio epmes ina. Deka osep ka pula keniye ka tipolou batne ke iye timete batne ke elio epmes ina tonari ka iye due. E gute Yesus due elio epmes ina gesa langka oglou Adam due kovok. Aurou. Yesus me polou ke ite e lua ite vala e dong itau vala. Deka Ida Tapolngon due ila makaingan polou ke osep ka pula keniye e lua isak ke urok elio epmes ina. Iye lua osep langane batne ke gute kene Yesus Krais vala.

¹⁶ E Ida Tapolngon ila makaingan ka iye pagei me polou ke ite ane elio itau lokono. E elio ka Adam due elio epmes ina ane elio soulu lokono. Elio orwo tonari la pulu kovok. Oglou Adam dong e iye due elio epmes ina gesa. Deka dau tauni osep ka pula keniye ka tipolou batne ke iye tidue elio epmes ina bitna bitna pula e timete ine. Kesua urok elio vri ke isak. La lama mase Ida Tapolngon didi ila makaingan e pagei Yesus me polou ke ite. E iye due elio itau vala e due ite itopolou itau e osuk ke Ida Tapolngon bitna.

¹⁷ Oglou ari Adam due elio epmes ina deka metengen duru ke osep ka pula keniye e due isak timete. E elio ka Yesus Krais lua ite ine mole elio ka oglou Adam due e duru dong ke ite. Deka osep ka Ida Tapolngon makai isak omba e due isak tipolou itau e osuk ke bitna kodong urok mosongon itau lokono. E osep ka tipolou itau e osuk ke Ida Tapolngon bitna kodong ma tidong itau kap Yesus blang.

¹⁸ E silang blang langane. Oglou gute kene Adam dong e due elio kene ka mgo ke elio epmes ina ka pula keniye. Deka elio epmes ina duru dong ke itosep ka pula keniye. E udo elio epmes ina bitna bitna tivri ke ite. La lama mase dau tauni gute silang me polou ke ite e ari iye due elio kene ka karanga lua osep ka pula keniye ma tipolou itau e osuk ke Ida Tapolngon bitna. E osep ka tipolou itau e osuk ke Ida Tapolngon bitna urok mosongon itau lokono.

¹⁹ Oglou gute kene Adam dar Ida Tapolngon ila pelengon deka itosep ka pula keniye itopolou osep epmes ina ine. E mase dau tauni Yesus me dong e didi Ida Tapolngon ila pelengon keniye. E eknikane Ida Tapolngon due itosep pula itopolou itau e osuk ke bitna. Kesua batne oglou Yesus didi ila elio keniye vala.

²⁰ Oglou ari Ida Tapolngon due Moses aitno deka iye sogo Ida Tapolngon ila pelengon ka dong kap osep. E osep ka tile omur ke sogongon tonari tidare aling pula e urok elio epmes ina pula vri ke isak. E alo ari Ida Tapolngon didi aitno e pagei ila makaingan ke osep ari e ila makaingan tonari res polou ombatno e mole elio soulu ka dong ke osep ari.

²¹ Oglou elio epmes ina kading itosep e itosep keniye itemete ine. E eknikane Ida Tapolngon ila makaingan due ite e kading ite. E Ida Tapolngon due ite itopolou itau e osuk ke bitna. Deka udo mosongon ka itau lokono ina yagosngon kovok batne ke Ida Puda Yesus Krais dong.